ବ୍ରହ୍ମପୁର,୨୧/୭(ବ୍ୟୁରୋ):ଜନ ସମୁଦ୍ର ପାଲଟିଲା ଖଲିକୋଟ ବିଶ୍ଵବିଦ୍ୟାଳୟ ଠାରୁ ଆରଡିସି କାର୍ଯ୍ୟାଳୟ ରାସ୍ତା। ନାରୀ ସୁରକ୍ଷା ନେଇ ରଣ ହୁଙ୍କାର ଦେଲା ବିଜେଡି। ଏହିପରି କିଛି ଚିତ୍ର ବ୍ରହ୍ମପୁର ସହରରେ ଦେଖିବାକୁ ମିଳିଛି। ବିପର୍ଯ୍ୟସ୍ତ ଆଇନ ଶୃଙ୍ଖଳାକୁ ସୁଧାରିବା ସମେତ ପୀଡ଼ିତାଙ୍କୁ ନ୍ୟାୟ ପ୍ରଦାନ ଓ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ବିଜେଡି ଦାବି କରିଛି। ଏ ନେଇ ଦକ୍ଷିଣାଞ୍ଚଳର ୯ ଜିଲ୍ଲାର ମହିଳା ଓ ଦଳିତ କର୍ମକର୍ତ୍ତାଙ୍କୁ ନେଇ ବ୍ରହ୍ମପୁର ଆରଡିସି ଅଫିସ ଘେରାଉ କରିଥିଲେ।
ଖଲିକୋଟ ବିଶ୍ଵବିଦ୍ୟାଳୟ ଖେଳ ପଡ଼ିଆରେ ବିଜେଡି ନେତାମାନେ ଏକତ୍ରିତ ହୋଇଥିଲେ। ଗଞ୍ଜାମ, ଗଜପତି, କନ୍ଧମାଳ, ରାୟଗଡ଼ା, ମାଲକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି ଓ ନୂଆପଡା ଜିଲ୍ଲାର ବରିଷ୍ଠ ନେତୃବୃନ୍ଦ ଓ କର୍ମକର୍ତ୍ତାଙ୍କୁ ନେଇ ଶୋଭାଯାତ୍ରା ବାହାରିଥିଲା। ଆରଡିସିଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲା। ପୂର୍ବରୁ ପୁଲିସ ପକ୍ଷରୁ ଭିଡ ନିୟନ୍ତ୍ରଣ କରିବାକୁ ବ୍ୟାରିକେଟିଂ କରା ଯାଇଥିଲା। ପ୍ରଥମେ ବିଜେଡ଼ି କର୍ମୀମାନେ ବ୍ୟାରିକେଟ ଭାଙ୍ଗି ଧସେଇ ପଶିବାକୁ ଚେଷ୍ଟା କରିଥିଲେ। ଅଧଘଣ୍ଟା ଧରି ପୁଲିସ ଓ ବିଜେଡି କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏହାପରେ ଦଳୀୟ ନେତୃବୃନ୍ଦଙ୍କ ନିର୍ଦ୍ଦେଶ ଅନୁସାରେ ବରିଷ୍ଠ ନେତା ମାନେ ଦାବିପତ୍ର ପ୍ରଦାନ କରିବାକୁ ଆରଡିସି ଙ୍କ ନିକଟକୁ ଯାଇଥିଲେ।
ଏହି ଦାବିପତ୍ର ପ୍ରଦାନ ସମୟରେ ବରିଷ୍ଠ ନେତା ସଞ୍ଜୟ ଦାସବର୍ମା, ଚନ୍ଦ୍ର ଶେଖର ସାହୁ, ଏନ୍.ଭାସ୍କର ରାଓ, ପଦ୍ମନାଭ ବେହେରା, ପ୍ରଦୀପ ମାଝୀ, ପୁଷ୍ପେନ୍ଦ୍ର ସିଂହଦେଓ, ରମେଶ ମାଝି, ବିକ୍ରମ କୁମାର ପଣ୍ଡା, ରବି ନାରାୟଣ ନନ୍ଦ, ଝିନ୍ନ ହିକ୍କା, ପ୍ରଫୁଲ୍ଲ ପାଙ୍ଗି, ପ୍ରଦୀପ ଦେଶରୀ, ପଦ୍ମିନୀ ଦିଆନ, ଡ଼ା ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ଭୃଗୁ ବକ୍ସିପାତ୍ର, ସଂଘମିତ୍ରା ଦଳେଇ, ଶ୍ରୀକାନ୍ତ ସାହୁ, ଅଞ୍ଜଳି ସ୍ୱାଇଁ, ରୁପେଶ୍ ପାଣିଗ୍ରାହୀ, ପ୍ରଦୀପ ନାୟକ, ପ୍ରମିଳା ବିଷୋୟୀ, ମଞ୍ଜୁଳା ସ୍ୱାଇଁ, ନନ୍ଦିନୀ ଦେବୀ, ଚକ୍ରମଣି କହଁର, ସୂର୍ଯ୍ୟମଣି ବୈଦ୍ୟ, ପୂର୍ଣ୍ଣ ଚନ୍ଦ୍ର ସ୍ୱାଇଁ, ଲତିକା ପ୍ରଧାନ, ବିପ୍ଳବ ପାତ୍ର, ଚିନ୍ମୟାନନ୍ଦ ଶ୍ରିରୁପ୍ ଦେବ, ସୁବାସ ବେହେରା, ମନୋରମା ମହାନ୍ତି, ଜଗନ୍ନାଥ ସାରକାଙ୍କ ସମେତ ବହୁ ଦଳୀୟ ନେତୃବୃନ୍ଦ ଉପସ୍ଥିତ ଥିଲେ।
