ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚୀନ୍ ଏବଂ ଜାପାନ ଗସ୍ତରେ ଅଛନ୍ତି । ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତ ଉପରେ ସମସ୍ତଙ୍କ ନଜର ରହିଛି । ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତ ୨୯ ଅଗଷ୍ଟରୁ ସେପ୍ଟେମ୍ବର ୧ ପର୍ଯ୍ୟନ୍ତ ଚାଲିବ। ଏହାରି ମଧ୍ୟରେ ସମାଜବାଦୀ ପାର୍ଟି ମୁଖ୍ୟ ଏବଂ ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତ ଉପରେ ପ୍ରଶ୍ନ ଉଠାଇଛନ୍ତି । ସମାଜବାଦୀ ପାର୍ଟି ମୁଖ୍ୟ କହିଛନ୍ତି ଯେ, ଦେଶର ସୁରକ୍ଷା ଏବଂ ସମୃଦ୍ଧିକୁ ନେଇ କୌଣସି ସାଲିସ କରାଯିବା ଉଚିତ୍ ନୁହେଁ।
ଇନଷ୍ଟାଗ୍ରାମରେ ପୋଷ୍ଟ କରି ସେ ଲେଖିଛନ୍ତି, ‘ ଜାପାନ ସହିତ ସମ୍ପର୍କ ଗଢ଼ି ତୋଳିବା ଭଲ । ଯଦି ଆପଣ ସେଠାକୁ ଯାଉଛନ୍ତି, ତେବେ କ୍ୟୋଟୋ ମଧ୍ୟ ଯାଆନ୍ତୁ । କିନ୍ତୁ ଆମ ଦେଶର ଭୂମି ଏବଂ ବଜାରକୁ ହଡ଼ପ କରୁଥିବା ଚୀନ୍ ବିରୁଦ୍ଧରେ ୨୪ ଘଣ୍ଟା ସତର୍କ ରୁହନ୍ତୁ। ବୈଦେଶିକ ନୀତି ବିଶ୍ୱ ଶାନ୍ତି ଏବଂ ବିଶ୍ୱ ସହଭାଗୀତାକୁ ପ୍ରୋତ୍ସାହିତ କରିବା ଉଚିତ, ସଂଘର୍ଷ ନୁହେଁ । କୌଣସି ବୈଦେଶିକ ଚୁକ୍ତି ଲାଗି ଦେଶର ସୁରକ୍ଷା ଏବଂ ସମୃଦ୍ଧିକୁ ସାଲିସ କରାଯାଇପାରିବ ନାହିଁ ।’
ପ୍ରଧାନମନ୍ତ୍ରୀ ମୋଦୀଙ୍କ ଜାପାନ ଏବଂ ଚୀନ ଗସ୍ତ ଏପରି ଏକ ସମୟରେ ହୋଇଛି, ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଛନ୍ତି। ଏହା ଭାରତର ଅର୍ଥନୀତି ଉପରେ ସିଧାସଳଖ ପ୍ରଭାବ ପକାଇବ ବୋଲି ଆଶଙ୍କା କରାଯାଉଛି। ପ୍ରଧାନମନ୍ତ୍ରୀ ମୋଦୀ ତାଙ୍କର ଜାପାନ ଗସ୍ତ ସମୟରେ ଟୋକିଓରେ ପୂର୍ବତନ ପ୍ରଧାନମନ୍ତ୍ରୀ ୟୋଶିହିଦେ ସୁଗା ଏବଂ ଫୁମିଓ କିଶିଦାଙ୍କୁ ଭେଟିଛନ୍ତି । ଏହି ସମୟରେ, ଶୋରିଞ୍ଜାନ ଦାରୁମା-ଜି ମନ୍ଦିରର ମୁଖ୍ୟ ପୁରୋହିତ ପ୍ରଧାନମନ୍ତ୍ରୀ ମୋଦୀଙ୍କୁ ଏକ ଜାପାନୀ ଦାରୁମା କଣ୍ଢେଇ ଉପହାର ଦେଇଛନ୍ତି ।
ଟୋକିଓରେ ପହଞ୍ଚିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାପାନ ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କ ସହ ଭାରତ-ଜାପାନ ଅର୍ଥନୈତିକ ଫୋରମରେ ଅଂଶଗ୍ରହଣ କରିଥିଲେ। ଏହି ସମୟରେ ପ୍ରଧାନମନ୍ତ୍ରୀ ମୋଦୀ ପ୍ରଯୁକ୍ତିବିଦ୍ୟା ଏବଂ ନବସୃଜନ ବିଷୟରେ କହିଛନ୍ତି । ସେ କହିଛନ୍ତି, ଜାପାନ ଏକ ଟେକ୍ ପାୱାରହାଉସ ଏବଂ ଭାରତ ଏକ ପ୍ରତିଭା ପାୱାରହାଉସ । ଭାରତ ଏଆଇ, ସେମିକଣ୍ଡକ୍ଟର, କ୍ୱାଣ୍ଟମ୍ କମ୍ପ୍ୟୁଟିଂ, ବାୟୋଟେକ୍ ଏବଂ ସ୍ପେସ୍ କ୍ଷେତ୍ରରେ ଅନେକ ସାହସିକ ଏବଂ ଉତ୍କୃଷ୍ଟ ପଦକ୍ଷେପ ନେଇଛି।
