ନୂଆଦିଲ୍ଲୀ,୦୧/୩:ଦିଲ୍ଲୀ ବିଧାନସଭା ନିର୍ବାଚନରେ ଆମ ଆଦମୀ ପାର୍ଟି ଏକ ବଡ଼ ପରାଜୟର ସାମ୍ନା କରିଛି। ଯାହାର ପ୍ରଭାବ ଅନ୍ୟ ରାଜ୍ୟରେ ମଧ୍ୟ ଦେଖିବାକୁ ମିଳୁଛି। ମଧ୍ୟପ୍ରଦେଶ ରାଜଧାନୀ ଭୋପାଳରେ ଥିବା ଆପ ପାର୍ଟି କାର୍ଯ୍ୟାଳୟରେ ତାଲା ପକାଇ ଦିଆଯାଇଛି। ଏହି ମାମଲାଟି ଭଡା ସହିତ ଜଡିତ ବୋଲି କୁହାଯାଉଛି।

ତେବେ ମଧ୍ୟପ୍ରଦେଶର ରାଜଧାନୀ ଭୋପାଳର ସୁଭାଷ ନଗରରେ ଅବସ୍ଥିତ ଏହି ଆମ ଆଦମୀ ପାର୍ଟିର ରାଜ୍ୟ କାର୍ଯ୍ୟାଳୟ । ଯେଉଁଠାରେ ଅନେକ ଦିନ ଧରି ଆପର ରାଜନୀତି ଚାଲିଥିଲା। ଏବେ ଘରମାଲିକ ଭଡା ନ ଦେବାରୁ ଅଫିସ ଗେଟରେ ତାଲା ପକାଇ ଦେଇଥିବା ସୂଚନା ମିଳିଛି। କୁହାଯାଉଛି ଯେ ଆପ ପାର୍ଟି ଗତ ୪ ମାସ ଧରି ଅଫିସ ଭଡା ଦେଇନାହିଁ। ଏନେଇ ଘର ମାଲିକ  ବିବେକ ଗଙ୍ଗଲାନି କହିଛନ୍ତି ଯେ,ଦଳୀୟ କାର୍ଯ୍ୟାଳୟରେ ଚାଲିଥିବା କାର୍ଯ୍ୟକଳାପ ଉପରେ ଆପତ୍ତି ରହିଛି। ଦଳୀୟ କାର୍ଯ୍ୟାଳୟରେ ମଦ ପ୍ୟାକେଟ ଏବଂ ଅନ୍ୟାନ୍ୟ କାର୍ଯ୍ୟକଳାପ ଉପରେ ଘରମାଲିକ ଅସନ୍ତୋଷ ପ୍ରକାଶ କରିଛନ୍ତି। ଘର ଖାଲି କରିବା ପାଇଁ କହିବାରୁ ଆମ ଆଦମୀ ପାର୍ଟିର ଲୋକମାନେ ତାଙ୍କୁ ଧମକ ମଧ୍ୟ ଦେଇଥିବା ସେ କହିଛନ୍ତି । 

ମଧ୍ୟପ୍ରଦେଶର ସିଙ୍ଗରୌଲିର ମେୟର ରାଣୀ ଅଗ୍ରୱାଲ ଆମ ଆଦମୀ ପାର୍ଟିର ରାଜ୍ୟ ଅଧ୍ୟକ୍ଷ। ସେ  AAP ଟିକେଟରେ ମେୟର ନିର୍ବାଚନରେ ବିଜୟୀ ହୋଇ ଥିଲେ। ଗଣମାଧ୍ୟମ ସହ କଥାବାର୍ତ୍ତା ସମୟରେ ସେ କହିଛନ୍ତି ଯେ,କିଛି ଭୁଲ ବୁଝାମଣା ଯୋଗୁଁ ଏହା ଘଟୁଛି। ମୁଁ ୫ ତାରିଖରେ ସେଠାରେ ଏକ ବୈଠକ କରିବି ଏବଂ ଗଣମାଧ୍ୟମ ସହ ମଧ୍ୟ କଥା ହେବି। ଯଦିଓ ଦଳର ଅନ୍ୟ ପଦାଧିକାରୀମାନେ ମଧ୍ୟ ବର୍ତ୍ତମାନ କୌଣସି ସୂଚନା ଦେବାକୁ ମନା କରିଦେଇଛନ୍ତି। ନିକଟରେ ବିଧାନସଭା ନିର୍ବାଚନରେ ଆମ ଆଦମୀ ପାର୍ଟିର ଅନେକ ବଡ଼ ନେତାଙ୍କୁ ଶୋଚନୀୟ ପରାଜୟର ସାମ୍ନା କରିବାକୁ ପଡିଛି।