ଆନନ୍ଦପୁର,୨୨।୧ : ପ୍ରଥମେ ନାବାଳକ ପୁତୁରାକୁ ପିଟିପିଟି ରକ୍ତାକ୍ତ କରିଦେଲା ଦାଦା। ପୁତୁରା ବେହୋସ ହେବା ପରେ ମରିଯାଇଛି ଭାବି ଅନ୍ଯ ଜଣେ ପୁତୁରାର ସହଯୋଗରେ ନଦୀକୁ ଫିଙ୍ଗି ଦେଉଥିଲା ଦାଦା । ହେଲେ ଏତିକି ବେଳେ ସେଇ ବାଟ ଦେଇ ଯାଉଥିବା କିଛି ଯୁବକଙ୍କ ନଜରରେ ପଡିଯିବାରୁ ସଙ୍କଟାପନ୍ନ ଅବସ୍ଥାରେ ନାବାଳକକୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। ଅନ୍ଯପଟେ ଘଟଣା ସମ୍ପର୍କରେ ଖବର ଦେବାରୁ ପେଲିସ ପହଁଞ୍ଚି ଦାଦା ଓ ଅନ୍ଯଜଣେ ପୁତୁରାକୁ ଅଟକ ରଖି ତଦନ୍ତ ଚଳାଇଛି ।
ରକ୍ତ ଜୁଡୁବୁଡୁ ହୋଇ ଅଚେତ ଅବସ୍ଥାରେ ଥିବା ନାବାଳକକୁ ଜଣେ ବ୍ଯକ୍ତି ଓ ଅନ୍ଯ ଜଣେ ନାବାଳକ ବୁଧବାର ସଂନ୍ଧ୍ଯାରେ ଆନନ୍ଦପୁର ଉପଖଣ୍ଡ ବୈତରଣୀ ବ୍ଯାରେଜ୍ ନିକଟକୁ ନେଇ ଆସିଥିଲେ । ସେହି ବାଟଦେଇ ଯାଉଥିବା ଯୁବକମାନଙ୍କ ସନ୍ଦେହ ହେବାରୁ ଘଟଣା ସମ୍ପର୍କରେ ସେମାନେ ପଚାରିଥିଲେ । ହେଲେ ଦୁର୍ଘଟଣାରୁ ପିଲାଟିର ଏଭଳି ଅବସ୍ଥା ହୋଇଥିବା କହିଥିଲେ। ଏଥିସହ ନିଜ ନାମ ଶିଶିର ପାତ୍ର ଓ ଘର ଶୈଲଙ୍ଗ ବୋଲି ପରିଚୟ ଦେଇଥିଲା । ହେଲେ ଖୋଳତାଡ୍ କରିବାରୁ ସେ ଶୈଲଙ୍ଗ ଗାଁର ହୋଇନଥିବା ଜଣାପଡିଥିଲା । ସନ୍ଦେହ ହେବାରୁ ଯୁବକମାନେ ତାଙ୍କୁ ମେଡିକାଲକୁ ଆଣିବା ସହ ଥାନାକୁ ମଧ୍ଯ ଖବର ଦେଇଥିଲେ । ମେଡିକାଲରେ ପହଁଞ୍ଚିବା ପରେ ସାଙ୍ଗରେ ଥିବା ଅନ୍ଯ ଜଣେ ପୁତୁରା ସବୁ ସତ କହିଥିଲା । ୫ହଜାର ଟଙ୍କା ଘରୁ ନେଇ ଆସିଥିବାରୁ ତାର ସାନଭାଇକୁ ଦାଦା ଶିଶିର ନିର୍ଧୁମ୍ ମାଡ଼ ମାରିଛି ବୋଲି କହିଥିଲା। ପୋଲିସ୍ ଘଟଣାର ତଦନ୍ତ କରୁଛି।
