ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣକୁ ନେଇ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି । ଏହାରି ମଧ୍ୟରେ ଆମେରିକା ଭାରତ ସହିତ ଏକ ବଡ଼ ସାମରିକ ଡିଲ୍ କରିଛି । ନିଜର ରଣନୈତିକ ସମ୍ବନ୍ଧ ଅନୁରୂପ ଆମେରିକା ଭାରତକୁ ୧୩୧ ମିଲି୍ୟନ ଡଲାରର ଗୁରୁତ୍ବପୂର୍ଣ୍ଣ ପ୍ରତିରକ୍ଷା ଉପକରଣ ଯୋଗାଇବା ଲାଗି ମଞ୍ଜୁରି ଦେଇଛି । ପେଣ୍ଟାଗନ୍ର ଏହି ନିଷ୍ପତ୍ତି ପରେ ପାକିସ୍ତାନରେ ହଇଚଇ ସୃଷ୍ଟି ହୋଇଛି ।
ଆମେରିକାର ରିଡଆଉଟ୍ ଅନୁସାରେ, ପେଣ୍ଟାଗନ ଅଧୀନରେ କାର୍ଯ୍ୟ କରୁଥିବା ପ୍ରତିରକ୍ଷା ସୁରକ୍ଷା ସହଯୋଗ ଏଜେନ୍ସି (DSCA) ସାମରିକ ଯୋଗାଣ ପାଇଁ ଆବଶ୍ୟକୀୟ ପ୍ରମାଣପତ୍ର ପ୍ରଦାନ କରିଛି ଏବଂ ସମ୍ଭାବ୍ୟ ବିକ୍ରୟ ବିଷୟରେ ଆମେରିକା କଂଗ୍ରେସକୁ ସୂଚିତ କରିଛି । ନୂଆଦିଲ୍ଲୀକୁ ଆମେରିକାରୁ ପ୍ରତିରକ୍ଷା ଉପକରଣ କ୍ରୟ ବୃଦ୍ଧି କରିବା ଉପରେ ଟ୍ରମ୍ପ ପ୍ରଶାସନ ଗୁରୁତ୍ବରୋପ କରିବା ମଧ୍ୟରେ ଏହି ଅପଡେଟ୍ ସାମ୍ନାକୁ ଆସିଛି ।
ଦୁଇ ଦେଶ ମଧ୍ୟରେ ହୋଇଥିବା ଏହି ଚୁକ୍ତି ପରେ ଭାରତ ଏବଂ ଆମେରିକା ମଧ୍ୟରେ ରଣନୈତିକ ସହଭାଗୀତା ଆହୁରି ମଜବୁତ ହେବ। ଆମେରିକା ଭାରତକୁ ପ୍ରତିରକ୍ଷା ଉପକରଣ ଯୋଗାଣକୁ ଅନୁମୋଦନ କରିବା ପରେ ଏକ ରିପୋର୍ଟରେ କୁହାଯାଇଛି ଯେ, ଭାରତ "ସି-ଭିଜନ ସଫ୍ଟୱେର୍", "ରିମୋଟ୍ ସଫ୍ଟୱେର୍" ଏବଂ "ଆନାଲିଟିକାଲ୍ ସପୋର୍ଟ" କ୍ରୟ କରିବା ସହିତ "ସି-ଭିଜନ" ଡକ୍ୟୁମେଣ୍ଟ ଏବଂ ଲଜିଷ୍ଟିକ୍ସର ଅନ୍ୟାନ୍ୟ ସମ୍ବନ୍ଧିତ ଉପାଦାନ କ୍ରୟ ପାଇଁ ଆଗ୍ରହ ପ୍ରକାଶ କରିଥିଲା । ସେପଟେ ପ୍ରସ୍ତାବିତ ଯୋଗାଣ ସମ୍ପର୍କରେ ଭାରତୀୟ ଅଧିକାରୀଙ୍କ ପକ୍ଷରୁ କୌଣସି ମନ୍ତବ୍ୟ ଦିଆଯାଇ ନାହିଁ।
