ନୂଆଦିଲ୍ଲୀ,୧୨/୦୯: ବ୍ରାଜିଲ ସୁ୍ପ୍ରିମକୋର୍ଟ ଏକ ବଡ଼ ନିଷ୍ପତ୍ତି ନେଇଛନ୍ତି । ପୂର୍ବତନ ରାଷ୍ଟ୍ରପତି ଜାୟର ବୋଲସୋନାରୋଙ୍କୁ ୨୭ ବର୍ଷ ୩ ମାସ ଜେଲ୍ ଦଣ୍ଡାଦେଶ ଶୁଣାଇଛନ୍ତି । ଦେଶରେ ବିଦ୍ରୋହ ଷଡ଼ଯନ୍ତ୍ର ଅଭିଯୋଗରେ ବୋଲସୋନାରୋଙ୍କୁ ଦୋଷୀ ସାବ୍ୟସ୍ତ କରାଯାଇ ଦାଣ୍ଡାଦେଶ ଶୁଣାଇଛନ୍ତି ସୁପ୍ରିମକୋର୍ଟ । ଏହି ଦଣ୍ଡାଦେଶ ବ୍ରାଜିଲ ଇତିହାସରେ ପ୍ରଥମ ଯାହା ପୂର୍ବ ରାଷ୍ଟ୍ରପତିଙ୍କୁ ଲୋକତନ୍ତ୍ରରେ ଦୋଷୀ ସାବ୍ୟସ୍ତ କରାଯାଇଛି । ୭୦ ବର୍ଷୀୟ ବୋଲସୋନାରୋଙ୍କୁ ଏବେ ହ୍ୱାଇଟ ହାଉସରେ ରଖାଯାଇଛି । ସେ ଇଲେକ୍ଟ୍ରୋନିକ ଆଙ୍କଲ ମନିଟରିଂରେ ରହିଛନ୍ତି ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରିୟ ଥିଲେ ଜାୟର ବୋଲସୋନାରୋ । ୨୦୨୨ରେ ରାଷ୍ଟ୍ରପତି ନିର୍ବାଚନରେ କ୍ଷମତାରେ ରହିବାକୁ ସେ ବିଦ୍ରୋହ ଷଡ଼ଯନ୍ତ୍ର କରିଥିବା ଅଭିଯୋଗ ହୋଇଥିଲା । ସୁପ୍ରିମକୋର୍ଟର ୫ ଜଣିଆ ଖଣ୍ଡପୀଠ ମଧ୍ୟରୁ ୪ଜଣ ବୋଲସୋନାରୋଙ୍କ ନାମରେ ସମସ୍ତ ଅଭିଯୋଗରେ ଦୋଷୀ ସାବ୍ୟସ୍ତ କରିଥିଲେ । ଜଣେ ବିଚାରପତି ତାଙ୍କୁ ନିର୍ଦ୍ଦେଶରେ ଖଲାସ କରିବାକୁ ରାୟ ଦେଇଥିଲେ । ଏହି ନିଷ୍ପତ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଧମକ ପରେ ନିଆଯାଇଛି । ସେ ବ୍ରାଜିଲ ଉପରେ ଆର୍ଥିକ ଚାପ ପକାଇବାକୁ ଚେଷ୍ଟା କରିଛନ୍ତି । ମାତ୍ର ବ୍ରାଜିଲର ନ୍ୟାୟପାଳିକା ଏହାକୁ ଆଣଦେଖା କରିଛନ୍ତି । ବୋଲସୋନାରୋଙ୍କ ନାମରେ ସଂଗଠିତ ଅପରାଧ, ସଶସ୍ତ୍ର ଅପରାଧିକ ସଂଗଠନର ଅଂଶ ହେବା, ଲୋକତାନ୍ତ୍ରିକ ଶାସନରୁ ଉସକାଇବା, ଦେଶର ସମ୍ପତ୍ତିକୁ କ୍ଷତି ପହଞ୍ଚାଇବା ପରି ଗୁରୁତର ଅଭଯୋଗ ରହିଛି । ୨୦୨୨ ରାଷ୍ଟ୍ରପତି ନିର୍ବାଚନରେ ଲୁଲା ଦି ସିଲଭାଙ୍କଠୁ ହାରିବା ପରେ କ୍ଷମତା ନ ଛାଡିବାକୁ ଷଡଯନ୍ତ୍ର ରଚିଥିଲେ ।ଷଡ଼ଯନ୍ତ୍ରର ମୁଖ୍ୟ କେନ୍ଦ୍ର ଥିଲା ୨୦୨୩, ଜାନୁଆରୀ ୮ । ଯେବେ ବୋଲସୋନାରୋଙ୍କ ସମର୍ଥକ ସୁପ୍ରିମକୋର୍ଟ ଭବନ, ରାଷ୍ଟ୍ରପତି ଭବନ ଏବଂ ସଂସଦ ଉପରେ ଆକ୍ରମଣ କରିଥିଲେ ।
ଏହା ପ୍ରଥମ ଥର ନୁହେଁ ଯେ ଜାୟର ବୋଲସୋନାରୋଙ୍କ ବିରୋଧରେ ଶାସନ ଏବଂ କର୍ତ୍ତୃପକ୍ଷଙ୍କ ବିରୋଧରେ ଯିବା ନେଇ ଅଭିଯୋଗ ଆସିଛି । ପୂର୍ବରୁ ତାଙ୍କ ସାମରିକ କ୍ୟାରିୟର ସମୟରେ, ୧୯୮୬ ମସିହାରେ ଏକ ସମ୍ବାଦ ପତ୍ରିକାକୁ ସାକ୍ଷାତକାର ଦେଇ ସେନାରେ କମ ଦରମା ପ୍ରସଙ୍ଗ ଉଠାଇବାର ଅଭିଯୋଗ ହୋଇଥିଲା, ଯାହା ସାମରିକ ନିୟମ ବିରୁଦ୍ଧରେ ଥିଲା । ତାଙ୍କ ପଦକ୍ଷେପକୁ ସେବେ ପ୍ରଶଂସା କରାଯାଇଥିଲା । ୧୯୮୭ ମସିହାରେ, ବୋଲସୋନାରୋ ଆଉ ଏକ ମାମଲାରେ ଫସିଥିଲେ। ତାଙ୍କର ଏକ ସାକ୍ଷାତକାର ନେଇଥିବା ପତ୍ରିକା ପ୍ରକାଶ କରିଥିଲା ଯେ, ଜାୟର ତାଙ୍କ ସାଥୀଙ୍କ ସହିତ ରିଓ ଡି ଜେନେରିଓରେ ସାମରିକ ୟୁନିଟରେ ବୋମା ଲଗାଇବାକୁ ଷଡ଼ଯନ୍ତ୍ର କରିଥିଲେ। ପତ୍ରିକା ମଧ୍ୟ ସ୍କେଚ୍ ଏବଂ ଷଡ଼ଯନ୍ତ୍ର ବିଷୟରେ ସୂଚନା ପ୍ରକାଶ କରିଥିଲା । ଦାବି କରିଥିଲା ଯେ ଏହି ସମସ୍ତ ସ୍କେଚ୍ ନିଜେ ବୋଲସୋନାରୋଙ୍କ ଦ୍ୱାରା ପ୍ରସ୍ତୁତ କରାଯାଇଥିଲା । ୧୯୮୯ ମସିହାରେ ବ୍ରାଜିଲ ରାଜନୀତିରେ ପ୍ରବେଶ କରିଥିଲେ ବୋଲସୋନାରୋ ।
