ଗୋଲ୍ଡ କୋଷ୍ଟ,୦୬/୧୧: ଆଜି ଅଷ୍ଟ୍ରେଲିଆ ଓ ଭାରତ ମଧ୍ୟରେ ଖେଳାଯିବ ଚତୁର୍ଥ ଟି-ଟ୍ୱେଣ୍ଟି ମୁକାବିଲା । ପ୍ରଥମ ୩ଟି ମ୍ୟାଚ୍ ସୁଦ୍ଧା ସିରିଜ ୧-୧ରେ ବରାବର ରହିଥିବାରୁ ଉଭୟ ଦଳ ଅଗ୍ରଣୀ ପାଇଁ ପ୍ରୟାସ କରିବେ । ଫଳରେ ମ୍ୟାଚ୍ଟି ସଂଘର୍ଷପୂର୍ଣ୍ଣ ହେବ ।
ପ୍ରଥମ ମ୍ୟାଚକୁ ବର୍ଷା ଧୋଇ ନେଇଥିଲା । ଦ୍ୱିତୀୟ ମ୍ୟାଚ୍ରେ ଅଷ୍ଟ୍ରେଲିଆ ବିଜୟ ହାସଲ କରିଥିବାବେଳେ ତୃତୀୟ ମ୍ୟାଚରେ ଭାରତ ବିଜୟୀ ହୋଇ ସିରିଜକୁ ଫେରିଥିଲା । ଚତୁର୍ଥ ମୁକାବିଲା ପୂର୍ବରୁ ୩ଦିନର ବିଶ୍ରାମ ସମୟ ମିଳିଥିବାରୁ ଉଭୟ ଦଳର ଖେଳାଳି ମାନସିକ କ୍ଲାନ୍ତି ଦୂର କରିଛନ୍ତି ।ଶୁକ୍ରବାର ଘମା ଘୋଟ ଲଢେଇ ପାଇଁ ଉଭୟ ଦଳ ପ୍ରସ୍ତୁତ । ୩ଦିନର ବିଶ୍ରାମ ସମୟ ମଧ୍ୟରେ ଭାରତୀୟ ଖେଳାଳିମାନେ ସର୍ଟ ବଲ୍ ଦୁର୍ବଳତାକୁ ଦୂର କରିବା ପାଇଁ ଯଥେଷ୍ଟ ଉଦ୍ୟମ କରିଛନ୍ତି । ତେଣୁ ଅଷ୍ଟ୍ରେଲିଆର ସର୍ଟବଲ୍ ଓ ବାଉନ୍ସର ରଣନୀତି ଆସନ୍ତା କାଲି ଫେଲ ମାରିବ ।
ଶୁକ୍ରବାର ଅଭିଷେକ ଶର୍ମାଙ୍କ ଉପରେ ନଜର ରହିବ । ଚମତ୍କାର ଫର୍ମରେ ରହିଥିବା ଅଭିଷେକ ଆଉ ଏକ ବିସ୍ଫୋରକ ଇନିଂସ ଖେଳିବା ଆଶା କରାଯାଉଛି । ସେ ଆଉ ୩୯ ରନ କଲେ ଟି-ଟ୍ୱେଣ୍ଟିରେ ଦ୍ରୁତତମ ଭାବେ ୧୦୦୦ ରନ ପୂରଣ କରିବେ । ସୂର୍ଯ୍ୟକୁମାର ଯାଦବ ୫୭୩ଟି ବଲ୍ ଖେଳି ୧୦୦୦ ରନ ପୂରଣ କରିଥିଲେ । ଅଭିଷେକ ଇତି ମଧ୍ୟରେ ୫୦୦ ବଲ୍ ଖେଳି ୯୬୧ ରନ ସଂଗ୍ରହ କରିସାରିଛନ୍ତି । ଏପର୍ଯ୍ୟନ୍ତ ଚମକ ଦେଖାଇ ନଥିବା ବାମ ହାତି ବ୍ୟାଟର ତିଳକ ବର୍ମା ଆଉ ୯ ରନ କଲେ ୧୦୦୦ ରନ ପୂରଣ କରିବେ ।
ଅଷ୍ଟ୍ରେଲିଆ ଅଧିନାୟକ ମିଚେଲ ମାର୍ଶଙ୍କୁ ଅଟକାଇବାର ଉପାୟ ଭାରତକୁ ମିଳି ସାରିଛି । ମାତ୍ର ଟିମ ଡେଭିଡ୍ ଓ ମାର୍କସ ଷ୍ଟଇନିସ୍ଙ୍କ ପାଇଁ ଭାରତୀୟ ବୋଲରଙ୍କୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ପଡ଼ିବ । ଉଭୟ ତୃତୀୟ ମ୍ୟାଚ୍ରେ ଅର୍ଦ୍ଧଶତକ ଅର୍ଜନ କରିଥିଲେ ।
ଟ୍ରେଭିସ୍ ହେଡ୍ ଓ ସିନ ଆବୋଟ୍ ଆସେସ ଦଳରେ ସ୍ଥାନ ପାଇଥିବାରୁ ଟି-ଟ୍ୱେଣ୍ଟି ଦଳରୁ ବାଦ ପଡ଼ିଛନ୍ତି । ତେଣୁ ଆଗାମୀ ୨ଟି ଯାକ ମ୍ୟାଚ୍ରେ ଉଭୟ ଖେଳିବେ ନାହିଁ । ହେଡ୍ଙ୍କ ଅନୁପସ୍ଥିତିରେ ମାଥ୍ୟୁ ସର୍ଟ ଓପନ କରିବା ନିଶ୍ଚିତ । ଗ୍ଲେନ ମ୍ୟାକ୍ସୱେଲ୍ ଦଳକୁ ଫେରିଥିଲେ ହେଁ ତୃତୀୟ ମ୍ୟାଚ୍ ଖେଳି ନଥିଲେ । ସେ ଏକାଦଶରେ ସ୍ଥାନ ପାଇବାର ଯଥେଷ୍ଟ ସମ୍ଭାବନା ରହିଛି । ଆବୋଟଙ୍କ ସ୍ଥାନରେ ବେନ ଡାର୍ସିୟସ ଖେଳିବା ଆଶା କରାଯାଉଛି । ଟସ ପୂର୍ବରୁ ସେ ଫିଟ୍ ହୋଇ ନପାରିଲେ ନବାଗତ ମାହଲି ବିୟର୍ଡମାନ ପଦାର୍ପଣ ସୁଯୋଗ ପାଇବେ । ମ୍ୟାକ୍ସୱେଲ ଗୋଟିଏ ୱିକେଟ୍, ଷ୍ଟଇନିସ ୨ଟି ଓ ଏଲିସ୍ ୩ଟି ୱିକେଟ୍ ନେଲେ ୫୦ ୱିକେଟ୍ କ୍ଲବ୍ରେ ସାମିଲ ହେବେ ।
କାରାରା ଗ୍ରାଉଣ୍ଡରେ ଆଜି ପର୍ଯ୍ୟନ୍ତ ମାତ୍ର ୨ଟି ଅନ୍ତର୍ଜାତୀୟ ଟି-ଟ୍ୱେଣ୍ଟି ଖେଳାଯାଇଛି । ତେଣୁ ପିଚ୍କୁ ନେଇ ପୂର୍ବାନୁମାନ କରି ହେବ ନାହିଁ । ଏଠାରେ ଖେଳାଯାଇଥିବା ବିଗ୍ ବାସ ଲିଗ ମ୍ୟାଚଗୁଡ଼ିକରେ ପ୍ରଚୁର ରନ ସଂଗୃହୀତ ହୋଇଛି । ତେଣୁ ବ୍ୟାଟରମାନେ ପିଚ୍ର ଭରପୁର ଫାଇଦା ଉଠାଇବା ଆଶା କରାଯାଇପାରେ ।
ସମ୍ଭାବ୍ୟ ଦଳ
ଭାରତ: ଅଭିଷେକ ଶର୍ମା, ଶୁଭମନ ଗିଲ୍, ସୂର୍ଯ୍ୟକୁମାର ଯାଦବ(ଅଧିନାୟକ), ତିଳକ ବର୍ମା, ଅକ୍ଷର ପଟେଲ, ୱାସିଂଟନ ସୁନ୍ଦର, ଜିତେଶ ଶର୍ମା, ଶିବମ ଦୁବେ, ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ, ଯଶପ୍ରୀତ ବୁମରା ।
ଅଷ୍ଟ୍ରେଲିଆ: ମାଥ୍ୟୁ ସର୍ଟ, ମିଚେଲ ମାର୍ଶ(ଅଧିନାୟକ), ଜୋସ ଇଂଲିଶ, ଟିମ ଡେଭିଡ୍, ମିଚେଲ ଓଏନ, ମାର୍କସ ଷ୍ଟଇନିସ, ଗ୍ଲେନ ମ୍ୟାକ୍ସୱେଲ୍, ଜାଭିୟର ବାର୍ଟଲେଟ୍, ବେନ ଡାର୍ସିୟସ, ନାଥାନ ଏଲିସ୍, ମାଟ କୁହ୍ନେମନ ।
