ନୂଆଦିଲ୍ଲୀ ୧୬/୦୯: ରବିବାର ସନ୍ଧ୍ୟାରେ ଲସ୍ ଏଞ୍ଜେଲ୍ସର ପିକକ୍ ଥିଏଟରରେ ଅନୁଷ୍ଠିତ ହୋଇଥିଲା ୭୭ତମ ଏମି ଆୱାର୍ଡସ୍ । ଟେଲିଭିଜନ୍ କଳାକାରଙ୍କ ପ୍ରଦର୍ଶନ ଓ କାହାଣୀ କେମିତି ଦର୍ଶକଙ୍କୁ କିମିଆ କରିଛି, ଏମି ସନ୍ଧ୍ୟା ତା’ର ବଡ଼ ପ୍ରମାଣ ଥିଲା । ୧୩ଟି ପୁରସ୍କାର ଜିତି ଏ ଥର ଏମିରେ ବାଜି ମାରିଛି ଆପଲ୍ ଟିଭିର ସେଥ୍ ରୋଗେନଙ୍କ ‘ଦ ଷ୍ଟୁଡିଓ’ । ଅଦ୍ୟାବଧି କୌଣସି କମେଡି ସିରିଜ୍ ଜିତିଥିବା ଏହା ପ୍ରଥମ ସର୍ବାଧିକ ସଂଖ୍ୟକ ପୁରସ୍କାର । ଟ୍ରାମେଲ ଟିଲ୍ମ୍ୟାନ୍ ଓ ବ୍ରିଟ୍ ଲୋଅର୍ ‘ସେଭରାନ୍ସ’ରେ ପ୍ରଦର୍ଶନ ପାଇଁ ଏକାଧିକ ପୁରସ୍କାର ଜିତିଛନ୍ତି । ନେଟ୍ଫ୍ଲିକ୍ସର ହିଟ୍ ମିନି ସିରିଜ୍ ‘ଆଡୋଲସେନ୍ସ’ ୬ ପୁରସ୍କାର ସହିତ ଚଳିତ ଏମି ଆୱାର୍ଡସ୍ର ବିଗ୍ ୱିନର୍ ହୋଇଛି। ଏଥିରେ ସ୍କୁଲ ସାଙ୍ଗର ହତ୍ୟାକାରୀ ଭୂମିକାରେ ଅଭିନୟ କରିଥିବା ୧୫ ବର୍ଷୀୟ ଓୱେନ କୁପର୍ ସର୍ବକନିଷ୍ଠ ଅଭିନେତା ଭାବେ ଲିମିଟେଡ୍ ବା ଆନ୍ଥୋଲୋଜି ସିରିଜ୍ରେ ଶ୍ରେଷ୍ଠ-ସହ ଅଭିନେତା ପୁରସ୍କାର ଜିତି ଇତିହାସ ସୃଷ୍ଟି କରିଛନ୍ତି ।
ସର୍ବାଧିକ ନୋମିନେସନ୍ ଜରିଆରେ ଆଗଧାଡ଼ିରେ ରହିଥିଲା ‘ସେଭରାନ୍ସ’ । ‘ସେଭରାନ୍ସ’ ଓ ‘ଦ ଷ୍ଟୁଡିଓ’ ଜରିଆରେ ଆପଲ୍ ଟିଭି ସମସ୍ତଙ୍କୁ ପଛରେ ପକାଇଛି । କମେଡି ସିରିଜ୍ରେ ଶ୍ରେଷ୍ଠ ମୁଖ୍ୟ ନାୟିକା ଭାବେ ଏମି ପୁରସ୍କାର ପାଇଛନ୍ତି ଜିନ୍ ସ୍ମାର୍ଟ (ହ୍ୟାକ୍ସ) । ସମାନ ବିଭାଗରେ ଶ୍ରେଷ୍ଠ ମୁଖ୍ୟ ନାୟକ ପୁରସ୍କାର ପାଇଛନ୍ତି ସେଥ୍ ରୋଗେନ । ଡ୍ରାମା ସିରିଜ୍ରେ ଶ୍ରେଷ୍ଠ ସହ-ଅଭିନେତା ପୁରସ୍କାର ପାଇଛନ୍ତି ଟ୍ରାମେଲ ଟିଲମାନ (ସେଭରାନ୍ସ) । ଏହି ବିଭାଗରେ ଶ୍ରେଷ୍ଠ ସହ-ଅଭିନେତ୍ରୀ ହୋଇଛନ୍ତି କ୍ୟାଥରିନ୍ ଲାନାସା (ଦ ପିଟ୍) । କମେଡି ସିରିଜ୍ରେ ଶ୍ରେଷ୍ଠ ସହ-ଅଭିନେତା ଓ ସହ- ଅଭିନେତ୍ରୀ ପୁରସ୍କାର ପାଇଛନ୍ତି ଜେଫ୍ ହିଲର୍ (ସମ୍ବଡି ସମ୍ହ୍ୱେର) ଓ ହାନ୍ନା ଆଇନବାଇଣ୍ଡର୍ (ହ୍ୟାକ୍ସ) । ଡ୍ରାମା ସିରିଜ୍ରେ ଶ୍ରେଷ୍ଠ ଅଭିନେତ୍ରୀ ପୁରସ୍କାର ହାସଲ କରିଛନ୍ତି ବ୍ରିଟ୍ ଲୋଅର୍ (ସେଭରାନ୍ସ) । ଶ୍ରେଷ୍ଠ ଅଭିନେତା ହୋଇଛନ୍ତି ନୋଆ ୱାଇଲ (ଦ ପିଟ୍) । ‘ଦ ପିଟ୍’କୁ ମିଳିଛି ଶ୍ରେଷ୍ଠ ଡ୍ରାମା ସିରିଜ୍ ପୁରସ୍କାର । ଶ୍ରେଷ୍ଠ କମେଡି ସିରିଜ୍ ହୋଇଛି ‘ଦ ଷ୍ଟୁଡିଓ’ । ଚଳିତ ଏମି ସମାରୋହର ସଂଚାଳନା କରିଥିଲେ ହାସ୍ୟାଭିନେତା ନେଟ୍ ବାର୍ଗେଟ୍ଜ ।
