ଭୁବନେଶ୍ୱର,୦୨/୧୦: ଆଜି ପବିତ୍ର ବିଜୟା ଦଶମୀ। ଶୁକ୍ରବାର ମେଲାଣି ନେବେ ମା' ଜଗତଜନନୀ। ମୂର୍ତ୍ତି ବିସର୍ଜନ ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ୪ଟି ଅସ୍ଥାୟୀ ପୋଖରୀ କରାଯାଇଛି । ଏହି ସବୁ ଅସ୍ଥାୟୀ ପୋଖରୀରେ ମା’ଙ୍କୁ ମେଲାଣି ଦିଆଯିବ ।
ରାଜଧାନୀ ଉପକଣ୍ଠ କୁଆଖାଇ ନଦୀକୂଳରେ ୨ଟି ଏବଂ ଟଙ୍କପାଣି ବାସୁଆଘାଇ ଓ ଦୟାନଦୀ କୂଳେ ଗୋଟିଏ ଲେଖାଏଁ ଅସ୍ଥାୟୀ ପୋଖରୀ ନିର୍ମାଣ ହୋଇଛି । ନଦୀ ପ୍ରଦୂଷଣ ରୋକିବା ପାଇଁ ଓଡିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଏବଂ ଏନ୍ଜିଟିର ନିର୍ଦ୍ଦେଶ କ୍ରମେ ଏହି ଅସ୍ଥାୟୀ ପୋଖରୀ ନିର୍ମାଣ କରିଛି ବିଏମ୍ସି । କୁଆଖାଇର ପାଣ୍ଡରା ଆଡ଼କୁ ଗୋଟିଏ ପୋଖରୀ କରାଯାଇଥିବା ବେଳେ ଆଉ ଗୋଟିଏ ପୋଖରୀ ହଂସପାଳ ଦିଗରେ କରାଯାଇଛି । ପାଣ୍ଡରା ପାଶ୍ୱର୍ର ପୋଖରୀର ୫୭ ମିଟର ଦୀର୍ଘ ୩୦ ମିଟର ପ୍ରଶସ୍ତ ହୋଇ ଏହା ୫ ମିଟର ଗଭୀର ରହିଛି । ହଂସପାଳପାଶ୍ୱର୍ର ପୋଖରୀର ୨୫ ମିଟର ଦୀର୍ଘ ୨୦ ମିଟର ପ୍ରଶସ୍ତ ରହି ଗଭୀରତା ୫ମିଟର ରହିଛି । ଦୟାନଦୀ ବ୍ରିଜ୍ ପାଖରେ ହୋଇଥିବା ଜଳାଶୟର ଦୈର୍ଘ୍ୟ ୨୦ମିଟର, ପ୍ରସ୍ତ ୫ମିଟର ଏବଂ ଗଭୀରତା ୫ମିଟର ରହିଛି । କୁଆଖାଇର ଦୁଇପାଶ୍ୱର୍ରେ ଥିବା ପୋଖରୀ ପାଇଁ ୨ଟି ହାଇଡ୍ରୋଲିକ୍ କ୍ରେନ୍ ଏବଂ ଜେସିବି ରଖାଯାଇଛି । ଠିକ ସେହିପରି ଦୟାନଦୀର ପାଖରେ ହୋଇଥିବା ପୋଖରୀ ଗୁଡିକ ପାଇଁ ଜେସିବି ରଖାଯାଇଛି । ଏହାସହ ୧୦ ହର୍ସପାୱାର (ଏଚପି)ର ପାଣି ପମ୍ପ୍ ମଧ୍ୟ ରଖାଯାଇଛି । କୁଆଖାଇ ପଠାରେ ହୋଇଥିବା ଜଳାଶୟରେ ୧୧୦ଟି ମୂର୍ତ୍ତି ବିସର୍ଜନ ହେବାକୁ ଆକଳନ କରାଯାଇଛି । ଦୟାନଦୀ ଏବଂ ଟଙ୍କପାଣି ଠାରେ ରେ ହୋଇଥିବା ଅସ୍ଥାୟୀ ଜଳାଶୟରେ ୮୦ଟି ମୂର୍ତ୍ତି ବିସର୍ଜନ ହେବାର ଆକଳନ କରାଯାଇଛି । ଦୁର୍ଗାପୂଜାରୁ କାଳୀପୂଜା ପର୍ଯ୍ୟନ୍ତ ଏହି ଅସ୍ଥାୟୀ ପୋଖରୀ ରହିବ ।
ଅସ୍ଥାୟୀ ପୋଖରୀ ଗୁଡିକରେ ବିଏମସିର ସାନିଟେସନ ୱିଙ୍ଗର ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ଭସାଣି କାର୍ଯ୍ୟରୁ ନିର୍ଗତ ବର୍ଜ୍ୟକୁ ନେବା ସହିତ କିପରି ଆଗାମୀ ପୂଜା ଗୁଡିକରେ ସ୍ଥାନ ଗୁଡିକ ପରିଷ୍କାର ରହିବ ସେଥିପ୍ରତି ଦୃଷ୍ଟି ଦିଆଯାଉଛି ।
