ମୁମ୍ବାଇ: ସହରରେ ଅଟୋରେ ଯାତ୍ରା କରିବା ମହଙ୍ଗା ହେବ । ଅଟୋ ରିକ୍ସା ଏବଂ ଟ୍ୟାକ୍ସି ଭଡ଼ା ବଢ଼ିଛି । ମୂଳ ଭଡ଼ା ଉପରେ ୩ ଟଙ୍କା ବଢ଼ିଥିବା ଜଣାପଡ଼ିଛି । ତେବେ ଏହି ବର୍ଦ୍ଧିତ ଭଡ଼ା ଫେବ୍ରୁଆରୀ ୧ରୁ ଲାଗୁ ହେବାକୁ ଯାଉଛି । ଭଡ଼ା ବଢ଼ାଇବାକୁ ମୁମ୍ବାଇ ମେଟ୍ରୋପଲିଟାନ୍ ରୋଡ୍ ଟ୍ରାନ୍ସପୋର୍ଟ (ଏମଏମଆରଟିଏ) ନିଷ୍ପତ୍ତି ନେଇଛି । ଗୁରୁବାର ଏନେଇ ଘୋଷଣା କରିବା ସହ ଏମଏମଆରଟିଏ ପକ୍ଷରୁ କୁହାଯାଇଛି ଯେ, ମୂଳ ଭଡ଼ା ଥିବା ୨୩ ଟଙ୍କାକୁ ୨୬ ଟଙ୍କା କରିଦିଆଯାଇଛି । ସେହିଭଳି କଳା ଓ ହଳଦିଆ ଟ୍ୟାକ୍ସି ଭଡ଼ାକୁ ୨୮ ଟଙ୍କାରୁ ୩୧ ଟଙ୍କାକୁ ବଢ଼ାଇ ଦିଆଯାଇଛି ।
ଏସି କ୍ୟାବ୍ର ମୂଳ ଭଡ଼ା ୪୦ ଥିବା ବେଳେ ଫେବ୍ରୁଆରୀ ୧ରୁ ଏହାର ଭଡ଼ା ୪୮ ଟଙ୍କା ହେବ । ମୁମ୍ବାଇରେ ପ୍ରତିଦିନ ପ୍ରାୟ ୨.୩ ଲକ୍ଷ ଅଟୋ ଏବଂ ୨୦ ହଜାର କଳା-ହଳଦିଆ ରଙ୍ଗର ଟ୍ୟାକ୍ସି ଗଡ଼ୁଛି । ଏହି ବର୍ଦ୍ଧିତ ଭଡ଼ା ମୁମ୍ବାଇ, ଥାଣେ, ନଭି ମୁମ୍ବାଇ, କଲ୍ୟାଣ, ବସାଇ-ବିରାର ଏବଂ ପାନଭେଲ୍ରେ ଲାଗୁ ହେବ ।
ସେୟାର ଅଟୋ ଏବଂ ଟ୍ୟାକ୍ସି ଭଡ଼ା ଏକ ଟଙ୍କା ବୃଦ୍ଧି ପାଇଛି । ସେପଟେ ମହାରାଷ୍ଟ୍ରର ରାଜ୍ୟ ପରିବହନ ପ୍ରାଧିକରଣ (ଏସଟିଏ) ବସ୍ ଭଡ଼ା ୧୪.୯୫ ପ୍ରତିଶତ ବଢ଼ାଇବାକୁ ଅନୁମତି ଦେଇଛି । ଏସଟିଏ ଅଧିନରେ ସର୍ବାଧିକ ୧୫ ହଜାର ବସ୍ ଚଳାଚଳ କରୁଥିବା ବେଳେ ପ୍ରତିଦିନ ୫୫ ଲକ୍ଷରୁ ଅଧିକ ଯାତ୍ରୀ ଯାତାୟତ କରୁଛନ୍ତି ।
