ଶ୍ରୀନଗର ୨୩/ ୦୫ : ଜାମ୍ମୁ କାଶ୍ମୀର ପୋଲିସକୁ ବଡ ଧରଣୀ ସଫଳତା ମିଳିଛି । ବାରାମୁଲା ଜିଲ୍ଲାରେ ଜଣେ ସରପଞ୍ଚଙ୍କୁ ହତ୍ୟା ମାମଲରେ ସଂପୃକ୍ତ ପାକିସ୍ତାନ ସ୍ଥିତ ଲସ୍କର-ଇ-ତୋଏବା ଆତଙ୍କବାଦୀ ସଂଗଠନର ୩ ଜଣ ସଦସ୍ୟଙ୍କୁ ଗିରଫ କରିଛି ପୋଲିସ । ଗତ ମାସରେ ସରପଞ୍ଚଙ୍କୁ ହତ୍ୟା କରିବା ପରେ ପୁଣି ବଡ ଧରଣର ଅପରାଧ ପାଇଁ ଯୋଜନା କରୁଥିବା ବେଳେ କାବୁ କରିଛି ପୋଲିସ । ଗିରଫ ୩ ଆତଙ୍କୀ ହେଉଛନ୍ତି ମହମ୍ମଦ ୟାତୁ, ମହମ୍ମଦ ରଫିକ୍ ଏବଂ ଆଶିକ ହୁସେନ୍ ।
ଏହାକୁ ନେଇ ଜାମ୍ମୁ କାଶ୍ମୀର ପୋଲିସ କହିଛି ଯେ, 'ଗିରଫ ୩ ଜଣ ଆତଙ୍କବାଦୀ ଲସ୍କର-ଇ-ତୋଏବା ସଂଗଠନର । ଏମାନେ ଗତ ମାସରେ ଜଣେ ସରପଞ୍ଚଙ୍କୁ ଗୁଳିକରି ଅତି ନିର୍ମମ ଭାବେ ହତ୍ୟା କରିଥିଲେ । ଏପ୍ରିଲ ୧୫ ତାରିଖରେ ନିର୍ଦଳୀୟ ସରପଞ୍ଚ ମନୁର୍ ଅହମଦଙ୍କୁ ଗୋଶବୁଗ୍ ପଟ୍ଟନ ନିକଟରେ ଗୁଳିକରି ହତ୍ୟା କରିଥିଲେ'। ଗିରଫ ଆତଙ୍କବାଦୀ ମାନେ ପାଟନ ନିକଟସ୍ଥ ଘୋଷବାଗ୍ର ବାସିନ୍ଦା ବୋଲି ପୋଲିସ କହିଛି ।
ବାରାମୁଲା ଏସ୍ପି ରଇସ୍ ମହମ୍ମଦ ଭଟ୍ଟ କହିଛନ୍ତି, ' ଗିରଫ ଆତଙ୍କବାଦୀଙ୍କୁ ପଚରାଉଚରା ବେଳେ ରୋଚକ ତଥ୍ୟ ସାମ୍ନାକୁ ଆସିଛି । ଏମାନେ ସମସ୍ତେ ଲସ୍କର କମାଣ୍ଡର ୟୁୁସୁଫ୍ କାଟଜୁ ଏବଂ ହିଲାଲ୍ ଶେଖ୍ ସହ ସିଧାସଳଖ ଯୋଗାଯୋଗରେ ଥିଲେ। ୟୁସୁଫ୍ ଏବଂ ହିଲାଲ୍ ଅପରାଧର ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଥିଲେ । ମୋହରା ସାଜିଥିଲେ ଏହି ୩ ଜଣ ଆତଙ୍କୀ । ବଡ କଥା ହେଉଛି ଏହି ଦୁଇ ଜଣ ହାର୍ଡକୋର ଆତଙ୍କବାଦୀ ମେ ୨୧ ଏବଂ ୨ ୨ ତାରିଖରେ ମାଲବାହ ଏନକାଉଣ୍ଟରରେ ପ୍ରାଣ ହରାଇଥିଲେ ।
ଗିରଫ ୩ ଆତଙ୍କୀ ମହମ୍ମଦ ୟାତୁ, ମହମ୍ମଦ ରଫିକ୍ ଏବଂ ଆଶିକ ହୁସେନ୍ ନିକଟରୁ ୩ଟି ଚାଇନା ପିସ୍ତଲ, ୩ ଟି ମାଗାଜିନ୍, ୨ଟଇ ଗ୍ରେନେଡ୍ ଏବଂ ଗୁଳି ଜବତ କରାଯାଇଛି । ବାରାମୁଲାରେ ପୁଣି ଅପରାଧିକ କାର୍ଯ୍ୟକଳାପ କରିବା ପାଇଁ ଏମାନେ ପ୍ରସ୍ତୁତ ହେଉଥିଲେ । ଏହା ପୂର୍ବରୁ ସେମାନଙ୍କୁ କାବୁ କରିଛି ପୋଲିସ ।