କୋଲକାତା: ବିହାରରେ ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନ (SIR) ପ୍ରକ୍ରିୟା ସମାପ୍ତ ହୋଇଛି । ଏହା ପରେ ପଶ୍ଚିମବଙ୍ଗରେ ଏହି ପ୍ରକ୍ରିୟା ଆରମ୍ଭ ହେବ ବୋଲି ଅନୁମାନ କରାଯାଉଛି । କିନ୍ତୁ ଏହା ସମ୍ଭବ ହୋଇପାରିବ ବୋଲି ମନେ ହେଉନାହିଁ ।  ସୂଚନା ଅନୁସାରେ, ବେଙ୍ଗଲ ସରକାର ଶୁକ୍ରବାର ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କୁ ଏକ ଚିଠି ଲେଖି ଏ ବିଷୟରେ ଅବଗତ କରାଇଛନ୍ତି । ସେହି ଚିଠିରେ, ରାଜ୍ୟର ମୁଖ୍ୟ ଶାସନ ସଚିବ ମନୋଜ ପନ୍ତ କହିଛନ୍ତି ଯେ, ରାଜ୍ୟ ଏପର୍ଯ୍ୟନ୍ତ SIR ପାଇଁ ପ୍ରସ୍ତୁତ ନାହିଁ ।  ତେଣୁ ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନ କରାଯାଇପାରିବ ନାହିଁ । ଏଥିପାଇଁ ଅତି କମରେ ଦୁଇ ବର୍ଷ ସମୟ ଲାଗିବ । 

ନିକଟରେ ରାଜ୍ୟର ମୁଖ୍ୟ ନିର୍ବାଚନ ଅଧିକାରୀ (ସିଇଓ) ନିର୍ବାଚନ କମିଶନଙ୍କୁ ଏକ ଚିଠି ଲେଖି ଜଣାଇଥିଲେ ଯେ, ପଶ୍ଚିମବଙ୍ଗ ଏସଆଇଆର ପାଇଁ ପ୍ରସ୍ତୁତ । କିନ୍ତୁ ଏବେ ସରକାର ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କ ଦାବିକୁ ଖଣ୍ଡନ କରିଛନ୍ତି ।  ମୁଖ୍ୟ ସଚିବ ନିର୍ବାଚନ ଆୟୋଗଙ୍କୁ ଚିଠି ପଠାଇ ରାଜ୍ୟର ସ୍ଥିତି ସ୍ପଷ୍ଟ କରିଛନ୍ତି । 

ସେ ସ୍ପଷ୍ଟ କରିଛନ୍ତି ଯେ, ସମୟ ଏପର୍ଯ୍ୟନ୍ତ ଆସିନାହିଁ । ଏହା ବ୍ୟତୀତ, ମୁଖ୍ୟ ସଚିବ ପନ୍ତ  ଦେଇଥିବା ଚିଠିରେ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି । ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ରାଜ୍ୟ ସରକାରଙ୍କ ବିନା ଅନୁମତିରେ କାହିଁକି ଚିଠି ପଠାଇଲେ ବୋଲି ସେ ମଧ୍ୟ ପ୍ରଶ୍ନ କରିଛନ୍ତି । ସେପଟେ ମମତା ସରକାରଙ୍କ ଏଭଳି ପଦକ୍ଷେପ ବିରୋଧରେ ମତ ଦେଇଛି ବିଜେପି । 

ବିଜେପି ନେତା ସୁକାନ୍ତ ମଜୁମଦାର କହିଛନ୍ତି, ‘ସବୁକିଛି ବୁଝି ହେଉଛି । ସେମାନେ ଯେକୌଣସି ଉପାୟରେ SIRକୁ ବନ୍ଦ କରିବାକୁ ବ୍ୟାକୁଳ । କାରଣ, ଯଦି ଭୋଟର ତାଲିକାର ଏକ ବ୍ୟାପକ ସଂଶୋଧନ ହୁଏ, ତେବେ ରୋହିଙ୍ଗ୍ୟାଙ୍କ ଭୋଟରେ ଜିତିଥିବା ଏହି ସରକାର ହାରିଯିବ । ତଥାପି, ଦେଶର ସାର୍ବଭୌମତ୍ୱ ରକ୍ଷା ପାଇଁ କମିଶନ ନିଶ୍ଚିତ ଭାବରେ ପଦକ୍ଷେପ ନେବେ।’

ଅନ୍ୟପକ୍ଷରେ, ତୃଣମୂଳ କଂଗ୍ରେସ ମୁଖପାତ୍ର ଅରୂପ ଚକ୍ରବର୍ତ୍ତୀ ଦାବି କରିଛନ୍ତି, ‘ଏସଆଇଆର ସହିତ ଏକ ନାଟକ ଚାଲିଛି। ରାହୁଲ ଗାନ୍ଧୀ ତଥ୍ୟ ଦେଇ ଭୋଟ ଚୋରିର ପର୍ଦ୍ଦାଫାସ କରିଛନ୍ତି । ନିର୍ବାଚନ କମିଶନ ପ୍ରଥମେ ତାଙ୍କୁ ଉତ୍ତର ଦେବା ଉଚିତ।’ ତେବେ ଏସଆଇଆରକୁ ନେଇ ନିର୍ବାଚନ କମିଶନ ଏବଂ ବିରୋଧୀଙ୍କ ମଧ୍ୟରେ ଦ୍ୱନ୍ଦ୍ୱ ବୃଦ୍ଧି ପାଉଛି। ବିହାରରେ ଏସଆଇଆର ପର୍ଯ୍ୟାୟ ସମାପ୍ତ ହେବାର କିଛି ସମୟ ପରେ ଏହି ଦ୍ୱନ୍ଦ୍ୱ ଆରମ୍ଭ ହୋଇଛି ।