ହିଟ୍ ଷ୍ଟ୍ରୋକ୍ରୁ ରୁହନ୍ତୁ ସୁରକ୍ଷିତ, ଆପଣାନ୍ତୁ ଏହି ସବୁ ପଦକ୍ଷେପ
ନୂଆଦିଲ୍ଲୀ ୨୬/୦୫: ବର୍ତ୍ତମାନ ଦେଶର ତଥା ରାଜ୍ୟରେ ଭୀଷଣ ଗ୍ରୀଷ୍ମ ପ୍ରବାହ ଲାଗି ରହିଛି । ସୂର୍ଯ୍ୟଙ୍କ ପ୍ରଖର କିରଣରେ ଶରୀରକୁ ଜାଳିଚାଲିଛି । ଯଦି ଦିନ ଦ୍ୱିପ୍ରହରରେ ବାହାରକୁ ବାହାରିବାକୁ ପଡେ, ତେବେ ହିଟ୍ ଷ୍ଟ୍ରୋକ୍ ବା ଲୁ ହେବାର ଆଶଙ୍କା ଖୁବ୍ ବଢିଯାଇଥାଏ, ଯାହା ପ୍ରାଣଘାତକ ମଧ୍ୟ ହୋଇପାରେ । ଏପରିକି ଡାଇରିଆ, ଟାଇଫଏଡ୍ ଓ ତ୍ୱଚା ସଂକ୍ରମଣ ଆଦି ହେବାର ଆଶଙ୍କା ମଧ୍ୟ ଉପୁଜିଥାଏ । ତେଣୁ ଏହି ଋତୁରେ ଅଧିକ ସାବଧାନତା ଅବଲମ୍ବନ କରିବା ଦ୍ୱାରା ହିଁ ହିଟ୍ ଷ୍ଟ୍ରୋକ୍ରୁ ରକ୍ଷା ପାଇପାରିବେ । ଯେପରିକି ସ୍ୱଚ୍ଛ ଖାଦ୍ୟ ଓ ଖରାରୁ ରକ୍ଷା ପାଇବା ପାଇଁ କିଛି ସାବଧାନତା ଅନୁକରଣ କଲେ ହିଁ ହିଟ୍ ଷ୍ଟ୍ରୋକ୍ରୁ ସୁରକ୍ଷିତ ରହିବେ ।
ଶରୀରର ସାଧାରଣ ତାପମାତ୍ରା ୯୫.୫ ଫାରେନ୍ହାଇଟ୍(୩୭ ଡିଗ୍ରୀ ସେଲ୍ସିୟସ୍) ହୋଇଥାଏ । ବାତାବରଣର ତାପମାତ୍ରା ୩୭ ଡିଗ୍ରୀରୁ ଅଧିକ ହେବା ଦ୍ୱାରା ଶରୀର ଏହାକୁ ନିୟନ୍ତ୍ରିତ କରିଥାଏ । ଫଳରେ ଶରୀରରୁ ଝାଳ ବାହାରେ । ବାତାବରଣର ତାପମାତ୍ରା ସାମାନ୍ୟଠାରୁ ୪/୫ ଡିଗ୍ରୀ ସେଲ୍ସିୟସ୍ ଅଧିକ ହେଲେ ଶରୀରକୁ ଏହା ନିୟନ୍ତ୍ରିତ କରିବା କଷ୍ଟ ହୋଇଥାଏ । ତେଣୁ ଶରୀରରେ ଥିବା ଗରମକୁ ନିୟନ୍ତ୍ରିତ କରୁଥିବା ବ୍ୟବସ୍ଥା ବିଗିଡି ଯାଇଥାଏ । ଫଳରେ ଗରମରୁ ଥକ୍କାପଣ, ବେହୋସ୍ ହେବା ଓ ଲୁ ଆଦି ସମସ୍ୟା ଉପୁଜିଥାଏ ।
ଲକ୍ଷଣ ଓ ସୁରକ୍ଷା :
ଅଧିକ ସୂର୍ଯ୍ୟକିରଣ ସଂସ୍ପର୍ଶରେ ଆସିବା ଦ୍ୱାରା ଶରୀରରେ ଜଳାଭାବ ଦେଖା ଦେଇଥାଏ । ଫଳରେ ଶୋଷ ଲାଗିବା ସହ ମୁଣ୍ଡବିନ୍ଧା ଆରମ୍ଭ ହୋଇଥାଏ । ଏହାବ୍ୟତୀତ ବାନ୍ତି, ମୁଣ୍ଡ ବୁଲାଇବା, ଜ୍ୱର ଓ ଅଧିକା ଝାଳ ବାହାରିବା ପରି ସମସ୍ୟା ଦେଖା ଦେଇଥାଏ । କେତେକ ଲୋକ ଗରମ ଯୋଗୁ ବେହୋସ୍ ମଧ୍ୟ ହୋଇଯାଇଥାନ୍ତି । ଅଧିକ ସମୟ ଗ୍ରୀଷ୍ମ ପ୍ରବାହରେ ରହିବା ଦ୍ୱାରା ଶରୀରରୁ ଝାଳ ବାହାରିବା ବନ୍ଦ ହୋଇଯାଇଥାଏ । ଏହା ହେଉଛି ସତର୍କ ଘଣ୍ଟି । ଝାଳ ନ ବାହାରିବା ହେଉଛି ହିଟ୍ ଷ୍ଟ୍ରୋକ୍ର ମୁଖ୍ୟ ଲକ୍ଷଣ । ଏହା ଦ୍ୱାରା କିଡ୍ନୀ, ଲିଭର୍ ଓ ଶରୀରର ମହତ୍ତ୍ୱପୂର୍ଣ୍ଣ ଅଙ୍ଗ ଖରାପ ହୋଇଯାଇପାରେ । ତେଣୁ ହିଟ୍ ଷ୍ଟ୍ରୋକ୍ର ସାମାନ୍ୟ ଆଭାସ୍ ମିଳିବା ମାତ୍ରେ ତୁରନ୍ତ ହସ୍ପିଟାଲ୍କୁ ଯିବା ଦରକାର । କାରଣ ଏହି ସମୟରେ ଶରୀରରକୁ ତୁରନ୍ତ ଥଣ୍ଡା ହେବା ଜରୁରି । ଶରୀରକୁ ଥଣ୍ଡା କରିବା ସହ ତାପମାତ୍ରାକୁ ନିୟନ୍ତ୍ରିତ କରିବା ଆବଶ୍ୟକ ।
ପିଲା ଓ ବୟସ୍କଙ୍କ ପାଇଁ କ୍ଷତିକାରକ :
ହିଟ୍ ଷ୍ଟ୍ରୋକ୍ ପିଲା ଓ ବୟସ୍କଙ୍କ ପାଇଁ ଅଧିକ କ୍ଷତିକାରକ । କାରଣ ସେମାନଙ୍କ ଶରୀରର ତାପମାତ୍ରା ନିୟନ୍ତ୍ରିତ ବ୍ୟବସ୍ଥା ସମ୍ପୂର୍ଣ୍ଣ ଫିଟ୍ ନଥାଏ । ଯଦି ଆପଣଙ୍କୁ ଅଧିକ କାମ କରିବାକୁ ପଡୁଥାଏ, ତେବେ ମାତ୍ରାଧିକ ଝାଳ ବାହାରିବା ସ୍ୱାଭାବିକ୍ । କିନ୍ତୁ ସେହି ଅନୁପାତରେ ଇଲେକ୍ଟ୍ରୋଲାଇଟ୍ ପାଣି ପିଇବା ମଧ୍ୟ ଜରୁରି । କାରଣ ଇଲେକ୍ଟ୍ରୋଲାଇଟ୍ରେ ପର୍ଯ୍ୟାପ୍ତ ମାତ୍ରାର ଖଣିଜ ପଦାର୍ଥ ରହିଥାଏ । ତେଣୁ ଖରାରେ ଓଆର୍ଏସ୍ ପାଣି ପିଇବାକୁ ପରାମର୍ଶ ଦିଆଯାଇଥାଏ, ଯାହା ଶରୀରରେ ଜଳର ମାତ୍ରାକୁ ସନ୍ତୁଳିତ କରି ରଖିଥାଏ ।
ରୁହନ୍ତୁ ସୁରକ୍ଷିତ :
ସକାଳ ୧୧ ଘଣ୍ଟାଠାରୁ ଦିନ ୩ଟା ମଧ୍ୟରେ ହିଟ୍ ଷ୍ଟ୍ରୋକ୍ ଆଶଙ୍କା ରହିଥାଏ । ବିଶେଷକରି ବୟସ୍କ, ମହିଳା ଓ ପିଲାମାନେ ଏହି ସମୟରେ ବାହାରକୁ ନ ବାହାରିବା ଉଚିତ୍ । ଯଦି ବାହାରକୁ ଯିବା ଖୁବ୍ ଜରୁରି ହୋଇଥାଏ, ତେବେ ମୁଣ୍ଡକୁ ଢାଙ୍କିବା ସହ ପର୍ଯ୍ୟାପ୍ତ ମାତ୍ରାର ପାଣି ବା ଜୁସ୍ ବ୍ୟବହାର କରିବା ଉଚିତ୍ । ସେହିପରି ଆଖିରେ କଳା ଚଷମା ବ୍ୟବହାର କରିବା ଦରକାର । ମାତ୍ରାଧିକ ଗ୍ରୀଷ୍ମ ପ୍ରବାହ ସମୟରେ କାମ କରିବାର ନିର୍ଘଣ୍ଟ ସମୟରେ ପରିବର୍ତ୍ତନ କରିବା ଉଚିତ୍ ।
ବିଶେଷ ଧ୍ୟାନ ଦିଅନ୍ତୁ :
-ଏସିରୁ ବାହାରି ଖରାକୁ ଯାଆନ୍ତୁ ନାହିଁ । କାରଣ ଶରୀରର ତାପମାତ୍ରାରେ ସନ୍ତୁଳନ ରକ୍ଷା କରିବା ଆଦୌ ସହଜ ହୁଏନା ।
-ଖରାରୁ ଆସି ହଠାତ୍ ଫ୍ରିଜ୍ ପାଣି ପିଅନ୍ତୁ ନାହିଁ । ନଚେତ୍ ଥଣ୍ଡା ହେବାର ଆଶଙ୍କା ରହିଥାଏ ।
-ପାରାସିଟମଲ୍ ନିଅନ୍ତୁ ନାହିଁ । ଯଦି ଖରାରେ ଜ୍ୱର ହୋଇଯାଏ, ତେବେ ପାରାସିଟମିଲ୍ ଖାଆନ୍ତୁ ନାହିଁ । ବରଂ ଥଣ୍ଡା ପାଣିରେ ସ୍ନାନ କରି ନିଅନ୍ତୁ । ଏହି ସମୟରେ ପାରାସିଟମଲ୍ କିଡ୍ନୀ ବା ଲିଭ୍ର ପାଇଁ ଘାତକ ହୋଇପାରେ ।
-ଆସ୍ଥାମା ରୋଗୀ ଅଧିକ ସତର୍କ ରୁହନ୍ତୁ । ବାତାବରଣରେ ଧୂଳିକଣା ବଢିବା ଯୋଗୁ ନିଶ୍ୱାସ ନେବାରେ ସମସ୍ୟା ହୋଇପାରେ । ତେଣୁ ଯଥାସମ୍ଭବ ସତର୍କ ରୁହନ୍ତୁ ।
