ନୂଆଦିଲ୍ଲୀ : ଭାଙ୍ଗିଲା ୧୧୬ ବର୍ଷର ଇତିହାସ। SNDT ମହିଳା ବିଶ୍ବବିଦ୍ୟାଳୟ ଏହାର ୧୧୬ ବର୍ଷର ଇତିହାସରେ ପ୍ରଥମ ଥର ପାଇଁ ଜଣେ ପୁରୁଷଙ୍କୁ ଗ୍ରାଜୁଏସନ ଏବଂ ପୋଷ୍ଟ ଗ୍ରାଜୁଏସନ ଡିଗ୍ରୀ ପ୍ରଦାନ କରିବ। ବମ୍ବେ ହାଇକୋର୍ଟଙ୍କ ନିର୍ଦ୍ଦେଶ ପରେ ଏହି ନିଷ୍ପତ୍ତି ନିଆଯାଇଛି। ଗୁଜରାଟର ଜଣେ ଛାତ୍ର ଲିଙ୍ଗ ପରିବର୍ତ୍ତନ ଅସ୍ତ୍ରୋପଚାର କରିଥିଲେ। ପରେ ସେ ତାଙ୍କ ନୂତନ ନାମ ଏବଂ ଲିଙ୍ଗ ସହିତ ଏକ ଡିଗ୍ରୀ ଏବଂ ପ୍ରମାଣପତ୍ର ପାଇଁ ଅନୁରୋଧ କରିଥିଲେ, କିନ୍ତୁ ବିଶ୍ୱବିଦ୍ୟାଳୟ ତାଙ୍କ ଅନୁରୋଧକୁ ପ୍ରତ୍ୟାଖ୍ୟାନ କରିଥିଲା। ବିଶ୍ୱବିଦ୍ୟାଳୟ ତାଙ୍କ ଅନୁରୋଧକୁ ପ୍ରତ୍ୟାଖ୍ୟାନ କରିବା ପରେ, ଛାତ୍ର ଜଣକ ବମ୍ବେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ବର୍ତ୍ତମାନ, ହାଇକୋର୍ଟଙ୍କ ନିର୍ଦ୍ଦେଶ ପରେ, ବିଶ୍ୱବିଦ୍ୟାଳୟ ତାଙ୍କୁ ତାଙ୍କର ସଂଶୋଧିତ ନାମ ଏବଂ ଲିଙ୍ଗ ସହିତ ଏକ ଡିଗ୍ରୀ ପ୍ରମାଣପତ୍ର ପ୍ରଦାନ କରିବ ।
ଏହି ଟ୍ରାନ୍ସଜେଣ୍ଡର ଛାତ୍ରୀଙ୍କୁ ଏକ ବଡ଼ ଆଶ୍ୱସ୍ତି ଦେଇଛନ୍ତି ବମ୍ବେ ହାଇକୋର୍ଟ । କୋର୍ଟ SNDT ମହିଳା ବିଶ୍ୱବିଦ୍ୟାଳୟକୁ ଆବେଦନକାରୀଙ୍କୁ ଆବଶ୍ୟକୀୟ ସୂଚନା ପ୍ରଦାନ କରିବାକୁ କଡ଼ା ନିର୍ଦ୍ଦେଶ ଦେଇଛନ୍ତି। ବିଶ୍ୱବିଦ୍ୟାଳୟ ନୂତନ ପରିଚୟ ଅନୁଯାୟୀ ଗ୍ରାଜୁଏସନ ଏବଂ ପୋଷ୍ଟ ଗ୍ରାଜୁଏସନ ଡିଗ୍ରୀ ପ୍ରଦାନ କରିବା ଉଚିତ। ବିଶ୍ୱବିଦ୍ୟାଳୟର ୧୧୬ ବର୍ଷର ଇତିହାସରେ ଏହା ପ୍ରଥମ ଥର ହେବ ଯେ ପୁରୁଷଙ୍କ ନାମରେ ଡିଗ୍ରୀ ପ୍ରଦାନ କରାଯିବ। କୋର୍ଟଙ୍କ ଡିଭିଜନ ବେଞ୍ଚ ସ୍ପଷ୍ଟ ଭାବରେ କହିଛନ୍ତି ଯେ, ବିଶ୍ୱବିଦ୍ୟାଳୟର ପ୍ରାଥମିକ ଉଦ୍ଦେଶ୍ୟ ଶିକ୍ଷା ପ୍ରଦାନ କରିବା। କୋର୍ଟ କହିଛନ୍ତି ଯେ, ନୀତି ନିୟମ କେବଳ ଏକ ପ୍ରଶାସନିକ ପ୍ରକ୍ରିୟା, ସେଗୁଡ଼ିକୁ ଶିକ୍ଷା ବାଧା ଦେବା ପାଇଁ ବ୍ୟବହାର କରାଯାଇପାରିବ ନାହିଁ।
