ନୂଆଦିଲ୍ଲୀ,୨୪।୩: ବାଂଲାଦେଶର ପୂର୍ବତନ କ୍ୟାପଟେନ୍ ତମିମ ଇକବାଲଙ୍କୁ ହାର୍ଟ ଆଟାକ୍। ସୋମବାର ସେ ଢାକା ପ୍ରିମିୟର ଲିଗ୍(ଡିପିଏଲ)ରେ ଖେଳୁଥିବା ବେଳେ ହଠାତ ଅସୁସ୍ଥ ହୋଇପଡିଲେ। ତୁରନ୍ତ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିଥିବା ନେଇ ଜଣାପଡିଛି। ତମିମ ମୋହମ୍ମଡନ୍ ସ୍ପୋର୍ଟିଂ କ୍ଲବ ପକ୍ଷରୁ ଖେଳୁଥିଲେ। ଶିନେପୁକୁର କ୍ରିକେଟ କ୍ଲବ ବିପକ୍ଷରେ ଥିଲା ମ୍ୟାଚ୍। ଫିଲ୍ଡିଂ କରୁଥିବା ବେଳେ ସେ ହଠାତ ଛାତିରେ ଯନ୍ତ୍ରଣା ଅନୁଭବ କରିଥିଲେ।
୩୬ ବର୍ଷୀୟ ତମିମ୍ ଖେଳୁଥିବା ସମୟରେ ଅସୁସ୍ଥ ଅନୁଭବ କରିଥିଲେ। ଏହାପରେ ତାଙ୍କୁ ଚିକିତ୍ସା ପାଇଁ ମେଡିକାଲ ଟିମ୍ ପହଁଞ୍ଚିଥିଲେ। ଏହାପରେ ତାଙ୍କୁ ହେଲିକପ୍ଟର ଯୋଗେ ଢାକା ନେବାକୁ ଚେଷ୍ଟା କରାଯାଇଥିଲା। ତେବେ ତମିମ ଖୁବ୍ ଅସୁସ୍ଥ ହୋଇପଡିଥିଲେ, ସେ ହେଲିକପ୍ଟରକୁ ଚଢିବାର ସ୍ଥିତିରେ ବି ନଥିଲେ। ତେଣୁ ତାଙ୍କୁ ଢାକା ବଦଳରେ ନିକଟସ୍ଥ ଫାଜିଲ ତୁନ୍ନେସ ହସ୍ପତଟାଲକୁ ନିଆଯାଇଥିଲା।
ମୋହମ୍ମଡନ୍ ସ୍ପୋର୍ଟିଂ କ୍ଲବର ଅଧିକାରୀ କହିଛନ୍ତି, ତମିମ୍ ବର୍ତ୍ତମାନ ହସ୍ପିଟାଲର ଭର୍ତ୍ତି ଅଛି। ତାଙ୍କର ଅବସ୍ଥା ସେତେ ଭଲ ନାହିଁ। ଢାକା ପ୍ରିମିୟର ଲିଗ୍ର ବର୍ତ୍ତମାନର ସିଜିନ୍ରେ ସେ ଭଲ ଖେଳ ପ୍ରଦର୍ଶନ କରିଛନ୍ତି। ଚଳିତ ସିଜିନ୍ରେ ସବୁଠାରୁ ଅଧିକ ରନ୍ କରିଥିବା ଖେଳାଳି ସେ ଅଛନ୍ତି। ବାମ ହାତର ଏହି ବ୍ୟାଟର ୭ଟି ମ୍ୟାଚ୍ରେ ୭୩.୬୦ ଆଭରେଜ୍ ଓ ୧୦୨.୫୦ ଷ୍ଟ୍ରାଇକ୍ ରେଟ୍ରେ ୩୬୮ ରନ୍ କରିଥିଲେ। ସେଥିରେ ଦୁଇଟି ଶତକ ମଧ୍ୟ ରହିଛି।
ଉଲ୍ଲେଖନୀୟ ଯେ, ତମିମ୍ ଚାମ୍ପିଆନ୍ସ ଟ୍ରଫି ୨୦୨୫ ପୂର୍ବରୁ ଇଣ୍ଟରନ୍ୟାସନାଲ କ୍ରିକେଟରୁ ସନ୍ୟାସ ନେଇଥିଲେ। ତମିମ୍ ଜୁଲାଇ ୨୦୨୩ ରେ ମଧ୍ୟ ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ନେଇଥିଲେ, କିନ୍ତୁ ପରେ ସେ ନିଜର ମନ ବଦଳାଇ ଦେଇଥିଲେ। ତମିମ୍ ବାଂଲାଦେଶ ପାଇଁ ନିଜର ଶେଷ ମ୍ୟାଚ୍ ସେପ୍ଟେମ୍ବର ୨୦୨୩ ରେ ଖେଳିଥିଲେ। ତମିମଙ୍କ ଇଣ୍ଟରନ୍ୟାସନାଲ କ୍ୟାରିୟର ବିଷୟରେ ଯଦି କଥା ହେବା ତେବେ ସେ ୨୦୦୭ ରେ ଜିମ୍ବାଓ୍ବେ ବିପକ୍ଷରେ ଡେବ୍ୟୁ କରିଥିଲେ। ୭୦ଟି ଟେଷ୍ଟ ମ୍ୟାଚ୍ରେ ୩୮.୮୯ ଆଭରେଜ୍ରେ ୫୧୩୪ ରନ୍ କରିଥିଲେ। ସେଥିରେ ୧୦ଟି ଶତକ ଓ ୩୧ ଟି ଅର୍ଦ୍ଧଶତକ ରହିଛି। ସେଭଳି ୨୪୩ଟି ଦିନିକିଆ ମ୍ୟାଚ୍ରେ ତମିମ୍ ୩୬.୬୫ ଆଭରେଜ୍ରେ ୮୩୫୭ ରନ୍ କରିଥିଲେ। ଓ୍ବାନଡେ ଇଣ୍ଟରନ୍ୟାସନାଲରେ ତମିମ ୧୪ଟି ଶତକ ଓ ୫୬ ଟି ଅର୍ଦ୍ଧଶତ କରିଛନ୍ତି। ସେଭଳି ମୋଟ ୭୮ ଟି ଟି-୨୦ ଇଣ୍ଟରନ୍ୟାସନାଲ ଖେଳିଛନ୍ତି। ସେଥିରେ ୨୪.୦୮ ହାରରେ ୧୭୮୫ ର୍ କରିଛନ୍ତି। ଟି-୨୦ ରେ ତମିମ୍ଙ୍କ ନାଁରେ ଗୋଟିଏ ଶତକ ଏବଂ ୭ଟି ଅର୍ଦ୍ଧଶତକ ରହିଛି।
