ନୂଆଦିଲ୍ଲୀ ୦୮/୦୫: ଦୀର୍ଘବର୍ଷରୁ ବୈଜ୍ଞାନିକମାନେ ଅନ୍ୟ ଗ୍ରହରେ ଏଲିଅନ୍ଙ୍କ ସନ୍ଧାନରେ ଲାଗିଛନ୍ତି । କିନ୍ତୁ ଏ ପର୍ଯ୍ୟନ୍ତ ଏଲିଅନ୍ଙ୍କ ଅସ୍ତିତ୍ୱ ବାବଦରେ କୌଣସି ଠୋସ୍ ପ୍ରମାଣ ହାତରେ ଲାଗିନାହିଁ । ତଥାପି ଏଲିଅନ୍ଙ୍କ ସନ୍ଧାନ ନେଇ ଗବେଷକମାନେ ଆଶା ରଖିଛନ୍ତି । ମଣିଷଙ୍କ ପରି ଏଲିଅନ୍ ତଥା ଅନ୍ୟ ଗ୍ରହର ସଭ୍ୟତା ଦ୍ୱାରା ପୃଥିବୀରେ ବାସ କରୁଥିବା ମଣିଷଙ୍କ ବାବଦରେ ତଥ୍ୟ ସଂଗ୍ରହ ସମ୍ଭବ ବୋଲି ସଦ୍ୟ ଏକ ଅଧ୍ୟୟନରୁ ଜଣାପଡ଼ିଛି । ମୋବାଇଲ ଫୋନ୍ ପାଇଁ ବ୍ୟବହୃତ ଟାୱାରରୁ ଏଲିଅନ୍ ମଣିଷକୁ ଖୋଜିପାରିବେ ବୋଲି ଏଥିରେ କୁହାଯାଇଛି ।
ଅଧ୍ୟୟନ ଅନୁସାରେ, ପୃଥିବୀ ଆଖପାଖ ନକ୍ଷତ୍ରମଣ୍ଡଳ ବା ଷ୍ଟାର ସିଷ୍ଟମରେ ଥିବା ଏଲିଅନ୍ମାନେ ସମ୍ଭବତଃ ଆମ ସେଲ୍ ଫୋନ୍ ଟାୱାରରୁ ଆସୁଥିବା ରେଡିଓ ସିଗ୍ନାଲକୁ ଠାବ କରିନେଇଥିବେ । ଏହି ସିଗ୍ନାଲ ଯେତେ ଶକ୍ତିଶାଳୀ ହେବ, ଆକାଶଗଙ୍ଗାରେ ମଣିଷଙ୍କୁ ସେତେ ସହଜରେ ଏବଂ ଶୀଘ୍ର ଖୋଜାଯାଇପାରିବ । ମାଞ୍ଚେଷ୍ଟର ୟୁନିଭର୍ସିଟିରେ ଆଷ୍ଟ୍ରୋଫିଜିକ୍ସର ଜିଡ୍ରୋଲ ବ୍ୟାଙ୍କ ସେଣ୍ଟର ନିର୍ଦ୍ଦେଶକ ତଥା ଅଧ୍ୟୟନର ଲେଖକ ମାଇକ୍ ଗାରେଟ୍ କହିଛନ୍ତି, ରେଡିଓ ସ୍ପେକ୍ଟ୍ରମ୍ ଯୋଗୁ ପୃଥିବୀ ପୂର୍ବାପେକ୍ଷା ବେଶ୍ ଉନ୍ନତି କରିଛି । ଆଗକୁ ଏହା ଯେତେ ବିକଶିତ ହେବ ଉପଯୁକ୍ତ ଟେକ୍ନୋଲୋଜି ଥିବା ଯେ କୌଣସି ସଭ୍ୟତା ଆମକୁ ଠାବ କରିପାରିବେ ।
ନୋଟିସେସ୍ ଅଫ୍ ରୟାଲ ଆଷ୍ଟ୍ରୋନୋମିକାଲ ସୋସାଇଟିରେ ପ୍ରକାଶିତ ଅଧ୍ୟୟନ ରିପୋର୍ଟ ଅନୁସାରେ, ଗବେଷକମାନେ କ୍ରାଉଡ୍-ସୋର୍ସ ଡାଟାର ବ୍ୟବହାର କରିଥିଲେ, ଯେପରି ସେଲ୍ ଫୋନ୍ ଟାୱାରରୁ ରେଡିଓ ସିଗ୍ନାଲ ଲିକ୍କୁ ସିମ୍ୟୁଲେଟ୍ କରାଯାଇପାରିବ। ଏଥିସହ ଏହା ନିର୍ଦ୍ଧାରିତ କରାଯିବ ଯେ ଅନ୍ୟ ଗ୍ରହରୁ ଏହି ସିଗ୍ନାଲଗୁଡ଼ିକୁ ଠାବ କରିବା କେତେ କଷ୍ଟକର ହେବ । ସେହିପରି କେଉଁ ସିଗ୍ନାଲକୁ ପୃଥିବୀରୁ କେତେ ଦୂରରୁ ଠାବ କରିହେବ ତାହା ଉପରେ ମଧ୍ୟ ଅଧ୍ୟୟନ କରାଯାଇଛି ।
