ନୂଆଦିଲ୍ଲୀ,୧୭/୦୩: ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନୀତା ୱିଲିୟମ୍ସ ଏବଂ ତାଙ୍କ ସାଥୀ ବୁଚ୍ ୱିଲମୋରଙ୍କ ଲାଗି ରବିବାର ଐତିହାସିକ ଦିନ ଥିଲା । ଦୀର୍ଘ ୯ ମାସ ହେଲା ଉଭୟ ମହାକାଶରେ ଫସିଥିବାବେଳେ ସେମାନଙ୍କୁ ଫେରାଇ ଆଣିବା ଉଦ୍ଦେଶ୍ୟରେ ନାସା ଓ ଏଲନ ମସ୍କଙ୍କ କମ୍ପାନୀ ସ୍ପେସ୍ଏକ୍ସ ଦ୍ୱାରା ମିଳିତ ଭାବେ ଲଞ୍ଚ କରାଯାଇଥିବା କ୍ରୁ-୧୦ ମିଶନ୍ ଇଣ୍ଟରନ୍ୟାସନାଲ ସ୍ପେସ୍ ଷ୍ଟେସନ୍ (ଆଇଏସ୍ଏସ୍) ରେ ପହଞ୍ଚିଥିଲା । ସଫଳ ଡକିଂ ଓ ହ୍ୟାଚ୍ ଖୋଲିଯିବା ପରେ ମିଶନ୍ର ମହାକାଶଚାରୀମାନେ ସୁନୀତା, ବୁଚ୍ଙ୍କୁ ସାକ୍ଷାତ କରିଥିଲେ । ରେସ୍କ୍ୟୁ ଟିମ୍ ପହଞ୍ଚିବା ପରେ ଆଇଏସ୍ଏସ୍ରେ ସୃଷ୍ଟି ହୋଇଥିଲା ଖୁସିର ମାହୋଲ । ସୁନୀତା ସାଥୀ ମହାକାଶଚାରୀଙ୍କ ସହ ମହାକାଶରେ ନାଚିଥିଲେ ଓ ମସ୍ତି କରିଥିଲେ । ସେ ସମସ୍ତଙ୍କୁ ଆଲିଙ୍ଗନ କରି ଖୁସି ପ୍ରକାଶ କରିଥିଲେ । ମହାକାଶରେ ହୋଇଥିବା ସେହି ସେଲିବ୍ରେସନ୍ର ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି ।
ବୋଇଂ ଓ ନାସାର ମିଳିତ ‘କ୍ରୁ ଫ୍ଲାଇଟ୍ ଟେଷ୍ଟ ମିଶନ୍’ ଅନୁସାରେ ସୁନୀତା, ବୁଚ୍ ଗତବର୍ଷ ଜୁନ୍ ୫ରେ ମହାକାଶକୁ ଯାଇଥିଲେ । ସେମାନଙ୍କୁ ପ୍ରାୟ ଏକ ସପ୍ତାହ ମଧ୍ୟରେ ଫେରିବାର ଥିଲା । କିନ୍ତୁ ସେମାନଙ୍କୁ ନେଇ ଯାଇଥିବା ବୋଇଂ ଷ୍ଟାରଲାଇନର ମହାକାଶଯାନରେ ପ୍ରଯୁକ୍ତିଗତ ତ୍ରୁଟି ଯୋଗୁ ଦୀର୍ଘ ୯ ମାସ ହେଲା ମହାକାଶରେ ଉଭୟ ଫସି ରହିଛନ୍ତି । ଏହାପରେ ବାଧ୍ୟହୋଇ ନାସା ସ୍ପେସ୍ଏକ୍ସର ମହାକାଶଯାନରେ ସେମାନଙ୍କୁ ଫେରାଇ ଆଣିବାକୁ ନିଷ୍ପତ୍ତି ନେଇଥିଲା । ସେହି ମୁତାବକ, କ୍ରୁ-୧୦ର ଟିମ୍ ଶନିବାର ଭାରତୀୟ ସମୟ ଅନୁସାରେ ସକାଳ ପ୍ରାୟ ୪.୩୦ରେ ସ୍ପେସ୍ଏକ୍ସର ଫାଲ୍କନ୍ ୯ ରକେଟ୍ ଜରିଆରେ ଡ୍ରାଗନ୍ ମହାକାଶଯାନରେ ଉଡ଼ାଣ ଭରିଥିଲେ । ଫ୍ଲୋରିଡାସ୍ଥିତ କେନେଡି ସ୍ପେସ ସେଣ୍ଟରରୁ ଏହାକୁ ଲଞ୍ଚ୍ କରାଯାଇଥିଲା ।
ISSରେ ପହଞ୍ଚିଲେ କ୍ରୁ-୧୦ ସଦସ୍ୟ- ରବିବାର ୯.୪୦ରେ ଏହା ଡକିଂ କରିଥିବାବେଳେ ୧୧.୦୫ରେ ହ୍ୟାଚ୍ ଓପନ୍ ହୋଇଥିଲା । ଏହାପରେ କ୍ରୁ-୧୦ ମିଶନ୍ର ମହାକାଶଚାରୀ ନାସାର ଆନ୍ନି ମାକ୍ଲେନ୍, ନିକୋଲ ଆୟାର୍ସ, ଜାପାନର ତାକୁୟା ଓନିଶି, ରୁଷ୍ର କିରିଲ୍ ପେସ୍କୋଭ ସେଠାରେ ପୂର୍ବରୁ କାର୍ଯ୍ୟରତ ସୁନୀତା ୱିଲିୟମ୍ସ ଓ ସାଥୀଙ୍କୁ ସାକ୍ଷାତ କରିଥିଲେ । ସୁନୀତା ଓ ବୁଚ୍ ଆଗାମୀ କିଛି ଦିନ ଧରି ନୂଆ ମହାକାଶଚାରୀମାନଙ୍କୁ ଆଇଏସ୍ଏସ୍ ସଂପର୍କରେ ସୂଚନା ଦେବେ । ପରବର୍ତ୍ତୀ ସମୟରେ ସେ ଦୁଇଜଣଙ୍କ ସମେତ ଅନ୍ୟ ଦୁଇ ମହାକାଶଚାରୀ ନିକ୍ ହେଗ୍ ଓ ଆଲେକସାନ୍ଦ୍ର ଗୋରବୁନୋଭ ପୃଥିବୀ ପୃଷ୍ଠକୁ ଫେରିବେ । ପାଣିପାଗ ଠିକ୍ ରହିଲେ ମାର୍ଚ୍ଚ ୧୯ରେ ସେମାନେ ସ୍ପେସ୍ଏକ୍ସର କ୍ୟାପସୁଲ୍ ଜରିଆରେ ପୃଥିବୀକୁ ଫେରିବେ । ତାହା ଫ୍ଲୋରିଡା ତଟରେ ଅବତରଣ କରିପାରେ ବୋଲି ନାସା ପକ୍ଷରୁ କୁହାଯାଇଛି ।
