କଟକ ୧୦/୧୧: ବାଲିଯାତ୍ରାରେ ବୁଲୁଛି ପୋଷ୍ଟ୍ ଅଫିସ୍ ଲେଟର୍ ବକ୍ସ ମାସ୍କଟ୍ । ଅବିକଳ ଲେଟର ବକ୍ସ ଭଳି ହୋଇଥିବା ଏହି ମାସ୍କଟ୍ ଭିତରେ ଜଣେ ବ୍ୟକ୍ତି ରହିଥିବା ବେଳେ ପଡ଼ିଆ ସାରା ବୁଲୁଥିବା ଦେଖିବାକୁ ମିଳିଛି । ଏହି ମାସ୍କଟ୍କୁ ଦେଖିବାକୁ ଲୋକଙ୍କ ଭିଡ଼ ହେଉଥିବା ବେଳେ ପୁରୁଷଙ୍କଠାରୁ ଆରମ୍ଭ କରି ମହିଳାମାନେ ସେଲ୍ଫି ଉଠାଉଛନ୍ତି ।
ପ୍ରଥମ ଥର ପାଇଁ ବାଲିଯାତ୍ରା ତଳ ପଡ଼ିଆ ୧୨ ନମ୍ବର ଷ୍ଟଲ୍ରେ ହୋଇଥିବା ପୋଷ୍ଟ୍ ଅଫିସ୍ କାର୍ଯ୍ୟାଳୟ ପକ୍ଷରୁ ଏହି ମାସ୍କଟ୍ କରାଯାଇ ଡାକ ବିଭାଗରେ ହେଉଥିବା ସମସ୍ତ କାର୍ଯ୍ୟ ଏବଂ ଯୋଜନା ବିଷୟରେ ଲୋକଙ୍କୁ ସଚେତନ କରାଯାଉଛି । ଇଣ୍ଟରନେଟ୍ ଏବଂ ମୋବାଇଲ୍ ଯୁଗରେ ଡାକବାକ୍ସରେ ଚିଠି ପଠାଇବାର ଗୁରୁତ୍ୱ କମିଥିବା ବେଳେ ପୋଷ୍ଟ୍ ଅଫିସ୍ରେ ଡିଜିଟାଲ୍ କାରବାର ଅଧିକ ବଢ଼ିଛି । ଡାକ ଦ୍ୱାରା ସରକାରଙ୍କ ବିଭିନ୍ନ ଯୋଜନାରେ ହିତାଧିକାରୀମାନେ ଆର୍ଥିକ ସହାୟତାଠୁ ଆରମ୍ଭ କରି ଆଧାର ପରିଚୟପତ୍ର ପଞ୍ଜୀକରଣ ସହ ନୂଆ ଆଧାର କାର୍ଡ ଏବଂ ସଂଶୋଧନ କରାଯାଉଛି । ତେଣୁ ଲୋକଙ୍କ ଏହି ସବୁ କାର୍ଯ୍ୟ ଏବେ ସିଧାସଳଖ ବାଲିଯାତ୍ରା ପଡ଼ିଆରେ ଥିବା ଷ୍ଟଲ୍ରେ କରାଯାଉଛି । ତେଣୁ ଷ୍ଟଲ୍ରେ ଲୋକଙ୍କ ଭିଡ଼ ହେଉଛି । ପ୍ରତିଦିନ ଶହ ଶହ ସଂଖ୍ୟାରେ ଲୋକେ ଆଧାର କାର୍ଡ ପଞ୍ଜୀକରଣ କରିବା ସହ ପୋଷ୍ଟ୍ ଅଫିସ୍ ସମ୍ବନ୍ଧୀୟ ବିଭିନ୍ନ କାର୍ଯ୍ୟ କରି ଉପକୃତ ହେଉଛନ୍ତି ।
