ନୂଆଦିଲ୍ଲୀ,୨୨।୩: ଆନ୍ଧ୍ର ପ୍ରଦେଶର ପୂର୍ବ ଗୋଦାବରି ଜିଲ୍ଲାରେ ଅପମିଶ୍ରିତ ଏବଂ ବିଷାକ୍ତ କ୍ଷୀରର ଭୟଙ୍କର ଘଟଣା ପୁରା ଦେଶକୁ ଦୋହଲାଇ ଦେଇଛି। ରିପୋର୍ଟ ଅନୁସାରେ, ବିଷାକ୍ତ କ୍ଷୀର ପିଇ ୧୬ ଜଣଙ୍କର ମୃତ୍ୟୁ ହୋଇଛି। ସେଭଳି ୩ଜଣ ଏବେ ବି ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି। ଲାଲାଚେରଭୁ, ଚୌଦେଶ୍ୱରନଗର ଏବଂ ସ୍ବରୁପନଗର ଭଳି ଅଞ୍ଚଳରେ ଗତ ଫେବୃଆରୀରୁ ଲୋକେ ଅସୁସ୍ଥ ହେବାରେ ଲାଗିଥିଲେ। କ୍ଷୀର ପିଇବା ପରେ ବାନ୍ତି,ପେଟ ଦରଜ, ପରିସ୍ରା ବନ୍ଦ ହେବା ଓ ଗମ୍ଭୀର କିଡନୀ ଫେଲ୍ୟୁଅର ଭଳି ବିପଦଜନକ ଲକ୍ଷଣ ଦେଖିବାକୁ ମିଳିଛି।
ତଦନ୍ତରୁ ଜଣାପଡିଛି ଯେ ନରସାପୁରମ ଗାଁର ଏକ ସ୍ଥାନୀୟ ଦୁଗ୍ଧ ୟୁନିଟ୍ ରୁ ଯୋଗାଣ ହେଉଥିବା କ୍ଷୀରରେ ‘ଇଥିଲିନ୍ ଗ୍ଲାଇକଲ୍’ ନାମକ ଏକ ବିଷାକ୍ତ ରାସାୟନିକ ପଦାର୍ଥ ମିଶାଯାଇଥିଲା। ଏହି ପଦାର୍ଥ ସାଧାରଣତଃ ଆଣ୍ଟି-ଫ୍ରିଜ୍ ଏବଂ ଶୀତଳିକରଣରେ ବ୍ୟବହୃତ ହୁଏ। ଏହା ମାନବ ଶରୀର ପାଇଁ ଅତ୍ୟନ୍ତ କ୍ଷତିକାରକ । ଏହା ପଲିଷ୍ଟର ତନ୍ତୁ ଏବଂ ପ୍ଲାଷ୍ଟିକ୍ ଉତ୍ପାଦନରେ କଞ୍ଚାମାଲ ଭାବରେ ମଧ୍ୟ ବ୍ୟବହୃତ ହୁଏ, କିନ୍ତୁ ଅତ୍ୟଧିକ ବିଷାକ୍ତ ହୋଇଥିବାରୁ ଏହା ଶରୀର ପାଇଁ ବିପଜ୍ଜନକ। ଏହି ବିଷାକ୍ତ କ୍ଷୀର ସେବନ ଦ୍ୱାରା ପିଲା ଏବଂ ବୃଦ୍ଧଙ୍କ ସମେତ ୧୦୦ ରୁ ଅଧିକ ପରିବାର ପ୍ରଭାବିତ ହୋଇଥିଲେ। ଅନେକ ରୋଗୀଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲା, ସେମାନଙ୍କୁ ଡାଏଲିସିସ୍ ଏବଂ ଭେଣ୍ଟିଲେଟର ସପୋର୍ଟ ମଧ୍ୟ ଦରକାର ପଡିଛି।
ସ୍ୱାସ୍ଥ୍ୟ ବିଭାଗର ତଦନ୍ତରୁ ଏହା ମଧ୍ୟ ଜଣାପଡିଛି ଯେ,ପୀଡିତଙ୍କ ରକ୍ତ ୟୁରିଆ ଏବଂ ସେରମ୍ କ୍ରିଏଟିନିନ୍ ସ୍ତର ଅସ୍ୱାଭାବିକ ଭାବରେ ବଢୁଥିଲା, ଯାହା ଗୁରୁତର କିଡନୀ କ୍ଷତିକୁ ସୂଚିତ କରୁଛି। ଏହି ଘଟଣା ପରେ, ପ୍ରଶାସନ ତୁରନ୍ତ କ୍ଷୀର ଯୋଗାଣ ବନ୍ଦ କରି ପ୍ରଭାବିତ ଅଞ୍ଚଳରେ ଘର ଘର ବୁଲି ସର୍ଭେ ଆରମ୍ଭ କରିଛି। ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି, ପ୍ରଶାସନ ସନ୍ଦିଗ୍ଧ କ୍ଷୀର ବିକ୍ରେତାଙ୍କୁ ଗିରଫ କରିଛି। ଖାଦ୍ୟ ସୁରକ୍ଷା ବିଭାଗ ଡେରୀ ୟୁନିଟ୍ ରୁ କ୍ଷୀର, ଦହି, ଘିଅ ଏବଂ ପାଣିର ନମୁନା ସଂଗ୍ରହ କରିଥିବା ବେଳେ ପଶୁପାଳନ ବିଭାଗ ପଶୁ ଖାଦ୍ୟ ଏବଂ ପାଣିର ନମୁନା ସଂଗ୍ରହ କରିଛି।
ପୋଲିସ ପୋଲିସ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜୋରଦାର କରିଛି। ବରିଷ୍ଠ ସ୍ୱାସ୍ଥ୍ୟ ଅଧିକାରୀମାନେ ଚିକିତ୍ସା ଉପରେ ନଜର ରଖିଛନ୍ତି, ଏବଂ ରାପିଡ୍ ରେସପନ୍ସ ଟିମ୍ ନିରନ୍ତର ଲୋକଙ୍କ ପରୀକ୍ଷା କରୁଛନ୍ତି। ସ୍ଥିତି ବର୍ତ୍ତମାନ ନିୟନ୍ତ୍ରଣରେ ଥିବା ରିପୋର୍ଟ କରାଯାଇଛି, କିନ୍ତୁ ଏହି ଘଟଣା ଖାଦ୍ୟ ଗୁଣବତ୍ତା ଏବଂ ତଦାରଖ ବ୍ୟବସ୍ଥା ବିଷୟରେ ଦେଶବ୍ୟାପୀ ବିତର୍କ ସୃଷ୍ଟି କରିଛି।
