ନୂଆଦିଲ୍ଲୀ,୧୬/୧୧: ମଣିପୁର ହିଂସା ପରେ ନିଖୋଜ ଥିଲେ ୬ଜଣ । ୫ ଦିନ ପରେ ନଦୀରୁ ମିଳିଲା ୩ ଜଣଙ୍କ ମୃତଦେହ । ତେବେ ୨ ଜଣ ଶିଶୁ ଓ ଜଣେ ମହିଳାଙ୍କ ମୃତଦେହ ମିଳିଥିବା ଜଣାପଡିଛି। ମଣିପୁରର ଜିରିବାମ ଜିଲ୍ଲାରେ ଅସ୍ଥାୟୀ ଶିବିରରେ ଆଶ୍ରୟ ନେଇଥିବା ଲୋକଙ୍କ ମଧ୍ୟରୁ ୬ ଜଣ ନିଖୋଜ ହୋଇଯାଇଥିଲେ । ଉଗ୍ରବାଦୀମାନେ ସେମାନଙ୍କ ମଧ୍ୟରୁ ୬ ଜଣଙ୍କୁ ଅପହରଣ କରିନେଇଥିବା ସନ୍ଦେହ କରାଯାଉଥିବା ବେଳେ ଆଜି ସେମାନଙ୍କ ମଧ୍ୟରୁ ୩ ଜଣଙ୍କ ମୃତଦେହ ଜିରି ନଦୀରୁ ଉଦ୍ଧାର ହୋଇଛି ।
ତେବେ ଅଧିକାରୀଙ୍କ କହିବାନୁସାରେ, ମୃତଦେହଗୁଡିକ ଅପହରଣ ସ୍ଥାନଠାରୁ ପ୍ରାୟ ୧୫ କିଲୋମିଟର ଦୂରରେ ଥିବା ଜିରି ନଦୀରୁ ଉଦ୍ଧାର କରାଯାଇଛି । ତେବେ ଉଦ୍ଧାର ହୋଇଥିବା ମୃତଦେହ ଅପହରଣର ଶିକାର ହୋଇଛି କି ନାହିଁ ତାହା ଏପର୍ଯ୍ୟନ୍ତ ସ୍ଥିର କରାଯାଇ ନାହିଁ। ଯାଞ୍ଚ ପାଇଁ ଆସାମର ସିଲଚର ମେଡିକାଲ କଲେଜ ଏବଂ ହସ୍ପିଟାଲକୁ ପଠାଯାଇଛି ବୋଲି ଜଣେ ଅଧିକାରୀ କହିଛନ୍ତି। ପ୍ରକାଶ ଥାଉକି, ଶୁକ୍ରବାର ଦିନ ମଣିପୁରର ଜିରିବାମରେ ହମାର-ମିଜୋ ସମ୍ପ୍ରଦାୟର ୧୧ ଜଣଙ୍କ ମୃତ୍ୟୁ ବିରୋଧରେ ମିଜୋରାମର ଆଇଜୱାଲରେ ଦୀପ ପ୍ରଜ୍ୱଳନ ପାଇଁ ଶହ ଶହ ଲୋକ ରାସ୍ତାରେ ଯାଇଥିଲେ। ନଭେମ୍ବର ୨ରେ ଜିରିବାମ ସହର ନିକଟସ୍ଥ ଜାୟରୱାନ ଗ୍ରାମରେ ହମାର ଆଦିବାସୀ ମହିଳାଙ୍କ ହତ୍ୟାକୁ ନିନ୍ଦା କରିବା ସହ ପ୍ରଦର୍ଶନକାରୀମାନେ ସ୍ଲୋଗାନ ଦେଇଥିଲେ। ପଶ୍ଚିମ ଇମ୍ଫାଲ,,ଜିରିବାମରେ ଆଫସା ଲାଗୁ କରାଯାଇଛି । ୨୦୨୩ ମେ ମାସରୁ ୨ ଗୋଷ୍ଠୀର ସଂଘର୍ଷ ଯୋଗୁ ମଣିପୁରରେ ଆରମ୍ଭ ହୋଇଥିବା ମଣିପୁର ହିଂସା ଥମିବାର ନାଁ ନେଉନି ।
