ଜୟପୁର, ୦୪/୧୨ : ଶୈଶବରେ ମାଡ଼ିବସିଛି ଯନ୍ତ୍ରଣା। ଅସ୍ୱାଭାବିକ ଭାବେ ବଢ଼ିଚାଲିଛି ପେଟର ଆକାର । ଦିନରାତି ଯନ୍ତ୍ରଣାରେ ଛଟପଟ ହେଉଛି ୮ ବର୍ଷର ସୁଦର୍ଶନ ପୂଜାରୀ । ସ୍କୁଲ ଯାଇପାରୁନଥିବାରୁ ୪ ମାସ ହେଲା ବନ୍ଦ ହୋଇଯାଇଛି ପାଠପଢା । ଚିକିତ୍ସା ପାଇଁ ବିପିଏଲ୍ ପରିବାର ପାଖରେ ଅର୍ଥ ନାହିଁ। ଏଥିଲାଗି କୌଣସି ବଡ଼ ମେଡିକାଲ୍ ନେବା ଲାଗି ସାହସ ଜୁଟାଇ ପାରିନାହାନ୍ତି ପରିବାର ଲୋକେ । ସୁଦର୍ଶନର ଚିକିତ୍ସା ଲାଗି ଜିଲ୍ଲା ପ୍ରଶାସନ ତୁରନ୍ତ ସହାୟତାର ହାତ ବଢ଼ାଇବାକୁ ନିବେଦନ କରିଛନ୍ତି ସ୍ଥାନୀୟ ବାରିଣୀପୁଟ ନିବାସୀ ତଥା ସୁଦର୍ଶନର ବାପା ଅର୍ଜୁନ ପୂଜାରୀ ।
ଅର୍ଜୁନ କହିଛନ୍ତି, ଜନ୍ମରୁ ଠିକ୍ ଥିଲା ସୁଦର୍ଶନ । ପରେ ପରେ ସାମାନ୍ୟ ପେଟ ଫୁଲିକି ରହୁଥିଲା । ମେଡିକାଲ୍ ନେବାପରେ ସେମିତି କୌଣସି ବିପଦ ନଥିବା ଏବଂ ଧୀରେ ଧୀରେ ଠିକ୍ ହୋଇଯିବ ବୋଲି କହିଥିଲେ ଡାକ୍ତର । ସେବେଠାରୁ ସୁଦର୍ଶନ ସାଥୀ ପିଲାଙ୍କ ସହ ସ୍କୁଲ ଯାଉଥିଲା । ତୃତୀୟରେ ପଢୁଥିଲା । ୬ ମାସ ତଳେ ହଠାତ୍ ଟିବିରେ ଆକ୍ରାନ୍ତ ହୋଇଥିଲା । କୋରାପୁଟ ମେଡିକାଲ୍ କଲେଜ ଏବଂ ହସ୍ପିଟାଲରେ ରୋଗ ଚିହ୍ନଟ ପରେ ୪ ମାସ ଔଷଧ ଖାଇଥିଲା । ପରେ ଷ୍ଟକ୍ ନଥିବାରୁ ବନ୍ଦ ହୋଇଯାଇଥିଲା ଔଷଧ ସେବନ । ତା ପରଠୁ ଆଉ ସେ ସୁଦର୍ଶନକୁ ଡାକ୍ତରଖାନା ନେଇପାରି ନାହାନ୍ତି । ଏଣେ ମାତ୍ର ୪ ମାସ ଭିତରେ ପେଟର ଆକାର ଅସ୍ୱାଭାବିକ ବଢ଼ିଚାଲିଛି । ବହୁ କଷ୍ଟରେ କିଛିବାଟ ଚାଲୁଥିଲେ ବି ଆଦୌ ବସିପାରୁନି । ମଝିରେ ମଝିରେ ଜ୍ୱର ଆସୁଛି ଏବଂ ଯନ୍ତ୍ରଣା ବଢ଼ିଯାଉଛି । ଡାକ୍ତର କହୁଛନ୍ତି କୌଣସି ବଡ଼ ମେଡିକାଲ୍ ନେବାକୁ ପଡ଼ିବ । ପାଖରେ କିନ୍ତୁ ଅର୍ଥ ନାହିଁ । କୁଲି କାମ କଲେ ପରିବାରର ୩ ଛୁଆ ସମେତ ୫ ପ୍ରାଣୀ କୁଟୁମ୍ବର ପେଟକୁ ଦାନା ମୁଠାଏ ମିଳୁଛି । ଜମିବାଡ଼ି କିଛି ନାହିଁ । କେବଳ ସରକାରଙ୍କ ତରଫରୁ ମାସକୁ ୧୫ କେଜି ଚାଉଳ ମିଳୁଛି । ଏଭଳି ସ୍ଥିତିରେ ପିଲାକୁ ବାହରକୁ ନେଇ ଡାକ୍ତର ଦେଖାଇବା ସମ୍ଭବ ହୋଇପାରୁନି । ସରକାର ତାଙ୍କ ଗୁହାରି ଶୁଣନ୍ତୁ । କୌଣସି ବଡ଼ ମେଡିକାଲ୍ କିମ୍ବା ଶିଶୁ ଭବନକୁ ନେଇ ମାଗଣାରେ ସୁଦର୍ଶନର ଚିକିତ୍ସା ବ୍ୟବସ୍ଥା କରନ୍ତୁ । ନହେଲେ ପୁଅର ଭବିଷ୍ୟତ ନଷ୍ଟ ହୋଇଯିବ ବୋଲି ଅର୍ଜୁନ କହିଛନ୍ତି ।
