କଟକ,୧୩୫(ବ୍ୟୁରୋ): ବହୁ ଚର୍ଚ୍ଚିତ ଅର୍ଚ୍ଚନା ନାଗ୍ ଆଡଭୋକେଟ୍ ଲାଇସେନ୍ସ ପାଇବାର ମାତ୍ର ଅଳ୍ପ ଦିନ ମଧ୍ୟରେ ତାଙ୍କୁ ରାଜ୍ୟ ଆଇନଜୀବୀ ପରିଷଦ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି I ସେ ନିଜ ବିରୋଧରେ କୌଣସି ପ୍ରକାର କ୍ରିମିନାଲ କେସ୍ ନାହିଁ ବୋଲି ଦର୍ଶାଇବା ଅଭିଯୋଗରେ ଏହି ନୋଟିସ୍ ଜାରି କରାଯାଇଛି। ତଥ୍ୟ ଲୁଚାଇବା ଅଭିଯୋଗରେ ତାଙ୍କ ବିରୋଧରେ କାହିଁକି ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାନଯିବ ସେ ସଂକ୍ରାନ୍ତରେ ୭ଦିନ ମଧ୍ୟରେ ଜବାବ ରଖିବାକୁ ଏହି ନୋଟିସ୍‌ରେ କୁହାଯାଇଛି। ଏହି ନୋଟିସ୍ ପରେ ଅର୍ଚ୍ଚନା ନାଗ୍‌ଙ୍କ ଆଡଭୋକେଟ୍ ଲାଇସେନ୍ସ ବାତିଲ୍ ହୋଇପାରେ ବୋଲି କୁହାଯାଉଛି।

ଗତ ୧୦ ତାରିଖରେ ଅର୍ଚ୍ଚନା ନାଗ୍ ରାଜ୍ୟ ଆଇନଜୀବୀ ପରିଷଦରେ ଆଡଭୋକେଟ୍ ଭାବେ ନିଜ ନାମ ପଞ୍ଜିକୃତ କରିଥିଲେ । ଏହି ଲାଇସେନ୍ସ ଦେବା ପରେ ରାଜ୍ୟ ଆଇନଜୀବୀ ପରିଷଦ ଜାଣିବାକୁ ପାଇଛି ଯେ, ତାଙ୍କ ବିରୋଧରେ କ୍ରିମିନାଲ କେସ୍ ପଡ଼ିରହିଛି। ୨୦୨୪ ସେପ୍ଟେମ୍ବର ୨ ତାରିଖରେ ଅର୍ଚ୍ଚନା ନାଗ ଆଡଭୋକେଟ୍ ଲାଇସେନ୍ସ ପାଇଁ ଯେଉଁ ଆବେଦନ କରିଥିଲେ ସେଥିରେ ସେ କେତେକ ତଥ୍ୟ ଲୁଚାଇଥିବା ସାମ୍ନାକୁ ଆସିଥିଲା । ଉକ୍ତ ଫର୍ମର କଲମ୍-୨୦ରେ ତାଙ୍କ ବିରୋଧରେ କୌଣସି ପ୍ରକାର ଫୌଜଦାରୀ କେସ୍ ‘ନାହିଁ’ ବୋଲି ଉଲ୍ଲେଖ କରାଯାଇଛି । ତେଣୁ ଏହା ଉପରେ ସାତ ଦିନ ଭିତରେ ଯଦି ସେ ଉତ୍ତର ନ ରଖନ୍ତି ତାହେଲେ ରାଜ୍ୟ ଆଇନଜୀବୀ ପରିଷଦ ଏକ ପାଖିଆ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି କୁହାଯାଇଛି।