ପାଟନା: ବିହାର ଗୟା ଜିଲ୍ଲାରେ ସୈନ୍ୟ ଅଭ୍ୟାସ ସମୟରେ ଛାଡ଼ି ଯାଇଥିବା ତୋପର ଏକ ଗୁଳି ବାହାରିବରୁ ୩ ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଆଉ ତିନି ଜଣ ଗୁରୁତର ଆହତ ହୋଇଛନ୍ତି। ଦୁର୍ଘଟଣା ବେଳେ ଗ୍ରାମର ସବୁ ଲୋକ ହୋଲି ଖେଳୁଥିଲେ। ଆହତ ହୋଇଥିବା ଲୋକଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନା ପାଇ ସିଟି ଏସପିଙ୍କ ନେତୃତ୍ୱରେ ଏକ ଟିମ ଘଟଣା ସ୍ଥଳକୁ ଯାଇଛି। ଫାଇରିଂ ରେଞ୍ଜ ବାହାରେ କେମିତି ତୋପ ଆସିଲା ସେ ନେଇ ପୁଲିସ ତଦନ୍ତ କରୁଛି।

ସୂଚନା ଅନୁସାରେ, ଏପରି ଅଭାବନୀୟ ଘଟଣା ଘଟିଛି ଗୟା ଜିଲ୍ଲା ବାରଚଟ୍ଟି ଥାନା ସ୍ଥିତ ଗୁଲରୱେଦ ଗ୍ରାମରେ। ଏଠାରେ ହୋଲି ଖେଳିବାକୁ ଗ୍ରାମର ଅନେକ ଲୋକ ଏକାଠି ହୋଇଥିଲେ। ଏନେଇ ଗୟା ଏସପି ଆଶୀଷ ଭାରତୀ କହିଛନ୍ତି, ମୃତକଙ୍କ ମଧ୍ୟରେ ଗୁଲରୱେଦ ଗ୍ରାମର ଗୋଟିଏ ପରିବାରର ଦୁଇ ଜଣ ପୁରୁଷ ଓ ଜଣେ ମହିଳାଙ୍କ ମୃତ୍ୟୁ ହୋଇଛି। ଏହି ଘଟଣାରେ ଆହତ ହୋଇଥିବା ଦୁଇ ମହିଳାଙ୍କ ସମେତ ତିନି ଜଣ ଲୋକଙ୍କୁ ଚିକିତ୍ସା ପାଇଁ ଗୟା ସହର ସ୍ଥିତ ଅନୁଗ୍ରହ ନାରାୟଣ ମଗଧ ମେଡିକାଲ ହସ୍ପିଟାଲରେ ଭର୍ତ୍ତି କରାଯାଇଛି।  

ରିପୋର୍ଟ ଅନୁସାରେ, ମୃତକମାନେ ହେଲେ ଗୋବିନ୍ଦ ମାଝି, ସୁରଜ କୁମାର ଓ କଞ୍ଚନ କୁମାରୀ। ସେହିଭଳି ଆହତମାନେ ହେଲେ ଗୀତା କୁମାରୀ, ରାସୋ ଦେବୀ ଓ ପିଣ୍ଟୁ ମାଝି।