ନୂଆଦିଲ୍ଲୀ,୧୨।୬: ଅହମ୍ମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆର ବିମାନର ଟେକଅଫ୍ ସମୟରେ ଦୁର୍ଘଟଣା। ଏହି ଘଟଣା ସାରା ଦେଶକୁ ସ୍ତବ୍ଧ କରିଛି। ବିମାନରେ ଦୁଇ ପାଇଲଟ୍ଙ୍କ ସହ ମୋଟ ୨୪୨ ଆରୋହୀ ଥିଲେ। ସାରା ବିଶ୍ବର ବିମାନ ଉପରେ ନଜର ରଖୁଥିବା ସାଇଟ୍ ଫ୍ଲାଇଟ୍ ରାଡାର ଅନୁସାରେ, ବିମାନ ମଧ୍ୟାହ୍ନ ୧ଟା ୩୮ ମିନିଟ୍ରେ ଟେକଅଫ୍ କରିଥିଲା। ବିମାନର ଏକ ଭିଡିଓ ମଧ୍ୟ ଭାଇରାଲ ହେଉଛି। ଯେଉଁଥିରେ ଲ୍ୟାଣ୍ଡିଂ ଗିଅର(ଟାୟର) ଖୋଲା ଥିବାର ଦେଖିବାକୁ ମିଳୁଛି। ବିମାନ ଧିରେ ଧିରେ ତଳକୁ ଚାଲିଯାଇଥିଲା। ତା ପରେ ନିଆଁ ଦେଖିବାକୁ ମିଳିଲା। ଲଣ୍ଡନ ଯାଉଥିବା ଲମ୍ବା ଦୂରଗାମୀ ଏହି ବିମାନରେ ଉଡାଣ ପୂର୍ବରୁ ପ୍ରଚୁର ପରିମାଣ ଇନ୍ଧନ ଭରାଯାଇଥିଲା।
ବେସାମରିକା ବିମାନ ଚଳାଚଳ ବିଶେଷଜ୍ଞ ଓ ପୂର୍ବତନ ଓ୍ବିଙ୍ଗ କମାଣ୍ଡର ଆଲୋକ ସହାୟ ଏକ ସାକ୍ଷାତକାରରେ କହିଛନ୍ତି, ଭିଡିଓ ଦେଖି ଲାଗୁଛି ବିମାନକୁ ଇଞ୍ଜିନଠାରୁ ଥ୍ରଷ୍ଟ (ଉପରକୁ ଠେଲିବାକୁ ଶକ୍ତି) ମିଳୁନଥିଲା। ତେଣୁ ବିମାନ ଉପରକୁ ଉଠି ପାରିନଥିଲା। ଭିଡିଓରେ ଇଞ୍ଜିନରେ ନିଆଁ ଥିଲା କିନ୍ତୁ ଧୂଆଁ ଦେଖିବାକୁ ମିଳୁନି, ଏଥିରୁ କହିହେବ ବହୁତ ଗୁଡିଏ ପକ୍ଷୀ ବିମାନ ସହ ମାଡ଼ ହୋଇ ଇଞ୍ଜିନ ଭିତରେ ଫଶି ଯାଇଛନ୍ତି। ଯାଞ୍ଚ ପରେ ପ୍ରକୃତ କଥା ଜଣାପଡିବ, ତେବେ ବିମାନ ଉଡିବାକୁ ଶକ୍ତି ମିଳୁନଥିଲା। ତାହା ଉପରକୁ ଯାଇ ପାରୁନଥିଲା ଏହା ସମ୍ପୂର୍ଣ୍ଣ ସ୍ପଷ୍ଟ।
ସହାୟ କହିଛନ୍ତି ଅହମ୍ମଦାବାଦ ଏୟାରପୋର୍ଟ ବନ୍ଦ କରିବା ଏହି କଥାର ସଙ୍କେତ ଯେ, ଯାଞ୍ଚ ଟିମ୍ ଏହା ଦେଖିବା ପାଇଁ ରନଓ୍ବେ ଚେକ୍ କରିପାରନ୍ତି ଯେ, ଦୁର୍ଘଟଣାରେ ଏହାର କୌଣସି ଭୂମିକା ନାହିଁ ତ ? ସେ କହିଛନ୍ତି, ଟେକଅଫ୍ ସମୟରେ ଦୁର୍ଘଟଣା ଖୁବ୍ ଭୟଙ୍କର ହୋଇଥାଏ। କାରଣ ଏଥିରେ ଭରପୁର ଇନ୍ଧନ ରହିଥାଏ। ଭିଡିଓରେ ବିମାନର ଓ୍ବିଙ୍ଗସ୍ ଲେବଲ ଠିକ୍ ଅଛି। ସନ୍ତୁଳନ ବି ଠିକ୍ ଅଛି, କିନ୍ତୁ ତଳକୁ ଖସି ପଡିଲା। ଏହା ଦେଖିହେବ ଯେ, ବିମାନ ଇଞ୍ଜିନ ଉପରକୁ ଯିବାର ଶକ୍ତି ପାଉନଥିଲା। ବିମାନ ଟେକଅଫ୍ରେ ଏକ କ୍ରିଟିକାଲ ଷ୍ଟେଜରେ ଆସିଥାଏ। ଏହାକୁ ପାର କରିବା ପରେ ପାଇଲଟକୁ କିଛି ସମସ୍ୟା ଥିବା ଜଣାପଡିବା ପରେ ବି ସେ ଟେକଅଫ୍କୁ ରୋକନ୍ତି ନାହିଁ, କାରଣ ସେ ସ୍ଥିତିରେ ଅଧିକ କ୍ଷତି ହୋଇପାରେ। ଗୋଟିଏ ବି ଇଞ୍ଜିନ କାମ କରୁଥିଲେ ପାଇଲଟ ବିମାନକୁ ଉପରକୁ ନେଇ ପାରିଥାନ୍ତେ ଓ ଏମର୍ଜେନ୍ସି ସ୍ଥିତିରେ ବିମାନକୁ ଅବତରଣ କରିପାରିଥାନ୍ତେ। ଏହା ସ୍ପଷ୍ଟ ଯେ ବିମାନର ଇଞ୍ଜିନ ଫେଲ୍ ହୋଇଯାଇଥିଲା ଓ ଏହାକୁ ଥ୍ରଷ୍ଟ ମିଳୁନଥିଲା। ଇନ୍ଧନର ସପ୍ଲାଇ ଇଞ୍ଜିନ ପର୍ଯ୍ୟନ୍ତ ପହଁଞ୍ଚି ନପାରିବା ଏକ ସମ୍ଭାବିତ କାରଣ। ଏଭଳି ଟେକ୍ନିକାଲ ଏରର ବା ଇଲେକ୍ଟ୍ରିକାଲ ଫେଲଓ୍ବରର କାରଣ ହୋଇପାରେ।
