ଦେଶର ସୁରକ୍ଷା ପାଇଁ କଠୋର ପଦକ୍ଷେପ ନେବାକୁ ପଛାଇବୁ ନାହିଁ: ପ୍ରଧାନମନ୍ତ୍ରୀ
ନୂଆଦିଲ୍ଲୀ,୨୮ ।୧(ଏଜେନ୍ସି): ଭାରତ ଶାନ୍ତିର ଦୃଢ ସମର୍ଥକ । କିନ୍ତୁ ରାଷ୍ଟ୍ରୀୟ ସୁରକ୍ଷାକୁ ମଜଭୁତ କରିବା ଲାଗି ଯେକୌଣସି ସିଦ୍ଧାନ୍ତ ନେବାରୁ ଏହା ପଛାଇବ ନାହିଁ । ଦିଲ୍ଲୀରେ ଏନ୍ସିସିର କ୍ୟାଡେଟ୍ମାନଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଏହା ପ୍ରକାଶ କରିଛନ୍ତି ।
ପ୍ରଧାନମନ୍ତ୍ରୀ ସେଠାରେ ଏନ୍ସିସି କ୍ୟାଡେଟ୍ମାନଙ୍କ ନିକଟରୁ ଗାର୍ଡ ଅଫ ଅନର ଗ୍ରହଣ କରିଥିଲେ । ତା’ ପରେ ସେମାନଙ୍କୁ ସମ୍ବୋଧନ କରି କହିଥିଲେ ଯେ, ଗତ ସାଢେ ଚାରି ବର୍ଷ ହେଲା ରାଷ୍ଟ୍ରୀୟ ସୁରକ୍ଷାକୁ ପ୍ରାଥମିକତା ଦେଇ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି । ଭାରତ ଶାନ୍ତିର ଦୃଢ ସମର୍ଥକ । କିନ୍ତୁ ରାଷ୍ଟ୍ରୀୟ ସୁରକ୍ଷା ପ୍ରସଙ୍ଗରେ ଯେକୌଣସି କଠୋର ପଦକ୍ଷେପ ଉଠାଇବାକୁ ଆମେ ପଛାଇବୁ ନାହିଁ । ଆମର ସେନା ମଧ୍ୟ ସ୍ପଷ୍ଟ ଭାବେ ବାର୍ତ୍ତା ଦେଇଛି ଯେ କେହି ଆମକୁ ଅସୁବିଧାରେ ପକାଇଲେ ଆମେ ତାଙ୍କୁ ଛାଡୁନା ।
ପ୍ରଧାନମନ୍ତ୍ରୀ ଆହୁରି କହିଥିଲେ ଯେ, ଭାରତ ଏବେ ବିଶ୍ୱର ଏପରି କିଛି ଦେଶ ମଧ୍ୟରେ ସାମିଲ ହୋଇଯାଇଛି ଯେଉଁମାନଙ୍କ ନିକଟରେ ଜଳ, ସ୍ଥଳ, ଓ ଆକାଶରୁ ପରମାଣୁ ଆକ୍ରମଣ କରିବା ପାଇଁ କ୍ଷମତା ରହିଛି ।
