ଭାରସାମ୍ୟ ହରାଇ ଗଛରେ ପିଟି ହେଲା କମ୍ପାନୀ ବସ୍, ୬ ଗୁରୁତର
ଢେଙ୍କାନାଳ,୨୬/୫: ଭାରସାମ୍ୟ ହରାଇ ରାସ୍ତା କଡ଼ ଗଛରେ ପିଟି ହେଲା କମ୍ପାନୀ ବସ । ଏଥିରେ ୬ଜଣ ଗୁରୁତର ହୋଇପଡ଼ିଛନ୍ତି । ଢେଙ୍କାନାଳ ମହିଷାପାଟ ମାଣିଆବନ୍ଧ ଆଶ୍ରମ ସ୍କୁଲ ନିକଟରେ ଏପରି ଦୁର୍ଘଟଣା ଘଟିଛି ।
ସୂଚନା ଅନୁସାରେ, କଟକ ଜିଲ୍ଲା ଆଠଗଡ଼ରେ ଥିବା ଏକ ଷ୍ଟିଲ ପ୍ଲାଣ୍ଟର ବସ ଢେଙ୍କାନାଳରୁ କିଛି କମ୍ପାନୀ କର୍ମଚାରୀ ଏବଂ ଅନ୍ୟ କେତେଜଣ ଯାତ୍ରୀଙ୍କୁ ନେଇ ଆଠଗଡ଼ ଯାଉଥିଲା । ହେଲେ ମହିଷାପାଟ ମାଣିଆବନ୍ଧ ନିକଟରେ ବସଟି ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଏକ ତେନ୍ତୁଳି ଗଛରେ ପିଟି ହୋଇଥିଲା । ବସର ସମ୍ମୁଖ ଭାଗ ଭାଙ୍ଗି ଚୁରମାର ହୋଇଯାଇଛି । ଯେଉଁଥିରେ ୬ଜଣ ଗୁରୁତର ହୋଇପଡ଼ିଛନ୍ତି । ଗୁରୁତରଙ୍କ ମଧ୍ୟରେ କମ୍ପାନୀ କର୍ମଚାରୀ ଏବଂ ସାଧାରଣ ଯାତ୍ରୀ ରହିଛନ୍ତି ।
ଖବରପାଇ ଅଗ୍ନିଶମ ଓ ପୁଲିସ ପହଞ୍ଚି ଆହତମାନଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି । ଆହତମାନେ ତୁଳସୀ ପ୍ରଧାନ, ମାନସୀ ପ୍ରଧାନ, ଜିତେନ୍ଦ୍ର ସାହୁ, ଗଜେନ୍ଦ୍ର ମହାପାତ୍ର, ପିତବାସ ସାହୁ ବୋଲି ଜଣାପଡିଛି । ଜଣଙ୍କୁ କଟକ ସ୍ଥାନାନ୍ତର କରାଯାଇଥିବାବେଳେ ଅନ୍ୟ ୫ଜଣ ଡିଏଚଏଚରେ ଚିକିତ୍ସିତ ହେଉଛନ୍ତି ।
