ନୂଆଦିଲ୍ଲୀ: ଭାରତର ପଡ଼ୋଶୀ ଦେଶ ବାଂଲାଦେଶର ଜେଲରୁ ୨୭୦୦ ରୁ ଅଧିକ କଏଦୀ ଫେରାର ହୋଇଯାଇଛନ୍ତି। ଏଥି ମଧ୍ୟରୁ ପ୍ରାୟ ୭୦୦ କଏଦୀ କିଛି ମାସ ବିତିବା ପରେ ମଧ୍ୟ ଏବେ ଯାଏଁ ଫେରି ନାହାନ୍ତି। ଏହା ଜେଲ ପ୍ରଶାସନର ନିଦ ହଜାଇ ଦେଇଛି। ପଳାୟନ କରିଥିବା କଏଦୀ ମାନଙ୍କ ମଧ୍ୟରେ ଭୟଙ୍କର ଆତଙ୍କବାଦୀ ଏବଂ ହାର୍ଡକୋର୍ ଅପରାଧୀ ମଧ୍ୟ ଅଛନ୍ତି ।
ବାଂଲାଦେଶର ଜେଲ ବ୍ୟବସ୍ଥା ସମ୍ପର୍କରେ ଏହି ଆଶ୍ଚର୍ଯ୍ୟଜନକ ଖୁଲାସା ହୋଇଛି। ଦେଶର ସର୍ବୋଚ୍ଚ ଜେଲ ଅଧିକାରୀ କହିଛନ୍ତି ଯେ, ଜୁଲାଇ ୨୦୨୪ରେ ତତ୍କାଳୀନ ପ୍ରଧାନମନ୍ତ୍ରୀ ଶେଖ ହସିନାଙ୍କ ବିରୋଧରେ ଆରମ୍ଭ ହୋଇଥିବା ବ୍ୟାପକ ପ୍ରତିବାଦ ଏବଂ ହିଂସା ସମୟରେ ପ୍ରାୟ ୨୭୦୦ କଏଦୀ ବିଭିନ୍ନ ଜେଲରୁ ପଳାୟନ କରିଥିଲେ, ଯେଉଁଥିରୁ ପ୍ରାୟ ୭୦୦ କଏଦୀ ଏପର୍ଯ୍ୟନ୍ତ ଧରାପଡ଼ି ନାହାଁନ୍ତି। ଏହି ସୂଚନା ବାଂଲାଦେଶର ଜେଲ ମହାନିରୀକ୍ଷକ (ଆଇଜି ଜେଲ) ବ୍ରିଗେଡିୟର ଜେନେରାଲ ସୟଦ ମୁତାହର ହୁସେନ ମଙ୍ଗଳବାର ଦେଇଛନ୍ତି।
ହୁସେନ କହିଛନ୍ତି ଯେ, ପଳାୟନ କରିଥିବା କଏଦୀ ମାନଙ୍କ ମଧ୍ୟରୁ ଅନେକଙ୍କୁ ବହୁତ ବିପଦପୂର୍ଣ୍ଣ ବୋଲି ବିବେଚନା କରାଯାଏ। ଏଥିରେ କୋର୍ଟ ଦ୍ୱାରା ମୃତ୍ୟୁଦଣ୍ଡ ଦିଆଯାଇଥିବା ଅପରାଧୀ ମଧ୍ୟ ଅନ୍ତର୍ଭୁକ୍ତ ଅଛନ୍ତି । ଏହା ବ୍ୟତୀତ, ଏହି ପଳାୟନ କଏଦୀ ମାନଙ୍କ ମଧ୍ୟରେ ଅନେକ ଇସଲାମିକ ଆତଙ୍କବାଦୀ ମଧ୍ୟ ଅଛନ୍ତି।
ଗତ ବର୍ଷ ଜୁଲାଇରେ ସାରା ଦେଶରେ ଦେଖାଦେଇଥିବା ପ୍ରତିବାଦ ଏବଂ ରାଜନୈତିକ ଅସ୍ଥିରତା ମଧ୍ୟରେ ଅନେକ ଜେଲରେ ସୁରକ୍ଷା ବ୍ୟବସ୍ଥା ଭୁଶୁଡ଼ି ପଡ଼ିବା ପରେ ଏହି ଘଟଣା ସାମ୍ନାକୁ ଆସିଥିଲା। ଏହି ବିଶୃଙ୍ଖଳାର ସୁଯୋଗ ନେଇ ହଜାର ହଜାର କଏଦୀ ଜେଲରୁ ଖସି ପଳାଇଥିଲେ। ଏହି ପରିସ୍ଥିତି ବାଂଲାଦେଶର ଆଭ୍ୟନ୍ତରୀଣ ସୁରକ୍ଷା ଏବଂ ଜେଲ ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନ ଉଠାଇଥାଏ। ଏନେଇ ଅଧିକାରୀ ଜଣକ କହିଛନ୍ତି ଯେ, ଶହ ଶହ କଏଦୀ ଏବେ ବି ଜେଲ ବାହାରେ ଅଛନ୍ତି ଏବଂ ସେମାନଙ୍କୁ ଧରିବା ପାଇଁ ପ୍ରୟାସ ଜାରି ରହିଛି।
