ନୂଆଦିଲ୍ଲୀ: ଥାଇଲାଣ୍ଡର ଫୁକେଟରୁ ଦିଲ୍ଲୀକୁ ଆସୁଥିବା ଏୟାର ଇଣ୍ଡିଆ ଏକ୍ସପ୍ରେସ ବିମାନର ଯାତ୍ରୀମାନେ ସେଠାରେ ୮୦ ଘଣ୍ଟା ଧରି ଅଟକି ରହିଥିବା ଦାବି କରିଛନ୍ତି। ଯାତ୍ରୀମାନେ କହିଛନ୍ତି ଯେ, ବିମାନ ସେବା ଯାତ୍ରୀଙ୍କ ଜୀବନ ପ୍ରତି ବିପଦ ସୃଷ୍ଟି କରିଛି। ୧୬ ନଭେମ୍ବର ରାତିରେ ଏହି ଘଟଣା ଘଟିଥିଲା, ଯେତେବେଳେ କି ଏୟାର ଇଣ୍ଡିଆ ଏକ୍ସପ୍ରେସ ବିମାନ ଫୁକେଟରୁ ଦିଲ୍ଲୀ ଅଭିମୁଖେ ଯାତ୍ରା କରିବାକୁ ପ୍ରସ୍ତୁତ ହେଉଥିଲା। କିନ୍ତୁ ବୈଷୟିକ ତ୍ରୁଟି ଯୋଗୁଁ ବିମାନକୁ ୬ ଘଣ୍ଟା ବିଳମ୍ବ କରାଯାଇଥିଲା।ଏହି ସମୟ ମଧ୍ୟରେ ଯାତ୍ରୀ ମାନଙ୍କୁ କୌଣସି ସୁବିଧା ବିନା ବିମାନବନ୍ଦରରେ ରଖାଯାଇଥିଲା। ତା’ପରେ ଯାତ୍ରୀମାନେ ବିମାନରେ ଚଢିଥିଲେ, ମାତ୍ର ୧ ଘଣ୍ଟା ପରେ ବିମାନକୁ ବାତିଲ କରାଯାଇଥିଲା, ଆଉ ଯାତ୍ରୀ ମାନଙ୍କୁ ଓହ୍ଲାଇ ଦିଆଯାଇଥିଲା। ଏହି ସମୟ ମଧ୍ୟରେ ଶିଶୁଙ୍କ ସମେତ ସମସ୍ତ ଯାତ୍ରୀ ବହୁତ କଷ୍ଟରେ ରହିଥିଲେ ।
ଏହା ପରେ ପରଦିନ ( ୨୪ ଘଣ୍ଟା ପରେ) ବିମାନଟି ପୁଣି ଉଡ଼ାଣ ପାଇଁ ପ୍ରସ୍ତୁତ ହୋଇଥିଲା । ଯାତ୍ରୀ ମାନେ ସମାନ ବିମାନରେ ଚଢିଯାଇଥିଲେ । ମାତ୍ର ୨.୨୪ ଘଣ୍ଟା ଉଡ଼ାଣ ପରେ ବୈଷୟିକ ତ୍ରୁଟି ହେତୁ ଏହାକୁ ପୁଣି ଫୁକେଟରେ ଅବତରଣ କରାଗଲା । ଯାତ୍ରୀ ମାନେ ୮୦ ଘଣ୍ଟା ଧରି ଫୁକେଟରେ ଅଟକି ରହିଥିଲେ । ତେବେ ଏ ପର୍ଯ୍ୟନ୍ତ ଏୟାର ଇଣ୍ଡିଆ ତରଫରୁ ଏହି ଘଟଣାକୁ ନେଇ କୌଣସି ପ୍ରତିକ୍ରିୟା ଆସିନାହିଁ।
ଏହି ଘଟଣାକୁ ନେଇ ଜଣେ ଯାତ୍ରୀ ସୋସିଆଲ ମିଡିଆରେ ପୋଷ୍ଟ କରିଛନ୍ତି, ସେ ଲେଖିଛନ୍ତି ଯେ, ଏୟାର ଇଣ୍ଡିଆର ନୂଆଦିଲ୍ଲୀ ଅଭିମୁଖେ ଯାତ୍ରା କରୁଥିବା ୧୦୦ରୁ ଅଧିକ ଯାତ୍ରୀ ବୈଷୟିକ ତ୍ରୁଟି ହେତୁ ଥାଇଲାଣ୍ଡର ଫୁକେଟରେ ୮୦ ଘଣ୍ଟାରୁ ଅଧିକ ସମୟ ଧରି ଅଟକି ରହିଛନ୍ତି।
