ତାଙ୍କର ମାନସିକ ଅବସ୍ଥା ଠିକ୍ ନଥିଲା, ସେ ମେଡିସିନ୍ ଖାଉଥିଲେ: ଅଭିଯୁକ୍ତ ASIଙ୍କ ପତ୍ନୀ
ବ୍ରହ୍ମପୁର ୨୯/ ୦୧: ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କୁ ଗୁଳିମାଡ ଘଟଣାରେ ଗୋଟିଏ ପରେ ଗୋଟିଏ ଖୁଲାସା ହେବାରେ ଲାଗିଛି । ମନ୍ତ୍ରୀଙ୍କୁ ଆକ୍ରମଣ କରିଥିବା ମୁଖ୍ୟ ଅଭିଯୁକ୍ତ ASI ଗୋପାଳକ୍ରିଷ୍ଣା ଦାସଙ୍କୁ ପୋଲିସ ଅଟକ ରଖିଛି । ସେ କାହିଁକି ଗୁଳି ମାରିଲେ ପୋଲିସ ତଦନ୍ତ କରୁଛି । ASI ଗୋପାଳକ୍ରିଷ୍ଣା ଦାସ ବ୍ରହ୍ମପୁର ଆଙ୍କୁଲି ଅଞ୍ଚଳର ବାସିନ୍ଦା । ଗୁଳିମାଡର ପ୍ରକୃତ କାରଣ ଜଣାପଡିନଥିବା ବେଳେ ପ୍ରତିକ୍ରିୟା ରଖିଛନ୍ତି ଅଭିଯୁକ୍ତ ଗୋପାଳକ୍ରିଷ୍ଣା ଦାସ ପତ୍ନୀ ।
ASI ଗୋପାଳକ୍ରିଷ୍ଣା ଦାସ ଜଣେ ମାନସିକ ରୋଗୀ ଥିଲେ । ଗତ ୭/ ୮ ବର୍ଷ ହେଲା ସେ ଚିକିତ୍ସିତ ହେଉଥିଲେ ଏବଂ ଡାକ୍ତରଙ୍କ ପରାମର୍ଶ କ୍ରମେ ଔଷଧ ଖାଉଥିଲେ ବୋଲି ତାଙ୍କ ପତ୍ନୀ ଜୟନ୍ତୀ ଦାସ ଗଣମାଧ୍ୟମ ସାମ୍ନାରେ ସ୍ବୀକାର କରିଛନ୍ତି । ଗୋପାଳଙ୍କ ପତ୍ନୀ କହିଛନ୍ତି, ‘ବିଭିନ୍ନ ନ୍ୟୁଜ୍ ଚ୍ୟାନେଲରୁ ଏହି ଖବର ଶୁଣି ମୁଁ ହତଚକିତ । ପ୍ରକୃତରେ କ’ଣ ହୋଇଛି ମୁଁ ବି ଜାଣିପାରୁନି । ଆଜି ମୁଁ ତାଙ୍କ ସହିତ କଥା ହୋଇପାରିନ । ଦିନ ୧୧ଟା କି ୧୨ଟା ବେଳେ ସେ ଝିଅକୁ ଭିଡିଓ କଲ୍ କରି କଥା ହୋଇଥିଲେ । ଆଗରୁ ତାଙ୍କର ଏଭଳି କୌଣସି ସମସ୍ୟା ନଥିଲା । ତେବେ ମାନସିକ ଅବସ୍ଥା ଭଲ ନଥିଲା । ସେଥିପାଇଁ ‘ଦ ମାଇଣ୍ଡ’ରେ ଗତ ୭/ ୮ ବର୍ଷ ହେବ ଚିକିତ୍ସିତ ହେଉଥିଲେ । ଔଷଧ ଖାଇ ସାଧାରଣ ଭାବେ ଡ୍ୟୁଟି କରୁଥିଲେ । ସ୍ବାଭାବିକ ଭାବେ ଡ୍ୟୁଟି କରୁଥିଲେ । କାହା ସହି ମାଡ୍ ପିଟ୍ କରୁନଥିଲେ । ବେଶ୍ ସ୍ବାଭାବିକ ଥିଲେ । ମନ୍ତ୍ରୀଙ୍କ ସହିତ କୌଣସି ଶତ୍ରୁତା ବାବଦରେ ମୁଁ ଜାଣିନାହିଁ’।
ଏ ଖବର ଶୁଣି ମୋ ପିଲାମାନେ ମଧ୍ୟ ଚିନ୍ତିତ ଥିବା କହିଛନ୍ତି ଗୋପାଳ ଦାସଙ୍କ ପତ୍ନୀ ଜୟନ୍ତୀ ଦାସ । ଉଲ୍ଲେଖନୀୟ ଯେ, ଗୋପାଳ ଦାସ ୨୦୧୪ରେ ପଦୋନ୍ନତି ପାଇବା ପରେ ଏଏସଆଇ ଭାବେ ଝାରସୁଗୁଡାକୁ ବଦଳି ହୋଇଥିଲେ । ପୂର୍ବରୁ ସେ ମନ୍ତ୍ରୀ ନବ ଦାସଙ୍କ ବ୍ୟକ୍ତିଗତ ସୁରକ୍ଷା କର୍ମୀ ଭାବେ ମଧ୍ୟ କାର୍ଯ୍ୟ କରୁଥିଲେ ବୋଲି ଜଣାପଡିଛି ।
