ତିରୁପତି: ଆନ୍ଧ୍ରପ୍ରଦେଶର ତିରୁପତି ରେଳ ଷ୍ଟେସନ ନିକଟରେ ଛିଡା ହୋଇଥିବା ଦୁଇଟି ଟ୍ରେନରେ ନିଆଁ ଲାଗି ଯିବାରୁ ଷ୍ଟେସନରେ ଭୟଙ୍କର ଅଗ୍ନିକାଣ୍ଡ ଘଟିଚି। ଖବର ମୁତାବକ, ରାଜସ୍ଥାନରୁ ତିରୁପତି ଆସିଥିବା ହିସାର-ତିରୁପତି ସ୍ପେସିଆଲ ଟ୍ରେନ (ଟ୍ରେନ ନମ୍ବର ୦୪୭୧୭) ଏବଂ ରାୟଲସୀମା ଏକ୍ସପ୍ରେସରେ ହଠାତ୍ ନିଆଁ ଲାଗିଯାଇଥିଲା। ଯେଉଁଥିରେ ହିସାର-ତିରୁପତି ଟ୍ରେନର ଦୁଇଟି ସାଧାରଣ କୋଚ୍ ସମ୍ପୂର୍ଣ୍ଣ ଭାବେ ଜଳିପୋଡି ନଷ୍ଟ ହୋଇଯାଇଛି। ଅନ୍ୟପଟେ ଏହି ଅଗ୍ନିକାଣ୍ଡରେ ରାୟଲସୀମା ଏକ୍ସପ୍ରେସର ଜେନେରେଟର କୋଚ୍ ଆଂଶିକ ଭାବେ କ୍ଷତିଗ୍ରସ୍ତ ହୋଇଛି। 

ସୂଚନା ମୁତାବକ, ସୋମବାର ଦିନ ଅପରାହ୍ନ ପ୍ରାୟ ୨ ଟା ସମୟରେ ତିରୁପତି ରେଳ ଷ୍ଟେସନ ନିକଟରେ ଷ୍ଟାବଲିଂ ୟାର୍ଡରେ ହିସାର-ତିରୁପତି ସ୍ପେସିଆଲ ଟ୍ରେନ ଛିଡା ହୋଇଥିବା ସମୟରେ ଦୁଇଟି ଖାଲି ସାଧାରଣ କୋଚ୍‌ରେ ନିଆଁ ଲାଗିଯାଇଥିଲା। ନିଆଁ ଦେଖିବା ମାତ୍ରେ ସେଠାରେ ଉପସ୍ଥିତ ଥିବା ରେଳ କର୍ମଚାରୀମାନେ ତୁରନ୍ତ କୋଚ୍‌ଟିକୁ ଅନ୍ୟ କୋଚ୍‌ଗୁଡ଼ିକଠାରୁ ଅଲଗା କରି ନିଆଁକୁ ଆୟତ୍ତ କରିଥିଲେ। ସୌଭାଗ୍ୟବଶତଃ, ଏହି ସମୟରେ ଟ୍ରେନରେ କୌଣସି ଯାତ୍ରୀ ନଥିଲେ, ଯାହା ଦ୍ୱାରା କୌଣସି ଜୀବନହାନି ହୋଇନଥିବା ଜଣାପଡିଛି।

STORY | Empty train coach catches fire in Andhra's Tirupati

READ: https://t.co/ACRhzSmT92

VIDEO:
(Source: Third Party) pic.twitter.com/aMY31h3Gus

— Press Trust of India (@PTI_News) July 14, 2025

ସମାନ୍ତରାଳ ଭାବେ, ରାୟଲସୀମା ଏକ୍ସପ୍ରେସରେ ମଧ୍ୟ ନିଆଁ ଲାଗିଯାଇଥିଲା। ଯେଉଁଥିରେ ଜେନେରେଟର କୋଚ୍ ଆଂଶିକ ଭାବେ କ୍ଷତିଗ୍ରସ୍ତ ହୋଇଥିଲା। ନିଆଁ ଲାଗିବା ଖବର ପାଇବା ମାତ୍ରେ ଅଗ୍ନିଶମ ବାହିନୀ ଏବଂ ରେଳ ଅଧିକାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଦକ୍ଷିଣ ମଧ୍ୟ ରେଳବାଇ ଅନୁଯାୟୀ, ବର୍ତ୍ତମାନ ସୁଦ୍ଧା ନିଆଁ ପୁରାପୁରି ନିୟନ୍ତ୍ରଣକୁ ଆସିଛି ଏବଂ ତିରୁପତି ଷ୍ଟେସନରୁ ଆସୁଥିବା କିମ୍ବା ଯାଉଥିବା ଟ୍ରେନ ସେବାରେ କୌଣସି ବାଧା ସୃଷ୍ଟି ହୋଇନାହିଁ।

ଏହି ଘଟଣା ପୂର୍ବ ଦିନ ଅର୍ଥାତ୍ ରବିବାର, ଜୁଲାଇ ୧୩ ତାରିଖରେ ତାମିଲନାଡୁର ତିରୁଭାଲ୍ଲୁର ନିକଟରେ ଏକ ମାଲବାହୀ ଟ୍ରେନରେ ନିଆଁ ଲାଗିବା ଘଟଣା ପରେ ଘଟିଛି। ସେହି ଘଟଣାରେ ଡିଜେଲ ନେଇ ଯାତ୍ରା କରୁଥିବା ଏକ ମାଲବାହୀ ଟ୍ରେନରେ ନିଆଁ ଲାଗିଯାଇଥିଲା, ଯେଉଁଥିରେ ୧୮ଟି ଓ୍ଵାଗନ ନଷ୍ଟ ହୋଇଯିବା ସହ ଚେନ୍ନାଇ-ଆରାକୋନମ ରେଳ ରୁଟରେ ଟ୍ରେନ ସେବା ବାଧାପ୍ରାପ୍ତ ହୋଇଥିଲା। ତିରୁଭାଲ୍ଲୁର ଘଟଣାରେ ମଧ୍ୟ କୌଣସି ଜୀବନହାନି ହୋଇନଥିଲା, କିନ୍ତୁ ସୁରକ୍ଷା ପାଇଁ ନିକଟସ୍ଥ ଅଞ୍ଚଳର ରହୁଥିବା ବାସିନ୍ଦାମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଥିଲା।

ପୋଲିସ ଏବଂ ରେଳ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଦୁର୍ଘଟଣାର କାରଣ ଅନୁସନ୍ଧାନ କରୁଛନ୍ତି। ପ୍ରାରମ୍ଭିକ ରିପୋର୍ଟ ଅନୁଯାୟୀ, ସର୍ଟ ସର୍କିଟ ଏହି ନିଆଁର କାରଣ ହୋଇପାରେ ବୋଲି ସନ୍ଦେହ କରାଯାଉଛି। ତେବେ ନିଆଁ ଲାଗିବା ସମୟରେ, ନିକଟସ୍ଥ ରେଳ ଲାଇନରେ ଚାଲୁଥିବା ଏକ ବନ୍ଦେ ଭାରତ ଟ୍ରେନକୁ ଅଟକାଯାଇ ଏକ ବଡ଼ ଦୁର୍ଘଟଣାକୁ ରୋକାଯାଇପାରିଥିଲା ବୋଲି ଅଧିକାରୀମାନେ ସୂଚନା ଦେଇଛନ୍ତି।

ଦକ୍ଷିଣ ରେଳବାଇ ଯାତ୍ରୀମାନଙ୍କ ସୁବିଧା ପାଇଁ ଏକ ହେଲ୍ପଲାଇନ ନମ୍ବର ଜାରି କରିଛି। ଏହି ଘଟଣା ଦୁଇ ଦିନରେ ଦୁଇଟି ଟ୍ରେନ ନିଆଁ ଲାଗିବା ଘଟଣାକୁ ନେଇ ରେଳ ସୁରକ୍ଷା ଉପରେ ପ୍ରଶ୍ନ ଉଠାଇଛି। ଅଧିକାରୀମାନେ ଏହାର ତଦନ୍ତ କରୁଛନ୍ତି ଏବଂ ଏହାର ପୁନରାବୃତ୍ତି ରୋକିବା ପାଇଁ ଆବଶ୍ୟକ ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଛନ୍ତି।