ନୂଆଦିଲ୍ଲୀ,୨୪/୧୦: ରାଜଧାନୀ ଦିଲ୍ଲୀରେ ଆଇଏସ୍ଆଇଏସ୍ ସହ ଜଡ଼ିତ ଦୁଇ ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରାଯାଇଛି। ଦିଲ୍ଲୀ ପୋଲିସ ଅଧିକାରୀ କହିଛନ୍ତି ଯେ ଉଭୟ ସନ୍ଦିଗ୍ଧ ଆତଙ୍କବାଦୀଙ୍କ ନାମ ଅଦନାନ। ସେମାନଙ୍କ ମଧ୍ୟରୁ ଜଣେ ଦିଲ୍ଲୀର ବାସିନ୍ଦା, ଅନ୍ୟ ଜଣେ ମଧ୍ୟପ୍ରଦେଶର ବାସିନ୍ଦା। ପୋଲିସ ଅନୁଯାୟୀ, ଉଭୟ ସନ୍ଦିଗ୍ଧ ଆତଙ୍କବାଦୀଙ୍କୁ ଆତ୍ମଘାତୀ ଆକ୍ରମଣ ପାଇଁ ତାଲିମ ଦିଆଯାଉଥିଲା ଏବଂ ସେମାନଙ୍କର ଟାର୍ଗେଟ ଥିଲା ଦିଲ୍ଲୀ। ସେମାନେ ଦିଲ୍ଲୀର ଜନଗହଳିପୂର୍ଣ୍ଣ ଅଞ୍ଚଳରେ ଆଇଇଡି ବିସ୍ଫୋରଣ ଭଳି ଆକ୍ରମଣ ଯୋଜନା କରିଥିଲେ। ବର୍ତ୍ତମାନ, ଦିଲ୍ଲୀ ପୋଲିସର ସ୍ୱତନ୍ତ୍ର ସେଲ୍ ଟିମ୍ ଉଭୟ ସନ୍ଦିଗ୍ଧ ଆତଙ୍କବାଦୀଙ୍କୁ ସେମାନଙ୍କ ଉଦ୍ଦେଶ୍ୟ ଏବଂ ଯୋଜନା ବିଷୟରେ ସୂଚନା ପାଇବା ପାଇଁ ପଚରାଉଚରା କରୁଛି।
ମିଳିଛି ଅନେକ ଆପତ୍ତିଜନକ ସାମଗ୍ରୀ:
ଏହି ଅପରେସନ ସମୟରେ, ଦୁଇ ଜଣଙ୍କଠାରୁ ଅନେକ ଦେଶ ବିରୋଧୀ ଜିନିଷ ମିଳିଥିଲା। ଏଥିରେ ଭିଡିଓ ଏବଂ ଆଇଏସ୍ଆଇଏସ୍ ପତାକା ମଧ୍ୟ ଥିଲା। ଲାପଟପ୍, ଡାଟା, ଘଣ୍ଟା ଏବଂ ପେନ୍ ଡ୍ରାଇଭ୍ ମଧ୍ୟ ଜବତ କରାଯାଇଥିଲା। ଏଗୁଡ଼ିକୁ ଆଇଇଡି ନିର୍ମାଣ ଷଡ଼ଯନ୍ତ୍ର ପାଇଁ ବ୍ୟବହାର କରାଯାଇଥିଲା। ରିପୋର୍ଟ ଅନୁଯାୟୀ, ଦୁଇ ସନ୍ଦିଗ୍ଧ ଆତଙ୍କବାଦୀ ଅନେକ ସ୍ଥାନରେ ରେକି କରିଥିଲେ ଏବଂ କିଛି ଫଟୋ ମଧ୍ୟ ଜବତ କରାଯାଇଥିଲା। ଅଦନାନଙ୍କ ବାପା ଜଣେ ସରକାରୀ କର୍ମଚାରୀ। ଅନ୍ୟ ଜଣେ ଅଦନାନ, ସିଏ କୋର୍ସ କରୁଥିଲା। ସେମାନେ ଦକ୍ଷିଣ ଦିଲ୍ଲୀର ଏକ ମଲ୍ରେ ରେକି ମଧ୍ୟ କରିଥିଲେ। ପ୍ରଚାର ପ୍ରସାର ପାଇଁ ଏକାଧିକ ଲୋକ ଗୋଟିଏ ଇନଷ୍ଟାଗ୍ରାମ ଆଇଡି ବ୍ୟବହାର କରୁଥିଲେ। ସେମାନଙ୍କର ଜଣେ ବିଦେଶୀ ହ୍ୟାଣ୍ଡଲରଙ୍କ ସହ ମଧ୍ୟ ସମ୍ପର୍କ ଥିଲା, ଯାହାକୁ ସେମାନେ ସେମାନଙ୍କର ସୁପରଭାଇଜର ବୋଲି କହୁଥିଲେ। ସେମାନେ ଏହି ଗ୍ରୁପରେ କିଛି ମାସ ଧରି କାମ କରୁଥିଲେ। ସେପ୍ଟେମ୍ବର ପୂର୍ବରୁ, ସ୍ପେଶାଲ୍ ସେଲ୍ ଏକ ପ୍ରମୁଖ ଆତଙ୍କବାଦୀ ମଡ୍ୟୁଲ୍ର ପର୍ଦ୍ଦାଫାସ୍ କରିଥିଲା, ବିଭିନ୍ନ ରାଜ୍ୟରୁ ପାଞ୍ଚ ଜଣ ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରିଥିଲା। ଗିରଫ ହୋଇଥିବା ସମସ୍ତ ସନ୍ଦିଗ୍ଧଙ୍କ ବୟସ ୨୦ ରୁ ୨୬ ବର୍ଷ ମଧ୍ୟରେ ଥିଲା ଏବଂ ସେମାନଙ୍କୁ ଦିଲ୍ଲୀ, ଝାଡ଼ଖଣ୍ଡ, ତେଲେଙ୍ଗାନା ଏବଂ ମଧ୍ୟପ୍ରଦେଶରୁ ଗିରଫ କରାଯାଇଥିଲା।
ଗିରଫ ଅଭିଯୁକ୍ତମାନେ ହେଲେ ଝାଡ଼ଖଣ୍ଡର ବୋକରୋ ନିବାସୀ ଅଶର ଦାନିଶ (୨୩), ମୁମ୍ବାଇର ଆଫତାବ୍ କୁରେଶି (୨୫), ମହାରାଷ୍ଟ୍ରର ମୁମ୍ବ୍ରା ନିବାସୀ ସୁଫିଆନ ଅବୁବକର ଖାନ (୨୦), ତେଲେଙ୍ଗାନାର ନିଜାମବାଦର ବାସିନ୍ଦା ମହମ୍ମଦ ହୁଜାଇଫ ୟମାନ (୨୦) ଏବଂ ରାଜସ୍ଥାନର କାମରନ କୁରେଶୀ (୨୬) ବୋଲି ଜଣାପଡ଼ିଛି। ପୋଲିସର କହିବା ଅନୁଯାୟୀ, ଏହି ନେଟୱାର୍କର ମାଷ୍ଟରମାଇଣ୍ଡ ଅଶର ଦାନିଶ ଥିଲା, ଯିଏ ନିଜକୁ "ଗଜୱା ନେତା" ଏବଂ "ସିଇଓ" ବୋଲି କହୁଥିଲା। ଆଫତାବ କୁରେଶୀ ଆତଙ୍କବାଦୀ କାର୍ଯ୍ୟକଳାପ ପାଇଁ ଲକ୍ଷ୍ୟ ଚିହ୍ନଟ କରିବା ପାଇଁ କାମ କରୁଥିଲା। ସେହିପରି ହୁଜୈଫ ୟମନ ଅସ୍ତ୍ରଶସ୍ତ୍ର ନିର୍ମାଣ ପାଇଁ କାମ କରୁଥିଲା। ସେମାନେ ସେମାନଙ୍କର ଗୋଷ୍ଠୀର ନାମ "ପ୍ରୋଜେକ୍ଟ ମୁସ୍ତଫା" ରଖିଥିଲେ।
ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତମାନେ ଯୁବକମାନଙ୍କୁ ପ୍ରଲୋଭିତ କରିବା ପାଇଁ ଏନକ୍ରିପ୍ଟେଡ୍ ସୋସିଆଲ ମିଡିଆ ପ୍ଲାଟଫର୍ମ ବ୍ୟବହାର କରୁଥିଲେ। ସେମାନେ ନିଜକୁ ଏନଜିଓ ବୋଲି ପରିଚୟ ଦେଉଥିଲେ ଏବଂ ଧର୍ମ ନାଁରେ ଯୁବକମାନଙ୍କୁ ଚରମପନ୍ଥି ଭାବେ ଗଢ଼ିବା କାମ କରୁଥିଲେ। ପୋଲିସର କହିବା ଅନୁଯାୟୀ, ଏହି ଗୋଷ୍ଠୀ ଏପରି ସ୍ଥାନ ଖୋଜୁଥିଲା ଯେଉଁଠାରେ ସେମାନେ ଜମି କିଣିପାରିବେ ଏବଂ ସେମାନଙ୍କର କାର୍ଯ୍ୟକଳାପ ପାଇଁ ଗୋଟିଏ କେନ୍ଦ୍ର ସ୍ଥାପନ କରିପାରିବେ। ସେମାନେ ଅସ୍ତ୍ରଶସ୍ତ୍ର ତିଆରି ପାଇଁ ଟଙ୍କା ମଧ୍ୟ ସଂଗ୍ରହ କରୁଥିଲେ।
