ସାଓ ପାଓଲୋ,୦୪/୧୨: ବ୍ରାଜିଲର କିମ୍ବଦନ୍ତୀ ଫୁଟବଲ ଖେଳାଳି ପେଲେ କ୍ୟାନସରରେ ପୀଡ଼ିତ ରହିଥିବାରୁ ନିୟମିତ ଭାବେ ପ୍ରତି ମାସରେ ତାଙ୍କର ‘ଚେକ୍ ଅପ୍’ ହୋଇଥାଏ । ସବୁ ଥର ପରି ସେ ଗତ ୩୦ ତାରିଖରେ ଆଲବର୍ଟ ଆଇନଷ୍ଟାଇନ ହସ୍ପିଟାଲରେ ଭର୍ତ୍ତି ହୋଇଥିଲେ । ହସ୍ପିଟାଲରେ ଭର୍ତ୍ତି ହେବା ଖବର ପ୍ରକାଶିତ ହେବା ପରେ ପ୍ରଶଂସକ ଚିନ୍ତିତ ହୋଇ ପଡ଼ିଥିଲେ ।
ପ୍ରଶଂସକଙ୍କ ମନର ଦ୍ୱନ୍ଦ୍ୱ ଦୂର କରି ପେଲେଙ୍କ ଝିଅ କେଲି ସୋସିଆଲ ମିଡିଆରେ କହିଥିଲେ, ‘କୌଣସି ଜରୁରି ସ୍ଥିତିରେ ବାପାଙ୍କୁ ହସ୍ପିଟାଲରେ ଭର୍ତ୍ତି କରାଯାଇ ନାହିଁ । ବରଂ ଏହା ତାଙ୍କର ନିୟମିତ ଚିକିତ୍ସା ।’ କିନ୍ତୁ ଗତ ଶୁକ୍ରବାର ଠାରୁ ପେଲେଙ୍କ ଅବସ୍ଥା ଗୁରୁତର ରହିଛି ବୋଲି ବିଭିନ୍ନ ଗଣମାଧ୍ୟମରେ ରିପୋର୍ଟ ପ୍ରକାଶ ପାଉଛି । ଏ ବିଷୟରେ ଡାକ୍ତରଖାନା କିମ୍ବା ପେଲେଙ୍କ ପରିବାର ସୂତ୍ରରୁ କିଛି ସୂଚନା ଦିଆଯାଇ ନାହିଁ ।
୨୦୨୧ ସେପ୍ଟେମ୍ବର ମାସରେ ୮୨ ବର୍ଷୀୟ ପେଲେଙ୍କ ମଳାଶୟରେ ଟ୍ୟୁମର ଅସ୍ତ୍ରୋପଚାର ହୋଇଥିଲା । ସେବେଠୁ ତାଙ୍କର କେମୋଥେରାପି ଚିକିତ୍ସା ଚାଲିଛି । ଅବସ୍ଥା ଏବେ ଗୁରୁତର ଥିବାରୁ କେମୋ ଚିକିତ୍ସା ବନ୍ଦ ରଖାଯାଇଥିବା ଜଣା ପଡ଼ିଛି ।
