ମୁମ୍ବାଇ: ଅକ୍ଷୟ କୁମାର, ଆର ମାଧବନ ଏବଂ ଅନନ୍ୟା ପାଣ୍ଡେ ଅଭିନୀତ ଚଳଚ୍ଚିତ୍ର 'କେଶରୀ ଚାପ୍ଟର 2' ଭଲ ରୋଜଗାର କରୁଛି। କିନ୍ତୁ ଏବେ ଏହି ଫିଲ୍ମ ସହ ଯୋଡ଼ି ହୋଇଛି ଏକ ବିବାଦ । YouTuber ଏବଂ ଲେଖକ ୟାହ୍ୟା ବୁଟୱାଲା 'କେଶରୀ ଚାପ୍ଟର 2'ର ଲେଖକ ସୁମିତ ସକ୍ସେନାଙ୍କ ଉପରେ ଚୋରି ଅଭିଯୋଗ ଆଣିଛନ୍ତି । ଲେଖକ ଏବଂ ଗୀତିକାର ୟାହ୍ୟା ବୁଟୱାଲା ଦାବି କରିଛନ୍ତି ଯେ, ଫିଲ୍ମରେ ଅନନ୍ୟା ପାଣ୍ଡେ ଯେଉଁ ସଂଳାପ କହିଥିଲେ ତାହା ୨୦୨୦ରେ ୟୁଟ୍ୟୁବରେ ଅପଲୋଡ୍ ହୋଇଥିବା ତାଙ୍କ କବିତା ଜାଲିଆନାୱାଲା ବାଗରୁ କପି କରାଯାଇଛି ।
ୟାହ୍ୟା ବୁଟୱାଲା ମଧ୍ୟ ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରି ତାଙ୍କର ପୁରୁଣା ଭିଡିଓ ଶେୟାର କରିଥିଲେ । କିନ୍ତୁ ପରେ ସେ ଭିଡିଓଟିକୁ ଡିଲିଟ୍ କରିଦେଇଥିଲେ । ସେ ହଟାଇ ଦେଇଥିବା ପୋଷ୍ଟରେ ଲେଖିଥିଲେ, ‘@nisoooooooorg ମୋତେ ୪ ଦିନ ପୂର୍ବରୁ କେଶରୀ- 2 ଚଳଚ୍ଚିତ୍ରର ଏକ ସଂଳାପର ଏକ କ୍ଲିପ୍ ପଠାଇଥିଲେ । ଏହା ମୋର କବିତା ଜାଲିଆନୱାଲା ବାଗରୁ କପି କରାଯାଇଛି । ଯାହା ୫ ବର୍ଷ ପୂର୍ବେ @unerasepoetry YouTube ଚ୍ୟାନେଲରେ ଅପଲୋଡ୍ କରାଯାଇଥିଲା। ଏଠାରେ ଦୁଇଟି କ୍ଲିପ୍ ଅଛି ଏବଂ ସତ କହିବାକୁ ଗଲେ, ଏହା ସମ୍ପୂର୍ଣ୍ଣ କପି-ପେଷ୍ଟ।’
ଇନଷ୍ଟାଗ୍ରାମରେ ଏକ ନୂତନ ପୋଷ୍ଟରେ ୟାହ୍ୟା ବୁଟୱାଲା ଲେଖିଛନ୍ତି, ‘ଯେପର୍ଯ୍ୟନ୍ତ ଏହି ମାମଲା ସମାଧାନ ନହୋଇଛି, ମୁଁ ଏହି ପ୍ରସଙ୍ଗରେ ଆଲୋଚନା ଜାରି ରଖିବି ଏବଂ ଆପଣମାନଙ୍କୁ ଅପଡେଟ୍ ଦେବି । କାରଣ ଆପଣମାନେ ସମସ୍ତେ ମୋତେ ସାହାଯ୍ୟ ଏବଂ ସମର୍ଥନ କରିବେ । ଆଶା କରୁଛି ଏହି ମାମଲା ଶୀଘ୍ର ସମାଧାନ ହେବ। ଆପଣମାନେ ମଧ୍ୟ ଆଗକୁ ବଢ଼ନ୍ତୁ ଏବଂ ଯଥାସମ୍ଭବ ଏହାକୁ ଶେୟାର କରନ୍ତୁ। ଧନ୍ୟବାଦ।’
ଅକ୍ଷୟ କୁମାର, ଅନନ୍ୟା ପାଣ୍ଡେ, ସୁମିତ ସକ୍ସେନା ଏବଂ କରଣ ଜୋହରଙ୍କୁ ମଧ୍ୟ ଟ୍ୟାଗ୍ କରିଛନ୍ତି ବୁଟଓ୍ବାଲା । ସେପଟେ କବିତା ଚୋରି କରିଥିଲେ ହେଁ ତାଙ୍କୁ ଶ୍ରେୟ ନମିଳିବାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ବୁଟଓ୍ବାଲା । ସେ ଲେଖିଛନ୍ତି, ‘ଜଣେ ଲେଖକ ଭାବରେ, ସାଥି ଲେଖକଙ୍କ ପାଖରୁ କଣ୍ଟେଣ୍ଟ ଚୋରି କରିବା ସତ୍ତ୍ୱେ କ୍ରେଡିଟ୍ ନଦେବା ସବୁଠାରୁ ଖରାପ କଥା । ମୁଁ ଭାବୁଛି ସଂଳାପ ଲେଖକ ସୁମିତ ସକ୍ସେନା ସେମିତି କରିଛନ୍ତି।’
