ଅଲ୍‌ ଓଡ଼ିଶା ର‌୍ୟାଙ୍କିଙ୍ଗ୍‌ ବ୍ୟାଡମିଣ୍ଟନ, ଫାଇନାଲ୍‌ ଲାଇନ ଅପ୍‌ ଚୂଡ଼ାନ୍ତ

ଭୁବନେଶ୍ୱର, ୯ ।୨ (ବ୍ୟୁରୋ): ସହିଦନଗର ‘ସାଇ ରିଜିଓନାଲ ବ୍ୟାଡମିଣ୍ଟନ ଏକାଡେମୀ’ରେ ରାଜ୍ୟ ସେକ୍ରେଟାରିଏଟ୍‌ ଆସୋସିଏସନ୍‌ ଆନୁକୂଲ୍ୟରେ ଚାଲିଥିବା ଅଲ୍‌ ଓଡ଼ିଶା ର‌୍ୟାଙ୍କିଙ୍ଗ୍‌ ବ୍ୟାଡମିଣ୍ଟନର ବିଭିନ୍ନ ବୟସ ବର୍ଗରେ ଫାଇନାଲ୍‌ ଲାଇନ ଅପ୍‌ ଚୂଡ଼ାନ୍ତ ହୋଇଛି ।
୧୭ ବର୍ଷରୁ କମ୍‌ ବାଳକ ବର୍ଗର ପ୍ରଥମ ସେମିରେ ସମ୍ବଲପୁରର ନନ୍ଦିଶ ପୋଦ୍ଦାର ୨-୦ ଗେମ୍‌ରେ ଭୁବନେଶ୍ୱରର ଅଭିଜିତ ମହାରଣାଙ୍କୁ ଏବଂ ଦ୍ୱିତୀୟ ସେମିରେ ଅନୁଗୁଳର ଆୟୁଷ ଦାସ ୨-୧ରେ ଭୁବନେଶ୍ୱରର ଅମ୍ରିତ ମହାନ୍ତିଙ୍କୁ ପରାଜିତ କରି ଫାଇନାଲ୍‌ରେ ପ୍ରବେଶ କରିଛନ୍ତି । ମହିଳା ସିଙ୍ଗଲ୍ସ ପ୍ରଥମ ସେମିରେ ସୁନ୍ଦରଗଡ଼ର କ୍ରିଷ୍ଣିକା ବିରୋକ ୨-୦ରେ ସମ୍ବଲପୁରର ଶ୍ରେୟା ବିଶ୍ୱାଳଙ୍କୁ ଏବଂ ଦ୍ୱିତୀୟ ସେମିରେ ସମ୍ବଲପୁରର ପ୍ରଶଂସା ଦାସ ୨-୦ରେ ଭୁବନେଶ୍ୱରର ହର୍ଷିତା ରାଉତଙ୍କୁ ପରାଜିତ କରି ଫାଇନାଲକୁ ଉନ୍ନୀତ ହୋଇଛନ୍ତି ।
୧୯ ବର୍ଷରୁ କମ୍‌ ବାକଳ ବର୍ଗର ପ୍ରଥମ ସେମିରେ ମୟୂରଭଞ୍ଜର ଆୟୁଷ ପଟ୍ଟନାୟକ ୨-୧ରେ ଅନୁଗୁଳର ଆୟୁଷ ଦାସଙ୍କୁ ଏବଂ ଦ୍ୱିତୀୟ ସେମିରେ ନନ୍ଦିଶ ୨-୦ରେ ରିତିକ ଆରୋରାଙ୍କୁ ପରାଜିତ କରି ଫାଇନାଲରେ ପ୍ରବେଶ କରିଛନ୍ତି । ୧୭ ବର୍ଷରୁ କମ୍‌ ବାଳକ ଡବଲ୍ସରେ ୟଶରାଜ ବିଶ୍ୱାଳ ଓ ପ୍ରିୟାଂଶୁ ମହାନ୍ତି ଯୋଡ଼ି ସ୍ୱସ୍ତିକ ସ୍ୱାଇଁ ଓ ବିଭୁତି ରାୟ ଯୋଡ଼ିଙ୍କୁ ଏବଂ ଅନିର୍ବାଣ ସାମନ୍ତ ଓ ଗୋପାଳ ଶ୍ରୀଚନ୍ଦନ ଯୋଡ଼ି ସୌରଭ ଓ ଶିବଦତ୍ତ ଯୋଡ଼ିଙ୍କୁ ପରାସ୍ତ କରି ସେମି ଫାଇନାଲ୍‌କୁ ଯାଇଛନ୍ତି । ସେମିରେ ପ୍ରବେଶ କରିଥିବା ଅନ୍ୟ ଦୁଇଟି ଯୋଡ଼ି ହେଲେ ମହମ୍ମଦ ସାହିଲ-ଚୟନ ସାହାରିଆ ଏବଂ ଅଭିଜିତ ମହାରଣା ଓ ଅମ୍ରିତ ମହାନ୍ତି ଯୋଡ଼ି ।
ପୁରୁଷ ଡବଲ୍ସ ବର୍ଗର ପ୍ରଥମ ସେମିରେ ଅଜିତ କୁମାର ମହାନ୍ତି ଓ ପ୍ରମୋଦ କୁମାର ରଣା ଯୋଡ଼ି ୨-୦ରେ ଅଭିଷେକ ପଟ୍ଟନାୟକ ଓ ବିକ୍ରାନ୍ତ ଜାନିଙ୍କୁ ଏବଂ ଦ୍ୱିତୀୟ ସେମିରେ ଜ୍ଞାନଚାନ୍ଦ ଓ ମାନସ ରଞ୍ଜନ ରାଉତରାୟ ୨-୧ ଗେମ୍‌ରେ ଆୟୁଷ ପଟ୍ଟନାୟକ ଓ ଅବିନାଶ ମହାନ୍ତି ଯୋଡ଼ିଙ୍କୁ ପରାଜିତ କରିଥିଲେ । ମହିଳା ଡବଲ୍ସ ପ୍ରଥମ ସେମି କ୍ରିଷ୍ଣିକା-ଆକାଂକ୍ଷା କିରେ ଓ ଅପରାଜିତା ପତି ଓ ହର୍ଷିତା ଯୋଡ଼ିଙ୍କୁ ଏବଂ ଦ୍ୱିତୀୟ ସେମି ଲକ୍ଷ୍ମୀପ୍ରିୟା-ଗାୟତ୍ରୀ ଓ ନନ୍ଦିନୀ-ଜୟଶ୍ରୀ ଯୋଡ଼ି ମଧ୍ୟରେ ଅନୁଷ୍ଠିତ ହେବ । ଆସନ୍ତାକାଲି ସମସ୍ତ ବର୍ଗର ଫାଇନାଲ୍‌ ଖେଳାଯିବା ସହ ସନ୍ଧ୍ୟାରେ କୃତୀ ପ୍ରତିଯୋଗୀମାନଙ୍କୁ ପୁରସ୍କୃତ କରାଯିବ ।