ନୂଆଦିଲ୍ଲୀ: ଭାରତୀୟ ମହାକାଶଚାରୀ ଗ୍ରୁପ କ୍ୟାପଟେନ୍ ଶୁଭାଂଶୁ ଶୁକ୍ଳା ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସଏସ)ରୁ ସ୍ପେସଏକ୍ସର ଡ୍ରାଗନ ସ୍ପେଶକ୍ରାଫ୍ଟରେ ଅନଡକିଂ କରି ପୃଥିବୀକୁ ଫେରିବା ପାଇଁ ୨୧ ଘଣ୍ଟିଆ ଯାତ୍ରା ଆରମ୍ଭ କରିଛନ୍ତି। ସୋମବାର ଅପରାହ୍ନ ୪ଟା ୩୫ ମିନିଟ ସମୟରେ (ଭାରତୀୟ ସମୟ) ଏହି ଅନଡକିଂ ସଫଳତାର ସହ ସମ୍ପନ୍ନ ହୋଇଛି। ଆକ୍ସିଅମ-୪ (ଏକ୍ସ-୪) ମିଶନରେ ପାଇଲଟ ଭାବେ ଦାୟିତ୍ୱ ତୁଲାଇଥିବା ଶୁଭାଂଶୁ ଓ ତାଙ୍କ ସାଥୀ ମହାକାଶଚାରୀ ଆସନ୍ତା ଜୁଲାଇ ୧୫ ତାରିଖରେ ପ୍ରାୟ ଅପରାହ୍ନ ୩ଟା ସମୟରେ ପ୍ରଶାନ୍ତ ମହାସାଗରରେ ଥିବା କାଲିଫୋର୍ନିଆ ଉପକୂଳରେ ଅବତରଣ କରିବେ।
ଏହି ୧୮ ଦିନିଆ ଏକ୍ସ-୪ ମିଶନରେ ଶୁଭାଂଶୁ ଓ ତାଙ୍କ ଦଳ ୬୦ରୁ ଅଧିକ ବୈଜ୍ଞାନିକ ପରୀକ୍ଷଣ କରିଛନ୍ତି। ଯେଉଁଥିରେ ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)ର ୭ଟି ପରୀକ୍ଷଣ ସାମିଲ ରହିଛି। ଏହି ପରୀକ୍ଷଣଗୁଡ଼ିକ ମାଇକ୍ରୋଗ୍ରାଭିଟିରେ ମାଇକ୍ରୋଆଲଗି, ମାଂସପେଶୀ କ୍ଷୟ ଓ ଉଦ୍ଭିଦ ବୃଦ୍ଧି ଉପରେ କେନ୍ଦ୍ରିତ ଥିଲା। ଏହି ମିଶନ ଭାରତର ମହାକାଶ ଗବେଷଣା କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସ୍ଥାପନ କରିଛି। ଯାହା ଆଗାମୀ ଗଗନଯାନ ମିଶନ ପାଇଁ ମହତ୍ତ୍ୱପୂର୍ଣ୍ଣ ଅବଦାନ ରଖିବ।
ଅନଡକିଂ ପୂର୍ବରୁ ଆଇଏସଏସରେ ଆୟୋଜିତ ବିଦାୟ ସମାରୋହରେ ଶୁଭାଂଶୁ ଭାରତର ପ୍ରଥମ ମହାକାଶଚାରୀ ରାକେଶ ଶର୍ମାଙ୍କ ପ୍ରସିଦ୍ଧ ବାଣୀ “ସାରେ ଜହାଁ ସେ ଅଚ୍ଛା”କୁ ସ୍ମରଣ କରିଥିଲେ। ସେ କହିଥିଲେ “ଆଜିର ଭାରତ ମହାକାଶରୁ ଉଚ୍ଚାକାଂକ୍ଷୀ, ନିର୍ଭୀକ, ଆତ୍ମବିଶ୍ୱାସୀ ଓ ଗର୍ବିତ ଦେଖାଯାଉଛି।” ତାଙ୍କର ଏହି ଖତା ଭାରତୀୟଙ୍କ ମନରେ ଗର୍ବ ଓ ପ୍ରେରଣା ସୃଷ୍ଟି କରିଛି।
ଅବତରଣ ପରେ ଶୁଭାଂଶୁ ଓ ତାଙ୍କ ଦଳ ଏକ ସପ୍ତାହ ଧରି ଏକାନ୍ତବାସରେ ରହିବେ। ଯେଉଁଥିରେ ମାଇକ୍ରୋଗ୍ରାଭିଟି ଯୋଗୁଁ ହେଉଥିବା ମାଂସପେଶୀ ଦୁର୍ବଳତା, ହାଡ଼ ଘନତ୍ୱ ହ୍ରାସ ଓ ସନ୍ତୁଳନ ସମସ୍ୟା ଆଦିର ସମାଧାନ କରାଯିବ। ତେବେ ଏହି ମିଶନ ଭାରତର ମହାକାଶ କାର୍ଯ୍ୟକ୍ରମକୁ ନୂଆ ଉଚ୍ଚତା ଦେଇଛି।
