ଭୁବନେଶ୍ୱର,୨୮/୧୦: ବିଏମ୍ସି କର୍ପୋରେସନ ବୈଠକ ପୂର୍ବରୁ ପୁଣି ଏକାଠି ହେଲେ ଇସି ଗ୍ରୁପ । ଏକାମ୍ର ଓ ମଧ୍ୟ(ଇସି) କର୍ପୋରେଟରମାନେ ଏକାଠି ହୋଇ ରଣନୀତି ପ୍ରସ୍ତୁତ କରିଥିବା ନେଇ ଚର୍ଚ୍ଚା ହୋଇଛି । ବିଏମ୍ସିର ବିଭିନ୍ନ ପ୍ରସଙ୍ଗ ଉଠାଇ ଘେରିବାକୁ ଯୋଜନା ହୋଇଥିବା ନେଇ ବିଶ୍ୱସ୍ତସୂତ୍ରରୁ ସୂଚନା ମିଳିଛି ।
ପ୍ରାପ୍ତ ସୂଚନା ଅନୁସାରେ ରବିବାର ଖଣ୍ଡଗିରି ଠାରେ ଥିବା ଏକ ହୋଟେଲରେ ଗୁପ୍ତ ବୈଠକ ବସିଥିଲା । ଏଥିରେ ପ୍ରାୟ ୨୯ ଜଣ କର୍ପୋରେଟର ସାମିଲ ହୋଇଥିଲେ । ବୈଠକରେ ଆସନ୍ତା ୩୦ରେ ହେବାକୁ ଥିବା କର୍ପୋରେସନ ବୈଠକ ବାବଦରେ ଆଲୋଚନା ହୋଇଥିଲା । ବିଶ୍ୱସ୍ତସୂତ୍ରରୁ ମିଳିଥିବା ସୂଚନା ମୁତାବକ ବିଭିନ୍ନ ପ୍ରସଙ୍ଗ ଉଠାଇ ଖୋଦ୍ ଶାସକ ଦଳର ମେୟର ଓ କର୍ପୋରେଟରଙ୍କୁ ଅଡୁଆରେ ପକାଇବାକୁ ରଣନୀତି ପ୍ରସ୍ତୁତ ହୋଇଥିବା ଜଣାପଡ଼ିଛି ।
ବିଜେଡି କର୍ପୋରେଟରଙ୍କ ମଧ୍ୟରେ ଗତ ଦୁଇ ମାସ ହେବ ଛକାପଞ୍ଝା ଲାଗି ରହିଛି । ପୂର୍ବ କର୍ପୋରେସନ ବୈଠକରେ ଏକାମ୍ର ଓ ମଧ୍ୟ କର୍ପୋରେଟରମାନେ ସାମିଲ ନ ହୋଇ ପୁରୀ ଲୋକନାଥ ମନ୍ଦିର ବୁଲିବାକୁ ଯାଇଥିଲେ । ଏବେ ପୁଣି ଥରେ ମେଳି ହେବାକୁ ନେଇ ଚର୍ଚ୍ଚା ଜୋର ଧରିଛି । ଆସନ୍ତା କର୍ପୋରେସନ ବୈଠକରେ ଭୁବନେଶ୍ୱର ଜଳବନ୍ଦୀ ପ୍ରସଙ୍ଗ ଉଠିବ । ସେହିପରି ବର୍ତ୍ତମାନ ବିଏମ୍ସି ପାଖରେ ପାଣ୍ଠି ନଥିବାରୁ ଅନେକ ଗୁଡିଏ ବିକାଶ କାର୍ଯ୍ୟ ଆଗେଇ ପାରୁନଥିବାରୁ ତାକୁ ନେଇ ବୈଠକରେ ଆଲୋଚନା ହେବାର ସମ୍ଭାବନା ରହିଛି ।
