ବିହାର: ପାଟନାର ମନେରରେ ଥିବା ଆମନାବାଦ କଟେସରରେ ବେଆଇନ୍ ବାଲି ଚାଲାଣକୁ ନେଇ ଦୁଇ ଗୋଷ୍ଠୀଙ୍କ ମଧ୍ୟରେ ଗୁଳିବିନିମୟ ହୋଇଛି । ଏହି ଗୁଳି ବିନିମୟରେ ୪ ଜଣ ପ୍ରାଣ ହରାଇଛନ୍ତି । ଏଥିସହ ଅନେକ ଲୋକ ଆହତ ମଧ୍ୟ ହୋଇଛନ୍ତି । ବେଆଇନ ବାଲି ଖନନକୁ ନେଇ ଏହି ଅଞ୍ଚଳରେ ଦୁଇ ଦଳ ମଧ୍ୟରେ ଲଗାତାର ଗୁଳି ବିନିମୟ ହେଉଛି ।

ସୂଚନାଥାଉକି, ଯେ ବିହାରରେ କ୍ରମାଗତ ଭାବେ ଅପରାଧିକ ମାମଲା ସାମ୍ନାକୁ ଆସୁଛି । ବିହାରର ବେଗୁସରାଇ ଜିଲ୍ଲାରେ ସେପ୍ଟେମ୍ବର ୧୩ ତାରିଖରେ ଦୁଇଟି ମୋଟରସାଇକେଲରେ ଚାରି ଜଣ ବ୍ୟକ୍ତି ବେଗୁସରାଇର ବିଭିନ୍ନ ସ୍ଥାନରେ ଯାତ୍ରୀମାନଙ୍କ ଉପରେ ଗୁଳି ଚଳାଇଥିଲେ । ଏଥିରେ ଜଣେ ୩୦ ବର୍ଷିୟ ବ୍ୟକ୍ତିଙ୍କର ମୃତ୍ୟୁ ହୋଇଥିବା ବେଳେ ୧୧ ଜଣ ଆହତ ହୋଇଥିଲେ । ଏହା ପରେ ମାଟିହାନି ଅଞ୍ଚଳରେ ସଶସ୍ତ୍ର ଦୁର୍ବୃତ୍ତମାନେ ଆକାଶକୁ ଫାଙ୍କା ଗୁଳି ଚଳାଇଥିଲେ ।

ସେହିପରି ବିହାରର କଟିହାର ଜିଲ୍ଲାର ଗ୍ରାମବାସୀଙ୍କ ଦ୍ବାରା ହୋଇଥିବା ଆକ୍ରମଣରେ ଦୁଇଜଣ ଥାନା ଅଧିକାରୀଙ୍କ ସମେତ ୭ ଜଣ ପୋଲିସ କର୍ମଚାରୀ ଆହତ ହୋଇଥିଲେ । ହାଜତ ମୃତ୍ୟୁ ଖବର ପାଇବା ପରେ ପୋଲିସ ଷ୍ଟେସନରେ ପହଞ୍ଚି ଗ୍ରାମବାସୀ ଏହି ବିକ୍ଷୋଭ ପ୍ରଦର୍ଶନ କରିବା ସହ ପରିସରରେ ରଖାଯାଇଥିବା ଗାଡିଗୁଡ଼ିକୁ ମଧ୍ୟ ନଷ୍ଟ କରିଦେଇଥିଲେ ।