ବଲାଙ୍ଗିର,୧୫/୦୬: କଳାହାଣ୍ଡି ଜିଲ୍ଲା ଜୟପାଟଣା ପୁଲିସ୍ ଗତ ସପ୍ତାହକ ତଳେ ବେଆଇନ ଚାଲାଣ ଅଭିଯୋଗରେ ସାଢ଼େ ୬ ଟନ୍ ବିସ୍ପୋରକ ଜବତ କରିଥିଲା । ଏବେ ଉକ୍ତ ମାମଲାରେ ବଲାଙ୍ଗିର ଲିଙ୍କ୍ ବାହାରିଛି । ସବୁତକ ବିସ୍ଫୋରକ ବେଲପଡ଼ା ଥାନା କର୍ଲାବାହାଲିସ୍ଥିତ ଏକ୍ସପ୍ଲୋସିଭ ମେଗ୍ଜିନ (ବାରୁଦ ଗୋଦାମ) କଳିଙ୍ଗ ଆଣ୍ଡ କମ୍ପାନିରୁ ଯାଇଥିଲା । ଏହି ମାମଲାରେ ଜୟପାଟଣା କ୍ରସର ମାଲିକଙ୍କ ସମେତ ୫ଜଣଙ୍କୁ ପୁଲିସ୍ ଗିରଫ କରିଛି । ହେଲେ କମ୍ପାନିର ଅକ୍ୟୁପାୟର ପାର୍ଟନର ଅନୁପ ଅଗ୍ରୱାଲ ଏବଂ ଦୀପକ ଚନ୍ଦ ଜୈନ ଫେରାର ଅଛନ୍ତି । ଷ୍ଟକ ଅନିୟମିତତା ଏବଂ ଚାଲାଣ ଅନୁମତି ଉଲ୍ଲଂଘନ ଅଭିଯୋଗରେ କମ୍ପାନି ବିରୋଧରେ ମାମଲା ରୁଜୁ ହୋଇଛି । ବିଭିନ୍ନ ଦିଗକୁ ଆଧାର କରି ତଦନ୍ତ ଜାରି ଥିବା ଜଣେ ବରିଷ୍ଠ ପୁଲିସ୍ ଅଧିକାରୀ କହିଛନ୍ତି ।
ସୂଚନାଯୋଗ୍ୟ, ଗତ ୫ତାରିଖରେ ଜୟପାଟଣା ପୁଲିସ ଜଗନ୍ନାଥ କ୍ରସରରୁ ଦୁଇଟି ଚାରିଚକିଆରେ ଥିବା ସାଢ଼େ ୬ଟନ ବିସ୍ଫୋରକ ଜବତ କରିଥିଲା । ବେଆଇନ ବିସ୍ଫୋରକ ଗଚ୍ଛିତ ଅଭିଯୋଗରେ ପୁଲିସ କ୍ରସର ମ୍ୟାନେଜର ଜଗନ୍ନାଥ ତିୱାରୀ, ଟ୍ରକ ଡ୍ରାଇଭର ରଞ୍ଜନ କ୍ଷିତି, ପିକ୍ଅପ ଡ୍ରାଇଭର ଧର୍ମୁ ପୋଢ଼ ଏବଂ ଅରୁଣ କୁମାରକୁ ଗିରଫ କରିଥିଲା । ଫେରାର କ୍ରସର ମାଲିକ ବିକ୍ରମ ଗୁପ୍ତାକୁ ଗତ ଶୁକ୍ରବାର କଳାହାଣ୍ଡି ପୁଲିସ୍ ବିଶାଖାପାଟଣାରୁ ଗିରଫ କରିଥିଲା । ହେଲେ ବିସ୍ଫୋରକ ଯାଇଥିବା ଗୋଦାମ ପ୍ରତି କୋହଳ ମନୋଭାବ ପ୍ରଦର୍ଶନ କରାଯାଉଥିବା ଅଭିଯୋଗ ହେଉଛି ।
ଏପରିକି ପୁଲିସ୍ ସନ୍ଦିଗ୍ଧ କଳିଙ୍ଗ ଆଣ୍ଡ କମ୍ପାନିର କର୍ଲାବାହାଲିସ୍ଥିତ ଗୋଦାମ୍ର ଷ୍ଟକ ଏପର୍ଯ୍ୟନ୍ତ ଯାଞ୍ଚ କରି ନ ଥିବା ଜଣାପଡ଼ିଛି । କାରଣ ସମ୍ପୃକ୍ତ କମ୍ପାନିକୁ ପେଟ୍ରୋଲିୟମ୍ ଆଣ୍ଡ ଏକ୍ସପ୍ଲୋସିଭ ସେଫ୍ଟି ଅର୍ଗାନାଇଜେସନ (ପିଇଏସଓ) ରୁଲ୍ସ ଅନୁଯାୟୀ ମିଳିଥିବା ଅନୁମତି ଅନୁଯାୟୀ କ୍ଲାସ-୨ ନାଇଟ୍ରେଡ ମିକ୍ସଚର (ବିସ୍ଫୋରକ) ୯ ଟନ, କ୍ଲାସ-୬ ସେଫ୍ଟି ଫ୍ୟୁଜ ୨୦ହଜାର ମିଟର, କ୍ଲାସ-୬ ଡିଟୋନେଟିଂ ଫ୍ୟୁଜ ୫ହଜାର ମିଟର ଏବଂ କ୍ଲାସ-୬ର ଡିଟୋନେଟର ୪୪ ହଜାର ଖଣ୍ଡ ଏକାଥରକେ ମହଜୁଦ ରଖିପାରିବେ । ଜୟପାଟଣା ପୁଲିସ୍ ସାଢ଼େ ୬ ଟନ୍ ବିସ୍ଫୋରକ ଏବଂ ୧୧୫ଟି ଡିଟୋନେଟର ଜବତ କରିଛି । ଗୋଦାମରେ କେତେ ବିସ୍ଫୋରକ ଏବଂ ଡିଟୋନେଟର ବଳକା ରହିଛି³ ତାହା ଯାଞ୍ଚ କରାଯାଇ ଷ୍ଟକ୍ ସହ ତାଳମେଳ କରିବା କଥା । ହେଲେ ଘଟଣା ପରଠୁ ଗୋଦାମ୍ର ପାର୍ଟନର ଦ୍ୱୟ ଫେରାର ରହିଛନ୍ତି । ଯେଉଁଥିପାଇଁ ପୁଲିସ ଷ୍ଟକ୍ ଯାଞ୍ଚ କରି ନ ଥିବା ଜଣାପଡ଼ିଛି । ଜୟପାଟଣା ପୁଲିସ୍ ଏବଂ ବଲାଙ୍ଗିର ପୁଲିସ୍ ଉଭୟଙ୍କୁ ଖୋଜୁଛି । ସେମାନେ ଧରାପଡ଼ିବା ପରେ ଅନେକ ଗୁମର ପଦାକୁ ଆସିବ ବୋଲି କୁହାଯାଉଛି ।
