ନୂଆଦିଲ୍ଲୀ,୨୭।୩: ପ୍ରସିଦ୍ଧ ରିଏଲିଟି ଶୋ’ ‘ବିଗବସ୍’ ଉପରେ ତୁରନ୍ତ ରୋକ ଲଗାଇବା ପାଇଁ ସଂସଦରେ ଚର୍ଚ୍ଚା। ବିଜେପି ସାଂସଦ ଅନିଲ ଫିରୋଜିଆ ଗୁରୁବାର ଲୋକସଭାରେ କହିଛନ୍ତି ତୁରନ୍ତ ଏହା ଉପରେ ରୋକ ଲଗାଇ ଦିଆଯାଉ। କାରଣ ଏଥିରେ ଅଶ୍ଲୀଳ ବ୍ୟବହାର ଓ ଖରାପ ଭାଷାକୁ ପ୍ରୋତ୍ସାହନ ଦିଆଯାଉଛି। ଯାହାକି ସମାଜ ପାଇଁ ବିପଦଜନକ ହୋଇପାରେ।
ମଧ୍ୟ ପ୍ରଦେଶର ଉଜୈନରୁ ଲୋକସଭା ସାଂସଦ ଫିରୋଜିୟା ଗୃହର ଶୂନ୍ୟକାଳ ବେଳେ ଏହି ବିଷୟ ଉଠାଇଛନ୍ତି। ସେ କହିଛନ୍ତି, ‘ବିଗବସ୍’ ଏଭଳି ଏକ ଶୋ’ ଯାହାକୁ ଭାରତୀୟ ଟିଭିରେ ବହୁ ପରିମାଣରେ ପ୍ରସାରିତ କରାଯାଉଛି। ଏହାର କୋଟି କୋଟି ଦର୍ଶକ ମଧ୍ୟ ଅଛନ୍ତି।’
ଫିରୋଜିୟା କହିଛନ୍ତି, ଆରମ୍ଭରୁ ଏକ ସାମାନ୍ୟ ରିଆଲିଟି ଶୋ’ ଥିଲା, କିନ୍ତୁ ପରେ ଏଥିରେ ଅଶ୍ଲୀଳତା ଓ ବିବାଦର ସ୍ତର ବଢି ଯାଇଥିଲା। ଏବେ ଏହା ଦର୍ଶକ ଓ ସମାଜ ପାଇଁ ବିପଦଜନକ ହୋଇପାରେ।’ ସେ ଦାବି କହିଛନ୍ତି ଶୋ’ରେ ସବୁବେଳେ ଅଭଦ୍ର ଭାଷା କୁହାଯିବା ସହ ବିବାଦ ଦେଖିବାକୁ ମିଳୁଛି। ଏପରିକି ବହୁ ପ୍ରତିଯୋଗୀଙ୍କ ବ୍ୟକ୍ତିଗତ ଜୀବନରେ ଖରାପ ଦିଗକୁ ବି ଦେଖାଯାଉଛି। ଏହା ଆମର ଯୁବପୀଢି ଓ ପିଲାଙ୍କ ଉପରେ ଖରାପ ପ୍ରଭାବ ପକାଉଛି। ଏହାଛଡା ସେ ଶୋ’ର ହୋଷ୍ଟ ସଲମାନ ଖାନ୍ଙ୍କ ନାଁ ନେଇ କହିଛନ୍ତି, ମୁଁ ଦାବି କରୁଛି ଏହି ଶୋ’ ଓ ଏଭଳି ଶୋ’ ତୁରନ୍ତ ବନ୍ଦ ହେଉ।’
