ନୂଆଦିଲ୍ଲୀ: ଭାରତ ଏବଂ ଆମେରିକା ମଧ୍ୟରେ ପ୍ରତିରକ୍ଷା ସହଯୋଗ ଏକ ନୂତନ ଶିଖର ଛୁଇଁବାକୁ ଯାଉଛି । ଟ୍ରମ୍ପଙ୍କ ଟାରିଫ ଧମକ ମଧ୍ୟରେ ଦୁଇ ଦେଶ ପ୍ରତିରକ୍ଷା ଦିଗରେ ଆଗକୁ ବଢ଼ିବାକୁ ଯୋଜନା କରିଛନ୍ତି । ଭାରତୀୟ ନୌସେନା ପାଇଁ ୬ଟି ଅତିରିକ୍ତ P-8I ସାମୁଦ୍ରିକ ପାଟ୍ରୋଲ ବିମାନ ପାଇଁ ୪ ବିଲିୟନ୍ ଡଲାରର ଚୁକ୍ତି ପ୍ରାୟ ଚୂଡ଼ାନ୍ତ ହୋଇଛି। ଏଥିପାଇଁ ଏକ ଆମେରିକୀୟ ପ୍ରତିନିଧି ଦଳ ସେପ୍ଟେମ୍ବର ୧୬ ରୁ ୧୯ ମଧ୍ୟରେ ଦିଲ୍ଲୀ ପହଞ୍ଚିବେ । ଏହି ପ୍ରତିନିଧିମଣ୍ଡଳୀରେ ଆମେରିକା ପ୍ରତିରକ୍ଷା ବିଭାଗ ଏବଂ ବୋଇଂର ଅଧିକାରୀମାନେ ସାମିଲ ହେବେ । ଏହା ବ୍ୟତୀତ ନୀତି ପାଇଁ ପ୍ରତିରକ୍ଷା ସଚିବଙ୍କ କାର୍ଯ୍ୟାଳୟ, ନୌସେନା କାର୍ଯ୍ୟାଳୟ (NIPO), ସାମୁଦ୍ରିକ ପାଟ୍ରୋଲ୍ ଏବଂ ପ୍ରତିରକ୍ଷା ସୁରକ୍ଷା ସହଯୋଗ ଏଜେନ୍ସି (DSCA)ର ଅଧିକାରୀମାନେ ମଧ୍ୟ ଅଂଶଗ୍ରହଣ କରିବେ । ଏନଆଇପିଓ ବିଶ୍ୱ ସାମୁଦ୍ରିକ ସହଭାଗୀତା ପରିଚାଳନା କରୁଥିବା ବେଳେ ପିଏମଏ ବିମାନ ଅଧିଗ୍ରହଣ କରେ।
ଭାରତୀୟ ନୌସେନା ପାଖରେ ବର୍ତ୍ତମାନ ୧୨ଟି P-8I ବିମାନ ଅଛି । ଭାରତ ମହାସାଗରରେ ଚୀନର ବର୍ଦ୍ଧିତ ସାମରିକ ପ୍ରଭାବକୁ ଦୃଷ୍ଟିରେ ରଖି ନୌସେନାକୁ ଏହାର ନିରୀକ୍ଷଣ ଏବଂ ବୁଡ଼ାଜାହାଜ ବିରୋଧୀ କ୍ଷମତାକୁ ସୁଦୃଢ଼ କରିବା ପାଇଁ ଆହୁରି ୬ଟି ବିମାନର ଆବଶ୍ୟକତା ରହିଛି। ଏହା ବ୍ୟତୀତ ନୌସେନା MQ-9B ଡ୍ରୋନ ମଧ୍ୟ ବ୍ୟବହାର କରୁଛି ।
P-8I ବିମାନ ଦୀର୍ଘ ଦୂରତା ନିରୀକ୍ଷଣ ଏବଂ ବୁଡ଼ାଜାହାଜ ଚିହ୍ନଟ କରିବାରେ ସକ୍ଷମ । ଏହା ୪୧୦୦୦ ଫୁଟ ଉଚ୍ଚତାରେ ଉଡିପାରିବ ଏବଂ ୮,୩୦୦ କିଲୋମିଟର ପର୍ଯ୍ୟନ୍ତ ଦୂରତା ଅତିକ୍ରମ କରିପାରିବ । ଏହା ଜାହାଜ ବିରୋଧୀ କ୍ଷେପଣାସ୍ତ୍ର, କ୍ରୁଜ୍ କ୍ଷେପଣାସ୍ତ୍ର, ହାଲୁକା ଟର୍ପେଡୋ ମଧ୍ୟ ବହନ କରିପାରିବ। MQ-9B ଡ୍ରୋନ ଭାରତ ମହାସାଗରରେ ପ୍ରକୃତ ସମୟ (ରିୟଲ ଟାଇମ୍) ନିରୀକ୍ଷଣ କରିବାରେ ସହାୟକ ହେବ ।
ରୁଷରୁ ତେଲ କିଣିବା ପାଇଁ ଆମେରିକା ଦ୍ୱାରା ଭାରତ ଉପରେ ଲଗାଯାଇଥିବା ଉଚ୍ଚ ଶୁଳ୍କ ଏହି ପ୍ରତିରକ୍ଷା ଚୁକ୍ତି ଉପରେ କୌଣସି ପ୍ରଭାବ ପକାଇ ନାହିଁ । ଫେବୃଆରୀରେ ପ୍ରଧାନମନ୍ତ୍ରୀ ମୋଦୀଙ୍କ ଆମେରିକା ଗସ୍ତ ସମୟରେ ଜାରି ହୋଇଥିବା ମିଳିତ ବିବୃତ୍ତିରେ ସ୍ପଷ୍ଟ କରାଯାଇଥିଲା ଯେ, ଏହି ଚୁକ୍ତି ଶେଷ ପର୍ଯ୍ୟାୟରେ ପହଞ୍ଚିଛି ।
