ନୂଆଦିଲ୍ଲୀ, ୬।୧୧: ବିହାର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ପାଇଁ ଗୁରୁବାର ମତଦାନ ଆରମ୍ଭ ହୋଇଛି । ୧୮ଟି ଜିଲ୍ଲାର ୧୨୧ଟି ଆସନ ପାଇଁ ମୈଦାନରେ ଅଛନ୍ତି ୧,୩୧୪ ଜଣ ପ୍ରାର୍ଥୀ । ଦୁଲାରଚାନ୍ଦ ଯାଦବଙ୍କ ହତ୍ୟା ପରେ, ସମସ୍ତଙ୍କ ନଜର ବାହୁବଳୀ ଅନନ୍ତ ସିଂହଙ୍କ ମୋକାମା ନିର୍ବାଚନମଣ୍ଡଳୀ ଉପରେ, ଯେଉଁଠାରେ ପ୍ରଥମ ପର୍ଯ୍ୟାୟରେ ଭୋଟ୍ ଗ୍ରହଣ ହେଉଛି । ପ୍ରଥମ ପର୍ଯ୍ୟାୟରେ, ସୁରଜ ଭାନ ସିଂହଙ୍କ ପତ୍ନୀ ବୀଣା ଦେବୀ ମୋକାମା ନିର୍ବାଚନମଣ୍ଡଳୀରେ ଅନନ୍ତ ସିଂହଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରୁଛନ୍ତି । କହିରଖୁଛୁ ଯେ, ପ୍ରଥମ ପର୍ଯ୍ୟାୟରେ କେବଳ ମୋକାମା ବିଧାନସଭା ଆସନ ଗୋଟିଏ ନୁହେଁ, ବରଂ ଅଧ ଡଜନରୁ ଅଧିକ ଆସନରେ ବାହୁବଳୀ ନେତା କିମ୍ୱା ତାଙ୍କ ପରିବାର ପ୍ରତିଦ୍ୱନ୍ଦ୍ୱିତା କରୁଛନ୍ତି ।
ମୋକାମା ଆସନରେ ବାହୁବଳୀ ବନାମ ବାହୁବଳୀ:
ଦୁଲାରଚାନ୍ଦ ଯାଦବଙ୍କ ହତ୍ୟା ପରେ, ବିହାରର ହଟ୍ ସିଟ୍ ପାଲଟିଛି ମୋକାମା ବିଧାନସଭା । ଜେଡିୟୁର ଶକ୍ତିଶାଳୀ ପ୍ରାର୍ଥୀ ଅନନ୍ତ ସିଂହଙ୍କ ଉପରେ ଦୁଲାରଚାନ୍ଦ ଯାଦବଙ୍କ ହତ୍ୟା ଅଭିଯୋଗ ରହିଛି, ଯାହା ଫଳରେ ତାଙ୍କୁ ଗିରଫ କରାଯିବା ପରେ ଜେଲ୍ ପଠାଯାଇଛି । ଅନନ୍ତ ସିଂହ ଲଗାତାର ୪ ଥର ମୋକାମା ଆସନରୁ ବିଧାୟକ ଅଛନ୍ତି, କିନ୍ତୁ ଏଥର ଆରଜେଡି ଟିକେଟରେ ମୁକାବିଲା କରୁଥିବା ବାହୁବଳୀ ନେତା ସୂରଜ ଭାନ ସିଂହଙ୍କ ପତ୍ନୀ ବୀଣା ଦେବୀଙ୍କ ସହ ଅନନ୍ତ ସିଂହଙ୍କ କଡ଼ା ଟକ୍କର । ୨୫ ବର୍ଷ ପୂର୍ବେ ୨୦୦୦ ମସିହାରେ ବୀଣା ଦେବୀଙ୍କ ସ୍ୱାମୀ ସୂରଜ ଭାନ ସିଂହ ଅନନ୍ତ ସିଂହଙ୍କ ଭାଇ ଦିଲୀପ ସିଂହଙ୍କୁ ପରାସ୍ତ କରିଥିଲେ । ଏବେ ତାଙ୍କ ପତ୍ନୀ ବୀଣା ଦେବୀ ଜେଡିୟୁର ନେତା ଅନନ୍ତ ସିଂହଙ୍କ ବିପକ୍ଷରେ ନିଜର ଶକ୍ତି ପ୍ରଦର୍ଶନ କରୁଛନ୍ତି ।
ଏକମା ଆସନରେ ବାହୁବଲୀ ଧୁମଲ ସିଂ:
ଏବେ ସମସ୍ତଙ୍କ ନଜର ସାରଣ ଜିଲ୍ଲାର ଏକମା ବିଧାନସଭା ଆସନ ଉପରେ ମଧ୍ୟ ରହିଛି, ଯେଉଁଠାରେ ଜେଡିୟୁ ଟିକେଟରେ ପ୍ରତିଦ୍ୱନ୍ଦ୍ୱିତା କରୁଛନ୍ତି ବାହୁବଳୀ ନେତା ମନୋରଞ୍ଜନ ସିଂହ ଓରଫ୍ ଧୂମଲ ସିଂହ । ଧୂମଲ ସିଂହ ୨୦୧୦ ଏବଂ ୨୦୧୫ରେ ଏହି ଆସନରୁ ଜେଡିୟୁର ବିଧାୟକ ରହିଛନ୍ତି, କିନ୍ତୁ ଗତ ନିର୍ବାଚନରେ ସେ ଆରଜେଡିର ଶ୍ରୀକାନ୍ତ ଯାଦବଙ୍କ ଦ୍ୱାରା ପରାସ୍ତ ହୋଇଥିଲେ । ଏଥର ଧୂମଲ ସିଂହ ଏବଂ ଶ୍ରୀକାନ୍ତଙ୍କ ମଧ୍ୟରେ କଡ଼ା ମୁକାବିଲା ହେବ ବୋଲି ଆଶା କରାଯାଉଛି । ଜେଡିୟୁରୁ ଏକମା ଆସନରେ ଧୂମଲ ସିଂହ ପ୍ରତିଦ୍ୱନ୍ଦ୍ୱିତା କରୁଥିବାବେଳେ ଆରଜେଡିରୁ ଶ୍ରୀକାନ୍ତ ଯାଦବ, ଜନ ସୂରଜ ପାର୍ଟିରୁ ଦେବ କୁମାର ସିଂହ ଏବଂ ବିଏସପିରୁ ଲକ୍ଷ୍ମଣ ମାଞ୍ଝି ପ୍ରତିଦ୍ୱନ୍ଦ୍ୱିତା କରୁଛନ୍ତି ।
ଜେଡିୟୁର ବାହୁବଳୀ ନେତା ଅମରେନ୍ଦ୍ର ପାଣ୍ଡେ, ଯିଏ ପପୁ ପାଣ୍ଡେ ନାଁରେ ମଧ୍ୟ ଜଣାଶୁଣା । ଗୋପାଳଗଞ୍ଜର କୁଚାୟକୋଟ ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି ଅମରେନ୍ଦ୍ର । ୨୦୧୦ ମସିହାରୁ ଲଗାତାର ନିର୍ବାଚନ ଜିତି ଏହି ଆସନରୁ ବିଜୟର ହ୍ୟାଟ୍ରିକ୍ ହାସଲ କରିସାରିଛନ୍ତି । ଏଥର ମହାଗଠବନ୍ଧନର ଅଂଶ କଂଗ୍ରେସ ଦୁବାଇର ବ୍ୟବସାୟୀ ହରିନାରାୟଣ ସିଂହ କୁଶୱାହାଙ୍କୁ ପ୍ରାର୍ଥୀ କରିଛି । ଅମରେନ୍ଦ୍ର ପାଣ୍ଡେଙ୍କ ଏକାଧିକ ଅପରାଧିକ ମାମଲା ସହ ଜଡ଼ିତ । ଟ୍ରିପଲ୍ ମର୍ଡର, ଗୁଳିକାଣ୍ଡ, ଦାଦାବଟି ଆଦାୟ ଏବଂ ଡକାୟତି ଭଳି ଗମ୍ଭୀର ଅଭିଯୋଗରେ ୧୪ଟି ମାମଲାରେ ତାଙ୍କ ନାଁ ରହିଛି । କିନ୍ତୁ, ସେଗୁଡ଼ିକ ମଧ୍ୟରୁ କୌଣସିଟିରେ ତାଙ୍କୁ ଦୋଷୀ ସାବ୍ୟସ୍ତ କରାଯାଇନାହିଁ । ଏହା ବ୍ୟତୀତ, ତାଙ୍କ ବଡ଼ ଭାଇ ସତୀଶ ପାଣ୍ଡେ ମଧ୍ୟ ୧୯୯୦ ଦଶକର ଅନେକ ଗମ୍ଭୀର ମାମଲାରେ ଜଡ଼ିତ ଅଛନ୍ତି । ମନ୍ତ୍ରୀ ବ୍ରଜ ବିହାରୀ ପ୍ରସାଦଙ୍କ ହତ୍ୟାକାଣ୍ଡ ଏବଂ ଚାଡ଼ି ହତ୍ୟାକାଣ୍ଡ ଭଳି ମାମଲାରେ ତାଙ୍କ ନାଁ ଚର୍ଚ୍ଚାରେ ଥିଲା । ଏଭଳି ପରିସ୍ଥିତିରେ ବାହୁବଳୀ ନେତା ଅମରେନ୍ଦ୍ର ବିଜୟୀ ହେବେ ନାଁ କ୍ଲିନ-କଟ୍ ହରିନାରାୟଣ କୁଶୱାହା ଜିତିବେ ତାହା ଦେଖିବାକୁ ବାକି ରହିଲା ।
ଦାନାପୁରରେ ରିତଲାଲ ଯାଦବଙ୍କ ପରୀକ୍ଷା:
ଆରଜେଡି ଟିକେଟରେ ଦାନାପୁର ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଥିବା ଶକ୍ତିଶାଳୀ ରିତଲାଲ ଯାଦବ ଜେଲ୍ରେ ଅଛନ୍ତି । ଏଥର ତାଙ୍କର ମୁକାବିଲା ବିଜେପିର ରାମକ୍ରିପାଲ ଯାଦବଙ୍କ ସହ, ଯିଏ ଲାଲୁ ଯାଦବଙ୍କ ଡାହାଣ ହାତ ଥିଲେ । ଏଥିସହ ସେ ପାଟଳୀପୁତ୍ର ଲୋକସଭା ଆସନରୁ ବହୁବାର ସାଂସଦ ଭାବରେ ମଧ୍ୟ ବିବେଚିତ ହୋଇଥିଲେ । ଏଥର ଦାନାପୁରର ମୈଦାନରେ ପ୍ରତିଦ୍ୱନ୍ଦୀ ଅଛନ୍ତି ଯାଦବ ବନାମ ଯାଦବ । ଏଥିଯୋଗୁଁ ଲାଲୁ ଯାଦବ ଭୋଟରଙ୍କୁ ବାହୁବଳୀ ନେତା ରିତଲାଲ ଯାଦବଙ୍କୁ ସମର୍ଥନ କରିବାକୁ ନିବେଦନ କରିଛନ୍ତି । ଆରଜେଡି ପାଇଁ ଏକ ସମ୍ମାନର ଲଢ଼େଇ ପାଲଟିଛି ପାଟନାର ଦାନାପୁର ଆସନ । ଲାଲୁ ଯାଦବ ଏଠାରୁ ଦୁଇ ଦୁଇ ଥର ବିଧାୟକ ହୋଇଛନ୍ତି । ଏହି ଆସନ ପାଟଳିପୁତ୍ର ସଂସଦୀୟ କ୍ଷେତ୍ର ଅଧୀନରେ, ଯେଉଁଠାରେ ଲାଲୁ ଯାଦବଙ୍କ ବଡ଼ ଝିଅ ମିସା ଭାରତୀ ଲୋକସଭା ସାଂସଦ । ଏହି କାରଣରୁ ଲାଲୁ ଯାଦବ ଦାନାପୁର ଆସନରେ ରିତଲାଲଙ୍କ ବିଜୟ ପାଇଁ ସମର୍ଥନ ସଂଗ୍ରହ କରି ରାମକ୍ରିପାଲଙ୍କ ବିରୋଧରେ ନିଜ ପରାଜୟର ପ୍ରତିଶୋଧ ନେବାକୁ ଚାହୁଁଛନ୍ତି ।
ଦୀର୍ଘ ଦିନ ଧରି ସିୱାନରେ ଚାଲିଥିଲା ବାହୁବଳୀ ଶାହାବୁଦ୍ଦିନଙ୍କ ରାଜନୀତି । ଏବେ ତାଙ୍କ ପୁଅ ଓସାମା ଶାହାବ, ପ୍ରଥମ ପର୍ଯ୍ୟାୟରେ କଠିନ ପରୀକ୍ଷାର ସମ୍ମୁଖୀନ ହୋଇ ଶାହାବୁଦ୍ଦିନଙ୍କ ଐତିହ୍ୟକୁ ବହନ କରିବା ପାଇଁ ନିର୍ବାଚନୀ ମୈଦାନକୁ ଓହ୍ଲାଇଛନ୍ତି । ଦୁଇଥର ବିଧାୟକ ହରିଶଙ୍କର ଯାଦବଙ୍କ ଟିକେଟ କାଟି ଆରଜେଡି ରଘୁନାଥପୁର ବିଧାନସଭା ଆସନରୁ ଓସାମା ଶାହାବଙ୍କୁ ପ୍ରାର୍ଥୀ କରିଛି । ଜେଡିୟୁ ରଘୁନାଥପୁର ଆସନରୁ ଓସାମାଙ୍କ ବିରୁଦ୍ଧରେ ବିକାଶ କୁମାର ସିଂହଙ୍କୁ ପ୍ରାର୍ଥୀ କରିଛି । ଅନ୍ୟପଟେ ରାହୁଲ କୁମାର ସିଂହ ପ୍ରଶାନ୍ତ କିଶୋରଙ୍କ ଜନ ସୂରଜ ପାର୍ଟିରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି । ସାହାବୁଦ୍ଦିନଙ୍କ ପରେ, ତାଙ୍କ ପତ୍ନୀ ହିନା ଶାହାବ ୪ ଥର ଲୋକସଭା ନିର୍ବାଚନ ଲଢ଼ିଥିଲେ କିନ୍ତୁ ଜିତିପାରି ନଥିଲେ ତାଙ୍କ ପୁଅ ନିର୍ବାଚନ ମୈଦାନରେ ଓହ୍ଲାଇଛନ୍ତି ।
ପ୍ରଭୁନାଥ ସିଂହଙ୍କ ପୁଅଙ୍କ ପାଇଁ ଅଗ୍ନିପରୀକ୍ଷା:
ସାରଣ ରାଜନୀତିରେ ବାହୁବଳୀ ପ୍ରଭୁନାଥ ସିଂହଙ୍କ ନାଁ ପରିଚିତ ଥିଲା । ସାରଣ ରାଜନୀତି ପ୍ରଭୁନାଥ ସିଂହଙ୍କ ସହିତ ଘନିଷ୍ଠ ଭାବରେ ଜଡ଼ିତ ଥିଲା । ତାଙ୍କ ଐତିହ୍ୟକୁ ଆଗକୁ ବଢ଼ାଇବା ପାଇଁ ରଣଧୀର ସିଂହ ଏଥର ମୈଦାନକୁ ଓହ୍ଲାଇଛନ୍ତି । ରଣଧୀର ସିଂହ ଜେଡିୟୁ ଟିକେଟରେ ମାଞ୍ଝି ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି । ମହାଗଠବନ୍ଧନରୁ ସିପିଆଇ(ଏମ୍)ର ସତ୍ୟେନ୍ଦ୍ର ଯାଦବଙ୍କ ସହ ତାଙ୍କର କଡ଼ା ମୁକାବିଲା । ଅନ୍ୟପଟେ ୱାଇଭି ଗିରି ଜନ ସୂରଜ ପାର୍ଟିରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି । ସତ୍ୟେନ୍ଦ୍ର ଯାଦବ ୨୦୨୦ ମସିହାରେ ବିଧାୟକ ହୋଇଥିଲେ ଏବଂ ଏବେ ତାଙ୍କର ଦ୍ୱିତୀୟ କାର୍ଯ୍ୟକାଳ ପାଇଁ ଚେଷ୍ଟା କରୁଛନ୍ତି, କିନ୍ତୁ ବାହୁବଳୀ ପ୍ରଭୁନାଥ ସିଂହଙ୍କ ପୁଅ ରଣଧୀର ସିଂହଙ୍କ ପ୍ରତିଷ୍ଠା ବାଜିରେ ଲାଗିଛି । ପୂର୍ବତନ ସାଂସଦ ପ୍ରଭୁନାଥ ସିଂହ ବର୍ତ୍ତମାନ ମଶରକ ତତ୍କାଳୀନ ବିଧାୟକ ଅଶୋକ ସିଂହଙ୍କ ହତ୍ୟା ମାମଲାରେ ପାଇଁ ଜେଲ୍ରେ ଅଛନ୍ତି ।
