ନୂଆଦିଲ୍ଲୀ: ଡୋମିନିକନ୍ ରିପବ୍ଲିକର ରାଜଧାନୀ ସାଣ୍ଟୋ ଡୋମିଙ୍ଗୋରୁ ଏକ ବଡ଼ ଦୁଃଖଦ ଖବର ଏବେ ଆସିଛି । ଆଜି (ମଙ୍ଗଳବାର) ସକାଳେ ଏଠାରେ ଏକ ନାଇଟ୍ କ୍ଲବର ଛାତ ଭୁଶୁଡ଼ି ପଡ଼ିବା କାରଣରୁ ଅତି କମରେ ୧୮ ଜଣଙ୍କର ମୃତ୍ୟୁ ହୋଇଛି । ୧୨୦ ରୁ ଅଧିକ ଲୋକ ଆହତ ହୋଇଥିବା ସୂଚନା ରହିଛି । ଏହି ଘଟଣାରେ ଅଧିକାରୀ ମାନେ କହିଛନ୍ତି ଯେ, ଏହି ଘଟଣାରେ ଉଦ୍ଧାର କାର୍ଯ୍ୟ ଚାଲିଛି ଏବଂ ଭଗ୍ନାବଶେଷ ତଳେ ଫସି ରହିଥିବା ଲୋକଙ୍କୁ ଖୋଜା ଚାଲିଛି। ସୂଚନା ମୁତାବକ ଏହି ଘଟଣାରେ ଆହତ ମାନଙ୍କ ମଧ୍ୟରେ ପ୍ରସିଦ୍ଧ ମେରେଙ୍ଗ୍ୟୁ ଗାୟିକା ରୁବି ପେରେଜ୍ ମଧ୍ୟ ଅଛନ୍ତି, ଯିଏ ଘଟଣା ସମୟରେ ନାଇଟ୍ କ୍ଲବରେ ପ୍ରଦର୍ଶନ କରୁଥିଲେ।
ଘଟଣା ସମ୍ପର୍କରେ ଅଧିକ ସୂଚନା ଦେଇ,ଜରୁରୀକାଳୀନ ଅପରେସନ୍ସ ସେଣ୍ଟରର ନିର୍ଦ୍ଦେଶକ ଜୁଆନ ମାନୁଏଲ ମେଣ୍ଡେଜ୍ କହିଛନ୍ତି ଯେ, ଅଧିକାରୀ ମାନେ ବିଶ୍ୱାସ କରନ୍ତି ଯେ, କିଛି ଲୋକ ଭଗ୍ନାବଶେଷ ତଳେ ଜୀବିତ ଥାଇପାରନ୍ତି, ତେଣୁ ଉଦ୍ଧାରକାରୀ ମାନେ କାର୍ଯ୍ୟ ଜାରି ରଖିଛନ୍ତି। ଲୋକମାନଙ୍କୁ ବାହାର କରିବାକୁ ନିରନ୍ତର ଚେଷ୍ଟା କରୁଛନ୍ତି।
ଘଟଣାକୁ ନେଇ ରାଷ୍ଟ୍ରପତି ଲୁଇସ୍ ଆବିନାଡର ଦୁଃଖ ପ୍ରକାଶ କରିଛନ୍ତି। ସେ ସୋସିଆଲ ମିଡିଆରେ ଲେଖିଛନ୍ତି ଯେ ସମସ୍ତ ଉଦ୍ଧାରକାରୀ ସଂସ୍ଥା ପ୍ରଭାବିତ ଲୋକଙ୍କୁ ସାହାଯ୍ୟ କରିବା ପାଇଁ କଠିନ ପରିଶ୍ରମ କରୁଛନ୍ତି। ରାଷ୍ଟ୍ରପତି ମଧ୍ୟ ଘଟଣାସ୍ଥଳରେ ପହଞ୍ଚି ଆହତଙ୍କ ପରିବାରକୁ ଭେଟିଥିଲେ।
ଏହି ଘଟଣା ପରେ, ଆଖପାଖ ଅଞ୍ଚଳରେ ଦଳାଚକଟା ପରିସ୍ଥିତି ହୋଇଛି । ଲୋକମାନେ ସେମାନଙ୍କର ବନ୍ଧୁ ଏବଂ ସମ୍ପର୍କୀୟ ମାନଙ୍କୁ ଖୋଜୁଛନ୍ତି। ଆହତ ମାନଙ୍କୁ ନିକଟସ୍ଥ ଏକ ଡାକ୍ତରଖାନାକୁ ନିଆଯାଇଛି । ତେବେ ଛାତ ଭୁଶୁଡ଼ିବାର କାରଣ କ'ଣ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
