ନୂଆଦିଲ୍ଲୀ: ସୋମବାର ଦିନ ଇରାକର ପ୍ରଧାନମନ୍ତ୍ରୀ ଆମେରିକୀୟ ସୈନ୍ୟଙ୍କ ଏକ ଛୋଟ ଦଳ ବର୍ତ୍ତମାନ ପାଇଁ ଇରାକରେ ରହିବ ବୋଲି ଘୋଷଣା କରିଛନ୍ତି। ସିରିଆରେ ଆତଙ୍କୀ ସଂଗଠନ ISISର ବୃଦ୍ଧି ପାଉଥିବା ପ୍ରଭାବକୁ ଏହାର କାରଣ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି। ଇରାକରେ ନିୟୋଜିତ ଆମେରିକୀୟ ସୈନ୍ୟମାନେ ସିରିଆରେ ISIS ସହିତ ଲଢ଼ୁଥିବା ଆମେରିକୀୟ ସୈନ୍ୟଙ୍କ ସହିତ ସମନ୍ୱୟ ରକ୍ଷା କରି ରହିବେ ବୋଲି ସେ ସୂଚନା ପ୍ରଦାନ କରିଛନ୍ତି।
ସୂଚନା ମୁତାବକ, ଆମେରିକା ଏବଂ ଇରାକ ଗତ ବର୍ଷ ଏକ ଚୁକ୍ତି ସ୍ୱାକ୍ଷରିତ କରିଥିଲେ। ଯେଉଁଥିରେ ଚଳିତ ବର୍ଷ ସେପ୍ଟେମ୍ବର ସୁଦ୍ଧା ISIS ସହିତ ଲଢ଼ୁଥିବା ଆମେରିକା ନେତୃତ୍ୱାଧୀନ ମେଣ୍ଟକୁ ଭାଙ୍ଗି ଦିଆଯିବ ଏବଂ ବାଗଦାଦରୁ ସମସ୍ତ ଆମେରିକୀୟ ସୈନ୍ୟ ପ୍ରତ୍ୟାହାର କରାଯିବ ବୋଲି ଚୁକ୍ତି ରହିଥିଲା। ତେବେ, ଇରାକୀ ପ୍ରଧାନମନ୍ତ୍ରୀ ମହମ୍ମଦ ସିଆ ଅଲ-ସୁଦାନି ଏବେ କହିଛନ୍ତି ଯେ ଆମେରିକୀୟ ସୈନ୍ୟଙ୍କ ଏକ ଛୋଟ ଦଳ ବର୍ତ୍ତମାନ ପାଇଁ ଇରାକରେ ରହିବ। ଏହି ଆମେରିକୀୟ ସୈନ୍ୟମାନଙ୍କୁ ପଶ୍ଚିମ ଇରାକର ଆଇନ ଅଲ-ଆସାଦ ବାୟୁ ସେନା ଘାଟି ସଂଲଗ୍ନ ଏକ ଘାଟି ଏବଂ ଉତ୍ତର ଇରାକର ଅଲ-ହରିର ବାୟୁ ସେନା ଘାଟିରେ ମୁତୟନ କରାଯିବ ବୋଲି ସୂଚନା ମିଳିଛି।
ସେ କହିଛନ୍ତି ଯେ ଚୁକ୍ତିନାମାରେ ପ୍ରଥମେ ସେପ୍ଟେମ୍ବର ସୁଦ୍ଧା ଆଇନ ଅଲ-ଆସଦରୁ ଆମେରିକୀୟ ସୈନ୍ୟଙ୍କୁ ସମ୍ପୂର୍ଣ୍ଣ ପ୍ରତ୍ୟାହାର କରିବାକୁ କୁହାଯାଇଥିଲା। କିନ୍ତୁ ସିରିଆରେ ଘଟୁଥିବା ଘଟଣା ଯୋଗୁଁ ଘାଟିରେ ୨୫୦ ରୁ ୩୫୦ ପରାମର୍ଶଦାତା ଏବଂ ସୁରକ୍ଷା କର୍ମୀଙ୍କ ଏକ ଛୋଟ ୟୁନିଟ୍ ବଜାୟ ରଖିବା ଆବଶ୍ୟକ ହୋଇପଡ଼ିଛି।
