ନୂଆଦିଲ୍ଲୀ: ଏନଫୋର୍ସମେଣ୍ଟ ଡିରେକ୍ଟୋରେଟ (ଇଡି) ଦେୱାନ ହାଉସିଂ ଫାଇନାନ୍ସ କର୍ପୋରେସନ ଲିମିଟେଡ (DHFL) ସହ ଜଡ଼ିତ ଏକ ବୃହତ ବ୍ୟାଙ୍କ ଠକେଇ ମାମଲାରେ ୧୮୫.୮୪ କୋଟି ଟଙ୍କାର ସମ୍ପତ୍ତି ଜବତ କରିଛି। ଏହି ସମ୍ପତ୍ତି ମଧ୍ୟରେ ମୁମ୍ବାଇରେ ଥିବା ୧୫୪ଟି ଫ୍ଲାଟ ଏବଂ ୨୦ଟି ଫ୍ଲାଟ ସହ ଜଡ଼ିତ ରିସିଭେବଲ୍ସ ରୂପରେ ସମସ୍ତ ସ୍ଥାବର ଅସ୍ଥାବର ଆଦି ସାମିଲ ରହିଛି।
ଇଡି ଅନୁସାରେ, ଏହି ଜବତ କାର୍ଯ୍ୟାନୁଷ୍ଠାନ ପ୍ରିଭେନସନ ଅଫ ମନି ଲଣ୍ଡରିଂ ଆକ୍ଟ (PMLA) ଅଧୀନରେ କରାଯାଇଛି। DHFL ବିରୋଧରେ ୨୨,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ଆର୍ଥିକ ଅନିୟମିତତା ଅଭିଯୋଗ ରହିଛି। ଯେଉଁଥିରେ ବ୍ୟାଙ୍କ ଋଣର ଅପବ୍ୟବହାର ଏବଂ ଅନୁପଯୁକ୍ତ ଆର୍ଥିକ କାରବାର ଅନ୍ତର୍ଭୁକ୍ତ ରହିଛି। ଏହି ମାମଲାରେ କମ୍ପାନୀର ପୂର୍ବତନ ପ୍ରମୋଟର କପିଲ ଓୟାଙ୍କ ଏବଂ ଧୀରଜ ଓୟାଙ୍କ ମୁଖ୍ୟ ଅଭିଯୁକ୍ତ ଅଛନ୍ତି।
ଏହି ଜବତ ସମ୍ପତ୍ତି ମଧ୍ୟରେ ରହିଛି ମୁମ୍ବାଇର ଉପକଣ୍ଠରେ ଥିବା ବିଭିନ୍ନ ଆବାସିକ ପ୍ରୋଜେକ୍ଟରେ ଫ୍ଲାଟ ଏବଂ ଅନ୍ୟାନ୍ୟ ଆର୍ଥିକ ସମ୍ପତ୍ତି। ଇଡି ଏହି ମାମଲାରେ ତଦନ୍ତ ଜାରି ରଖିଛି ଏବଂ ଆଗକୁ ଅଧିକ ସମ୍ପତ୍ତି ଜବତ ହେବାର ସମ୍ଭାବନା ରହିଛି।
ଏହା ପୂର୍ବରୁ ଇଡି ଏବଂ ସିବିଆଇ ଏହି ମାମଲାରେ ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି, ଯାହା ଭାରତର ଅନ୍ୟତମ ବୃହତ ଆର୍ଥିକ ଠକେଇ ମାମଲା ଭାବେ ବିବେଚିତ ହେଉଛି।
