ନୂଆଦିଲ୍ଲୀ,୧୫/୧୦: ଦୁଇ ପଡ଼ୋଶୀ ଦେଶ, ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ପରିସ୍ଥିତି କ୍ରମଶଃ ଉତ୍ତେଜନାପୂର୍ଣ୍ଣ ହେବାରେ ଲାଗିଛି। ପାକିସ୍ତାନ ଏବଂ ଆଫଗାନିସ୍ତାନ ସୀମାରେ ଯୁଦ୍ଧ ଭଳି ପରିସ୍ଥିତି ସୃଷ୍ଟି ହୋଇଛି ଏବଂ ଚାରି ଜଣ ପ୍ରମୁଖ ବ୍ୟକ୍ତିଙ୍କ ଭୂମିକା ଦେଶ ପାଇଁ ଏକ ଗମ୍ଭୀର ଚ୍ୟାଲେଞ୍ଜ ସୃଷ୍ଟି କରୁଛି। ଏହି ଚାରି ଜଣ ବ୍ୟକ୍ତି: ନୁର ୱାଲି ମେହସୁଦ, ହାଫିଜ୍ ସାଦ ରିଜଭି, ହିବାତୁଲ୍ଲା ଅଖୁନ୍ଦଜାଦା ଏବଂ ଇମ୍ରାନ ଖାନ। ଏମାନେ ସମସ୍ତେ ବିଭିନ୍ନ ମୋର୍ଚ୍ଚାରେ ପାକିସ୍ତାନର ଶେହବାଜ ସରକାରଙ୍କ ପାଇଁ ସମସ୍ୟା ପାଲଟିଛନ୍ତି। ଆସନ୍ତୁ ଏହି ଚାରି ଜଣଙ୍କ ପ୍ରମୂଖ ଆଭିମୁଖ୍ୟ ବିଷୟରେ ଜାଣିବା...
୧. ନୁର୍ ଓ୍ବାଲି ମେହସୁଦ:
ତେହରିକ-ଏ-ତାଲିବାନ ପାକିସ୍ତାନ (ଟିଟିପି) ମୁଖ୍ୟ ମୁଫତି ନୁର ୱାଲି ମେହସୁଦ ପାକିସ୍ତାନ ପାଇଁ ଆତଙ୍କବାଦୀ ବିପଦ ସୃଷ୍ଟି କରିଛନ୍ତି। ପାକିସ୍ତାନ ବର୍ତ୍ତମାନ ଏକ ବିମାନ ଆକ୍ରମଣରେ କାବୁଲରେ ଟିଟିପି ଶିବିରଗୁଡ଼ିକୁ ଧ୍ୱଂସ କରିଥିବା ଦାବି କରିଛି ଏବଂ ମେହସୁଦ ନିହତ ହୋଇଥିବା ରିପୋର୍ଟ ପ୍ରକାଶ ପାଇଛି। ତଥାପି, ଆଫଗାନ ତାଲିବାନ ଏହି ଦାବିକୁ ଅସ୍ୱୀକାର କରିଛି। ମୁଫତି ନୁର ୱାଲି ୨୦୦୩ ମସିହାରୁ ଟିଟିପିରେ ସାମିଲ ଅଛନ୍ତି ଏବଂ ମୁଲ୍ଲା ଫଜଲୁଲ୍ଲାଙ୍କ ମୃତ୍ୟୁ ପରେ ଏହି ଗୋଷ୍ଠୀର ନେତା ହୋଇଛନ୍ତି। ଦକ୍ଷିଣ ୱାଜିରିସ୍ତାନରେ ଜନ୍ମଗ୍ରହଣ କରି ସେ ନିଜର ଧାର୍ମିକ ଜ୍ଞାନକୁ ଜିହାଦରେ ପରିଣତ କରିଥିଲେ। ସେ ଅନେକ ଟିଟିପି ଆକ୍ରମଣ ଏବଂ ଆତଙ୍କବାଦୀ କାର୍ଯ୍ୟକଳାପରେ ଜଡ଼ିତ ଅଛନ୍ତି। ତାଙ୍କ ପ୍ରଭାବରୁ ପାକିସ୍ତାନ ପାଇଁ ସବୁଠାରୁ ବଡ଼ ବିପଦ ହେଉଛି ସୀମାନ୍ତ ଅଞ୍ଚଳରେ ପାକିସ୍ତାନୀ ପୋଷ୍ଟଗୁଡ଼ିକୁ ଆକ୍ରମଣ କରିବାରେ ତାଙ୍କର କ୍ଷମତା।
୨. ହିବତୁଲ୍ଲାହ ଅଖୁନ୍ଦରାଜା:
ସୀମାରେ ପାକିସ୍ତାନ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ହେଉଛି ତାଲିବାନର ସର୍ବୋଚ୍ଚ ନେତା ହିବତୁଲ୍ଲା ଆଖୁନ୍ଦଜାଦା। ସେ ଆମିର ଅଲ-ମୁ'ମିନିନ୍ ଭାବରେ ଜଣାଶୁଣା ଏବଂ ଆଫଗାନିସ୍ତାନରୁ ପାକିସ୍ତାନରେ ଆତଙ୍କବାଦୀମାନଙ୍କୁ ଆଶ୍ରୟ ଦେବାର ଅଭିଯୋଗ ତାଙ୍କ ଉପରେ ରହିଛି। ତାଙ୍କ ନିର୍ଦ୍ଦେଶରେ, ଟିଟିପି ଏବଂ ଅନ୍ୟାନ୍ୟ ଗୋଷ୍ଠୀ ସକ୍ରିୟ ରହି ପାକିସ୍ତାନ-ଆଫଗାନିସ୍ତାନ ସୀମାରେ ନିରନ୍ତର ଉତ୍ତେଜନା ସୃଷ୍ଟି କରୁଛନ୍ତି, ଯାହା ପାକିସ୍ତାନର ରଣନୈତିକ ସମସ୍ୟାକୁ ଆହୁରି ତୀବ୍ର କରୁଛି।
୩. ହାଫିଜ ସାଦ ରିଜବି:
ପାକିସ୍ତାନର ଆଭ୍ୟନ୍ତରୀଣ ରାଜନୀତିରେ, ତେହେରିକ୍-ଏ-ଲବୈକ୍ର ମୁଖ୍ୟ ହାଫିଜ୍ ସାଦ୍ ରିଜଭି ସରକାରଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ପାଲଟିଛନ୍ତି। ଟ୍ରମ୍ପଙ୍କ ଗାଜା ଶାନ୍ତି ଯୋଜନାକୁ ବିରୋଧ କରିବା ପାଇଁ ତାଙ୍କ ଦଳ ପଞ୍ଜାବ, ଲାହୋର ଏବଂ ଇସଲାମାବାଦରେ ବିଶାଳ ପ୍ରତିବାଦ ଆୟୋଜନ କରିଥିଲା। ଏପର୍ଯ୍ୟନ୍ତ ପ୍ରତିବାଦରେ ଶହ ଶହ ଲୋକ ପ୍ରାଣ ହରାଇଛନ୍ତି ଏବଂ ହଜାର ହଜାର ଲୋକ ଆହତ ହୋଇଛନ୍ତି। ରିଜଭି ନିଜେ ଆହତ ହୋଇଛନ୍ତି, କିନ୍ତୁ ତାଙ୍କର ପ୍ରଭାବ ଗୁରୁତ୍ୱପୂର୍ଣ୍ଣ ରହିଛି। ତାଙ୍କର ପ୍ରତିବାଦ ଏବଂ ହିଂସାତ୍ମକ ପ୍ରଦର୍ଶନ ପାକିସ୍ତାନର ଆଭ୍ୟନ୍ତରୀଣ ବ୍ୟାପାରରେ ଅଶାନ୍ତିକୁ ବୃଦ୍ଧି କରୁଛି।
୪. ଇମରାନ୍ ଖାନ୍:
ଜେଲରେ ଥିବା ସତ୍ତ୍ୱେ, ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଏବଂ ପିଟିଆଇ ମୁଖ୍ୟ ଇମ୍ରାନ ଖାନ ଦେଶର ରାଜନୀତିରେ ସକ୍ରିୟ ଅଛନ୍ତି। ସେ ଗଣତାନ୍ତ୍ରିକ ସରକାରଙ୍କୁ ଚ୍ୟାଲେଞ୍ଜ କରୁଛନ୍ତି ଏବଂ ଦଳ ଓ ରାଜନୈତିକ ନିଷ୍ପତ୍ତି ଉପରେ ନିୟନ୍ତ୍ରଣ ବଜାୟ ରଖିଛନ୍ତି। କେପିର ମୁଖ୍ୟମନ୍ତ୍ରୀ ପରିବର୍ତ୍ତନ ଏବଂ ତାଙ୍କ ନିର୍ଦ୍ଦେଶରେ ଦଳ ଭିତରେ ପରବର୍ତ୍ତୀ ନିଷ୍ପତ୍ତି ପାକିସ୍ତାନରେ ରାଜନୈତିକ ଅସ୍ଥିରତାକୁ ପ୍ରତିଫଳିତ କରୁଛି।
