ଭୁବନେଶ୍ୱର,୧୯/୦୨ : ଦୀର୍ଘ ୧୫ ଦିନ ଧରି ଚାଲିଥିବା ଖଣ୍ଡଗିରି ମାଘମେଳା ଶାନ୍ତିଶୃଙ୍ଖଳାର ସହ ସରିଛି । ବିଏମ୍ସି ଚଳିତ ବର୍ଷ ରେକର୍ଡ ରାଜସ୍ୱ ଆଦାୟ କରିଛି । ୮୦ ଲକ୍ଷରୁ ଅଧିକ ଟଙ୍କା ରାଜସ୍ୱ ଆଦାୟ ହୋଇଛି । ପୂର୍ବ ବର୍ଷ ତୁଳନାରେ ୨୩ ଲକ୍ଷ ଟଙ୍କା ଅଧିକ ରାଜସ୍ୱ ଆଦାୟ ହୋଇଛି ।
ମେଳା ଆରମ୍ଭରୁ ପରିମଳ, ଆଲୋକ, ପାନୀୟ ଜଳ ଏବଂ ଜନସ୍ୱାସ୍ଥ୍ୟ ଇତ୍ୟାଦିକୁ ସଠିକ ଢଙ୍ଗରେ କରିବା ପାଇଁ ମେୟର ସୁଲୋଚନା ଦାସ ଟିମ୍ ବିଏମ୍ସିକୁ ନିର୍ଦ୍ଦେଶ ଦେଇଥିଲେ । ମେଳାରେ ଆଲୋକ, ପାନୀୟ ଜଳ ସହ ଜନସ୍ୱାସ୍ଥ୍ୟ ଓ ପରିମଳ ଉପରେ ଗୁରୁତ୍ୱ ଦିଆଯାଇଥିଲା । ଖଣ୍ଡଗିରି ମାଘ ମେଳାରେ ପଡ଼ିଥିବା ଖାଦ୍ୟ ଦୋକାନୀମାନେ ଯେପରି ପରିଷ୍କାରର ସହ ଖାଦ୍ୟ ବିକ୍ରି କରିବେ ସେ ନେଇ ନିର୍ଦ୍ଦେଶ ଦିଆଯାଇଥିଲା । କମିଶନର ରାଜେଶ ପ୍ରଭାକର ପାଟିଲଙ୍କ ନିର୍ଦ୍ଦେଶରେ ୨୪ ଘଣ୍ଟିଆ ସଫେଇ କାର୍ଯ୍ୟକ୍ରମ ସାଙ୍ଗକୁ ଖାଦ୍ୟ ସୁରକ୍ଷା ଓ ଯାଞ୍ଚ କରାଯାଇଥିଲା । ଫେବ୍ରୁଆରୀ ୪ ରୁ ୧୭ ତାରିଖ ପର୍ଯ୍ୟନ୍ତ ନିରନ୍ତର ତଦାରଖ ଚାଲୁ ରହିଥିଲା । ଖାଦ୍ୟ ନିରାପତ୍ତା ନିୟମକୁ ଭିତ୍ତି କରି ବିଭିନ୍ନ ଖାଦ୍ୟ ଦୋକାନରୁ ନମୁନା ସଂଗ୍ରହ, ବାସି ଖାଦ୍ୟ ନଷ୍ଟ କରିବା ଏବଂ ସତର୍କତା ନୋଟିସ୍ ଜାରି କରାଯାଇଥିଲା । ସମୁଦାୟ ୬୪୦ ଗୋଟି ଖାଦ୍ୟ ଦୋକାନରେ ଚଢାଉ କରାଯାଇ ପ୍ରାୟ ୪ କୁଇଣ୍ଟାଲ ଖରାପ ଖାଦ୍ୟ ନଷ୍ଟ କରାଯାଇଥିଲା । ୫୦ଟି ଦୋକାନରୁ ନମୁନା ସଂଗ୍ରହ କରାଯାଇ ପରୀକ୍ଷଣ ପାଇଁ ପଠାଯାଇଥିଲା । ସେଥିରୁ ୨ଟି ନମୁନା ଖରାପ ବାହାରିବାରୁ ସେମାନଙ୍କୁ ନୋଟିସ ଜାରି କରାଯାଇଛି । ଏ ବାବଦରେ କିଛି ଦୋକାନୀଙ୍କଠାରୁ ଜରିମାନା ମଧ୍ୟ ଆଦାୟ କରାଯାଇଛି ।
ସେହିପରି ମେଳା ଅଞ୍ଚଳରେ ୨୪ ଘଣ୍ଟିଆ ସଫେଇ ଜାରି ରହିଥିଲା । ଦିନକୁ ୩ଟି ପର୍ଯ୍ୟାୟରେ ସଫେଇ କରାଯାଉଥିଲା । ପ୍ରତି ଦଫାରେ ୧୦୦ ଜଣ ଲେଖାଏଁ ସଫେଇ କର୍ମୀଙ୍କୁ ନିୟୋଜିତ କରାଯାଇଥିଲା । ସମଗ୍ର ମେଳାରେ ୪୦ ଜଣ ଏସ୍ଆଇ, ଜୋନ୍ ସାନିଟେସନ ଏକ୍ସପର୍ଟ, ଏଜେନ୍ସି ସୁପରଭାଇଜରମାନେ ପରିମଳ କାର୍ଯ୍ୟର ତଦାରଖ କରୁଥିଲେ । ସେମାନଙ୍କ ସହିତ ଟିମ୍ ସାଇନ୍ ଓ ଏନଫୋର୍ସମେଣ୍ଟ ଟିମ୍ ମଧ୍ୟ ମୁତୟନ କରାଯାଇଥିଲା । ଦକ୍ଷିଣ-ପୂର୍ବ ଜୋନର ଜୋନାଲ କମିଶନର ରାକେଶ କୁମାର ପାତ୍ର, ସହକାରୀ କମିଶନର ଏନ୍. ଗଣେଶ ବାବୁ ନିୟମିତ କ୍ଷେତ୍ର ପରିଦର୍ଶନ କରୁଥିଲେ । ଅତିରିକ୍ତ କମିଶନର ଶୁଭେନ୍ଦୁ କୁମାର ସାହୁ ଏ ସମସ୍ତ କାର୍ଯ୍ୟକ୍ରମର ତଦାରଖ କରୁଥିଲେ।
ଏହି ଖବରଟିକୁ ପଢନ୍ତୁ-ଭାରସାମ୍ୟ ହରାଇ ବରଯାତ୍ରୀ ବସ୍ ଦୁର୍ଘଟଣାଗ୍ରସ୍ତ, ୫ ଆହତ
