ଦେବଗଡ, ୯।୮  ଦେବଗଡ ଜିଲ୍ଲା ଦେଇ ଯାଇଥିବା ରାଞ୍ଚି- ବିଜୟୱାଡା ରାସ୍ତା ର କୁଶପଙ୍ଗା ନିକଟରେ ଟ୍ରକ ଓ ବୋଲେରୋ ମଧ୍ୟରେ ଦୁର୍ଘଟଣା ଘଟି ୬  ଜଣ ଆହତ ହୋଇଛନ୍ତି । ଆହତମାନଙ୍କ ମଧ୍ୟରେ ପାଞ୍ଚ ଜଣ ଗୋଟିଏ ପରିବାରର ହୋଇଥିବା ବେଳେ ଅନ୍ୟ ଜଣେ ହେଲେ ବୋଲେରୋ  ମାଲିକ । ସମସ୍ତଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇଛି।

ରିଆମାଳ ବ୍ଲକ ନୂଆଡିହି ଗ୍ରାମ ପଞ୍ଚାୟତ ଅନ୍ତର୍ଗତ ମହ୍ଲାରବାହାଳ ଗ୍ରାମର ମୁରଲୀ ପାତ୍ର  ତାଙ୍କ  ଶାଶୁ ପଦ୍ମା ନାଏକଙ୍କ ମୃତ୍ୟୁ ଖବର ପାଇଥିଲେ। ସେଥିପାଇଁ  ମୁରଲୀଙ୍କ ପରିବାର ଲୋକେ ଏକ ବୋଲେରୋ ଯୋଗେ ବାରକୋଟ ବ୍ଲକ ଅନ୍ତର୍ଗତ ଚକୁଳିଆ ଗ୍ରାମକୁ ଯାଉଥିଲେ। ରାଞ୍ଚି- ବିଜୟୱାଡା ରାସ୍ତା ର କୁଶପଙ୍ଗା ନିକଟରେ ପୂର୍ବରୁ ଛିଡା ହୋଇଥିବା ଏକ ଟ୍ରକକୁ ପାର କରିବା ସମୟରେ ସାମନାରୁ ଅନ୍ୟ ଏକ ଗାଡ଼ି ଚାଲି ଆସିଥିଲା । ଫଳରେ ଭାରସାମ୍ୟ ହରାଇ ଛିଡା ହୋଇଥିବା ଟ୍ରକ ପଛରେ ବୋଲେରୋଟି ଧକ୍କା ଦେଇଥିଲା । ଦୁର୍ଘଟଣା ଫଳରେ ବୋଲେରୋ ମାଲିକ ସ୍ବପ୍ନେଶ୍ବର ପ୍ରଧାନଙ୍କ ସହ ଅନ୍ୟ ପାଞ୍ଚ ଜଣ ଆହତ ହୋଇଛନ୍ତି। ଆହତମାନେ ହେଲେ ମୁରଲୀ ପାତ୍ର, ତାଙ୍କ ସ୍ତ୍ରୀ ମୋହିନୀ ପାତ୍ର, ମୁରଲୀଙ୍କ ଭାଇ ଦର୍ଶନୀଆ ପାତ୍ର, ଭାଇ ବୋହୁ ସୌଦାମିନୀ ପାତ୍ର ଓ ବୋହୁ ଭାନୁମତୀ ପାତ୍ର। ଦୁର୍ଘଟଣାରେ ସମସ୍ତ ଆହତ ଗୋଟିଏ ପରିବାରର ସଦସ୍ୟ ବୋଲି ଜଣାପଡ଼ିଛି ।  ଗାଡ଼ି ରେ ଥିବା ଅନ୍ୟ ଜଣେ ଶିଶୁ ଅଳ୍ପକେ ରକ୍ଷା ପାଇଯାଇଛି। ଦୁର୍ଘଟଣା ପରେ ସମସ୍ତ ଆହତମାନଙ୍କୁ ଦେବଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।