କଟକ, ୭।୬: ସହଂଗା ଗୋପାଳପୁର ଗାଁର ଗୋଲଖ ଜେନାଙ୍କ ଘର ଉପରକୁ ୨ଟି ବୋମା ମାଡ଼ । ରାତିରେ ଶୋଇଥିବା ବେଳେ ଏହି ବୋମା ମାଡ଼ ହୋଇଥିବା ଜଣାପଡ଼ିଛି । ଘରର ଝରକା କବାଟ ଭାଙ୍ଗି ଚାରିଆଡ଼େ ପଡ଼ି ରହିଛି । ପୂର୍ବ ଶତ୍ରୁତାକୁ ନେଇ ଏହି ବୋମା ମାଡ଼ ହୋଇଥିବା ଅଭିଯୋଗ । ରାତି ଅଧରେ ବୋମା ମାଡ଼ କରି ଦୃର୍ବୁତ୍ତ ଫେରାର ହୋଇଯାଇଛନ୍ତି । ଗୋଲଖ ଜେନାଙ୍କ ପରିବାର ଆତଙ୍କିତ ଅବସ୍ଥାରେ ଅଛନ୍ତି ।
ରତାଗଡ଼ ଗୋବିନ୍ଦପୁର ପଞ୍ଚାୟତର ସହଙ୍ଗା ଗୋପାଳପୁର ଗ୍ରାମର ଗୋଲଖ ଜେନାଙ୍କର ତାଙ୍କ ଭାଇ ଆଳୀ କୁଟୁମ୍ବ ଦେବରାଜ ଜେନାଙ୍କ ସହ ଝଗଡ଼ା ହୋଇଥିଲା । ଦେବରାଜ ଜେନା ଶୁକ୍ରବାର ସକାଳେ ଗୋଲଖ ଜେନାଙ୍କ ବାଉଁଶ ବୁଦାରୁ ବାଉଁଶ କାଟିଥିଲେ । ଗୋଲଖ ମନା କରିବା ପରେ ଦେବରାଜ ତାଙ୍କୁ ଖଣ୍ଡା ଧରି ହାଣିବାକୁ ଗୋଡ଼ାଇଥିଲେ । ଏମିତି କି ଡିନା ମାଇଟ୍ ପକାଇ ଉଡ଼େଇ ଦେବି ବୋଲି ଧମକ ଦେଇଥିଲେ । ଏନେଇ ଅଭିଯୋଗ କରିଛନ୍ତି ଗୋଲଖ । ପୂର୍ବ ବର୍ଷ ଗଛ କଟାକୁ ନେଇ ମଧ୍ୟ ଦୁଇ ପରିବାର ମଧ୍ୟରେ ଝଗଡ଼ା ହୋଇଥିଲା ।
ଗତ ବିଳମ୍ବିତ ରାତିରେ ଗୋଲଖଙ୍କ ପୁତୁରା ଶୋଇଥିବା ବେଳେ ରାତି ଗୋଟାଏରେ ଘର ଝରକାକୁ ବୋମା ମାଡ଼ ହୋଇଛି । ଫଳରେ ଘର ଝରକା କବାଟ ଭାଙ୍ଗିଯାଇଛି । ପରେ ଏନେଇ ଗୋଲଖ ବାଙ୍କୀ ପୁଲିସ୍କୁ ଅଭିଯୋଗ କରିଥିଲେ । ବାଙ୍କୀ ଥାନା ଆଇଆଇସି ପହଞ୍ଚି ତଦନ୍ତ ଚଳାଇଛନ୍ତି ।
