ବ୍ରହ୍ମପୁର,୨୮/୧୦: ପୀତବାସ ପଣ୍ଡା ହତ୍ୟା ମାମଲାରେ ଗିରଫ ହୋଇ ଗତ ୨୨ ତାରିଖରୁ ବ୍ରହ୍ମପୁର ଜେଲ୍ରେ ଅଛନ୍ତି ବ୍ରହ୍ମପୁର ପୂର୍ବତନ ମେୟର ତଥା ସ୍ୱାଧୀନ ବିଧାୟକ ପ୍ରାର୍ଥୀ ଶିବ ଶଙ୍କର ଦାଶ (ପିଣ୍ଟୁ) । ବ୍ରହ୍ମପୁର ଜେଲ୍ରେ ତାଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ ତାଙ୍କୁ ସ୍ଥାନାନ୍ତର କରିବାକୁ ବ୍ରହ୍ମପୁର ଏସ୍ଡିଜେଏମ୍ କୋର୍ଟରେ ଆବେଦନ କରାଯାଇଥିଲା । ବ୍ରହ୍ମପୁର ଜେଲ୍ ଅଧୀକ୍ଷକଙ୍କ ଆବେଦନକୁ କୋର୍ଟ ଗ୍ରହଣ କରି ଫୁଲବାଣୀ ଜେଲ୍କୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଥିଲେ । ସୋମବାର ପିଣ୍ଟୁଙ୍କୁ ଫୁଲବାଣୀ ଜେଲ୍କୁ ସ୍ଥାନାନ୍ତର ଯୋଜନା ରହିଥିଲା । କିନ୍ତୁ ଏହି ନିର୍ଦ୍ଦେଶରେ ପିଣ୍ଟୁଙ୍କ ପରିବାରଲୋକ ଆପତ୍ତି ଉଠାଇ କୋର୍ଟରେ ପିଟିସନ୍ ଦାଖଲ କରିଥିଲେ । ପିଣ୍ଟୁ ଦାଶଙ୍କ ସ୍ତ୍ରୀ ଆଶା ଦାଶଙ୍କ ପିଟିସନ୍କୁ ଗ୍ରହଣ କରି ଫୁଲବାଣୀ ଜେଲ୍ ସ୍ଥାନାନ୍ତର ନିର୍ଦ୍ଦେଶକୁ ସ୍ଥଗିତ ରଖାଯାଇଛି ।
ଗଞ୍ଜାମ ଜିଲ୍ଲାରେ ଥିବା ସ୍ୱତନ୍ତ୍ର ଜେଲ୍ ଗୁଡ଼ିକର ସ୍ଥିତି କ’ଣ ଅଛି ଏବଂ ସେଠାରେ ପିଣ୍ଟୁ ଦାଶଙ୍କ କେହି ବିରୋଧୀ ରହୁଛନ୍ତି ନା ନାହିଁ ରିପୋର୍ଟ ମାଗିଥିଲେ । ଭଞ୍ଜନଗର ଜେଲ୍ ମଧ୍ୟ ତାଙ୍କ ପାଇଁ ସୁରକ୍ଷିତ ନୁହେଁ ବୋଲି ରିପୋର୍ଟ ଆସିଥିବା ପିଣ୍ଟୁଙ୍କ ଓକିଲ ବରିଷ୍ଠ ଆଇନଜୀବୀ ଶିବନାରାୟଣ ସାହୁ କହିଛନ୍ତି । ଆସିକା ଜେଲ୍ରେ କ୍ଷମତାଠାରୁ ଅଧିକ ଅନ୍ତେବାସୀ ରହିଥିବା ବେଳେ ପିଣ୍ଟୁଙ୍କୁ ଏବେ କୋଉ ଜେଲ୍ରେ ରଖାଯିବ ବ୍ରହ୍ମପୁର ଜେଲ୍ କର୍ତ୍ତୃପକ୍ଷଙ୍କ ପାଇଁ ଚିନ୍ତା ବଢ଼ିଛି । ଏହି ପିଟିସନ୍ର ଶୁଣାଣି ହୋଇଥିଲା । ପିଣ୍ଟୁ ଦାଶଙ୍କୁ ବ୍ରହ୍ମପୁର ଜେଲ୍ରେ ହିଁ ସୁରକ୍ଷା ଭିତରେ ରଖିବାକୁ ତାଙ୍କ ଓକିଲ ଶିବ ନାରାୟଣ ସାହୁ କୋର୍ଟକୁ ନିବେଦନ କରିଛନ୍ତି । କୋର୍ଟ ନିର୍ଦ୍ଦେଶ ପରେ ହିଁ ପିଣ୍ଟୁଙ୍କୁ କୋଉଠି ରଖାଯିବ ତାହା ଜଣାପଡିବ ।
ପିଣ୍ଟୁଙ୍କ ଘନିଷ୍ଠ ଶାନ୍ତି ମିଶ୍ରଙ୍କୁ ହତ୍ୟା କରାଯାଇଥିଲା । ଏହି ମାମଲାର ଅଭିଯୁକ୍ତମାନଙ୍କୁ ଆଜୀବନ ଜେଲ୍ ଦଣ୍ଡାଦେଶ ହୋଇସାରିଥିବାବେଳେ ସେମାନେ ଏବେ ବ୍ରହ୍ମପୁର ଜେଲ୍ରେ ଅଛନ୍ତି । ୮ଜଣଙ୍କୁ ଜେଲ୍ ହୋଇଥିବା ବେଳେ ୫ଜଣ ଜାମିନ୍ରେ ମୁକୁଳିଛନ୍ତି । ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଥିବା ମଉଜ ମିଶ୍ର ଓ ଦୁଇଜଣ ସହଯୋଗୀ ବ୍ରହ୍ମପୁର ଜେଲ୍ରେ ଅଛନ୍ତି । ତେଣୁ ପିଣ୍ଟୁଙ୍କ ଜୀବନ ପ୍ରତି ସେଠାରେ ବିପଦ ରହିଥିବା ଦର୍ଶାଇ ବ୍ରହ୍ମପୁର ଜେଲ୍ ଅଧୀକ୍ଷକ ତାଙ୍କୁ ଅନ୍ୟ ଜେଲ୍କୁ ସ୍ଥାନାନ୍ତର କରିବାକୁ କୋର୍ଟକୁ ନିବେଦନ କରିଥିଲେ ।
ଅନ୍ୟ ପକ୍ଷରେ ପିଣ୍ଟୁଙ୍କୁ ଚିକିତ୍ସା ସେବା ମିଳୁନଥିବା ନେଇ ତାଙ୍କ ଓକିଲ ଶିବ ନାରାୟଣ ସାହୁ ଆଉ ଏକ ପିଟିସନ୍ କୋର୍ଟରେ ଦାଖଲ କରିଥିଲେ । ଏସ୍ଡିଜେଏମ୍ କୋର୍ଟ ଏହାର ଶୁଣାଣି କରି ପିଣ୍ଟୁ ଦାଶ ଯେତେବେଳେ ଚାହିଁବେ ତାଙ୍କୁ ଚିକିତ୍ସା ସେବା ଯୋଗାଇଦେବାକୁ ବ୍ରହ୍ମପୁର ଜେଲ୍କୁ ନିର୍ଦ୍ଦେଶ ଦେଇଛନ୍ତି । ସୂଚନାଯୋଗ୍ୟ ସେ ଅସୁସ୍ଥ ଥିବା କାରଣରୁ ଚିକିତ୍ସା ପାଇଁ ଜେଲ୍ରେ ଜଣାଇଥିଲେ । କିନ୍ତୁ ଜେଲ୍ରେ ଅବହେଳା କରାଯିବାରୁ ସେ କୋର୍ଟର ଦ୍ୱାରସ୍ଥ ହୋଇଥିଲେ ।
