ୱାଶିଂଟନ,୧୦/୦୬: ଲସ୍ ଏଞ୍ଜେଲ୍ସରେ ଦିନକୁ ଦିନ ହିଂସା ତେଜୁଛି । ଏବେ ଉତ୍ତେଜନାକୁ ନେଇ ରାଜନୀତି ଜୋର ଧରିଛି । ସ୍ଥିତି ନିୟନ୍ତ୍ରଣ ପାଇଁ ସେନା ପଠାଇବାରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଶାସନ ବିରୋଧରେ ମାମଲା ରୁଜୁ ହୋଇଛି । କାର୍ଲିଫର୍ଣ୍ଣିଆରେ ଟ୍ରମ୍ପ ଟିମ୍ ବିରୋଧରେ ମକଦ୍ଦମା ଦାୟର ହୋଇଛି । ଗଭର୍ଣ୍ଣରଙ୍କ ବିନା ଅନୁମତିରେ ଲସ୍ ଏଞ୍ଜେଲ୍ସରେ ୨ ହଜାର ନ୍ୟାସନାଲ ଗାର୍ଡ ମୁତୟନକୁ ବିରୋଧ କରି ମାମଲା ଦାୟର ହୋଇଥିବା ଜଣାପଡିଛି ।
ଟ୍ରମ୍ପ-କାର୍ଲିଫର୍ଣ୍ଣିଆ ସରକାର ମୁହାଁମୁହିଁ- ଲସ୍ ଏଞ୍ଜେଲ୍ସ ହିଂସାକୁ ନେଇ ଟ୍ରମ୍ପ ଓ ରାଜ୍ୟ ସରକାର ମୁହଁମୁହିଁ ହୋଇଛନ୍ତି । କାର୍ଲିଫର୍ଣ୍ଣିଆ ଗଭର୍ଣ୍ଣର ଗୋବିନ୍ ନ୍ୟୁସୋମ୍ କହିଛନ୍ତି, ତାଙ୍କୁ କୁହାଯାଇଛି କି ରାଷ୍ଟ୍ରପତି ଲସ୍ ଏଞ୍ଜେଲ୍ସରେ ଅତିରିକ୍ତ ୨ ହଜାର ଗାର୍ଡ ସୈନିକ ମୁତୟନ କରିଥିଲେ । ଏହାକୁ ନେଇ ଟ୍ରମ୍ପ ଓ କାର୍ଲିଫର୍ଣ୍ଣିଆ ସରକାର ମୁହାଁମୁହିଁ ହୋଇଛନ୍ତି । ଟ୍ରମ୍ପ ପ୍ରଶାସନ ବିରୋଧରେ ମାମଲା ଦାୟର ହୋଇଛି । ଏ ବାବଦରେ କାର୍ଲିଫର୍ଣ୍ଣିଆ ଆଣ୍ଟୋନି ଜେନେରାଲ ବୋଣ୍ଟା କହିଛନ୍ତି, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ଲିମିଟ୍ କ୍ରସ କରିଛନ୍ତି । ସେ ଗଭର୍ଣ୍ଣରଙ୍କ ସହମତି ବିନା ସେନା ମୁତୟନ କରିଛନ୍ତି । ମୁଁ ସଫା ସଫା କହୁଛି କିଛି ଆକ୍ରମଣ କି ବିଦ୍ରୋହ ହେଉନାହିଁ । ରାଷ୍ଟ୍ରପତି ରାଜନୈତିକ ହିତ ପାଇଁ ଜାଣିଶୁଣି ଅରାଜକତା ଓ ସଙ୍କଟ ସୃଷ୍ଟି କରୁଛନ୍ତି ।
ଅଧିକ ପଢନ୍ତୁ...ବାହ୍ୟ ଗ୍ରହରେ ଜୀବନର ସଙ୍କେତ, କେ୨-୧୮ବିରେ ମିଳିଲା ଦୁଇଟି ଜୈବ କଣିକା
ଜଳୁଛି ଲସ୍ ଏଞ୍ଜେଲ୍ସ- ଆମେରିକାର ଲସ୍ ଏଞ୍ଜେଲ୍ସରେ ଅବୈଧ ପ୍ରବାସୀଙ୍କ ଉପରେ ହେଉଥିବା କାର୍ଯ୍ୟାନୁଷ୍ଠାନକୁ ନେଇ ୩ ଦିନ ହେଲା ହିଂସାତ୍ମକ ଆନ୍ଦୋଳନ ଜାରି ରହିଛି । ସୋମବାର ହିଂସା ଉଗ୍ର ରୂପ ନେଇଥିଲା । ବିକ୍ଷୋଭକାରୀମାନେ ସହରର ରାସ୍ତାଗୁଡ଼ିକୁ ଜାମ୍ କରିଦେବା ସହ ଶତାଧିକ ଗାଡ଼ି ପୋଡ଼ିଥିଲେ । ଦୋକାନ, ବଜାର ଓ ସପିଙ୍ଗ୍ ମଲରେ ଲୁଟ୍ପାଟ୍ ମଧ୍ୟ କରିଥିଲେ । ବିକ୍ଷୋଭକାରୀମାନେ ମାସ୍କ ପିନ୍ଧି ରାସ୍ତାକୁ ଓହ୍ଲାଇଥିଲେ । ସୁରକ୍ଷା କ୍ୟାମେରାରୁ ସୁରକ୍ଷିତ ରହିବା ପାଇଁ ସେମାନେ ମାସ୍କ ପିନ୍ଧିଥିବା ଦେଖିବାକୁ ମିଳିଥିଲା । ଏଭଳି ସ୍ଥିତିରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ସୋସିଆଲ ମିଡିଆରେ ଏହି ଆନ୍ଦୋଳନକୁ ନିନ୍ଦା କରିଥିଲେ ।
ଖବର ମୁତାବକ, ଲସ୍ ଏଞ୍ଜେଲ୍ସରେ ଯେଉଁମାନେ ଆନ୍ଦୋଳନ କରୁଛନ୍ତି, ସେମାନଙ୍କ ମଧ୍ୟରେ ଅଧିକାଂଶ ମେକ୍ସିକୋ ମୂଳ ବାସିନ୍ଦା । ସେମାନେ ଅବୈଧ ଭାବେ ଆମେରିକାରେ ବାସ କରୁଛନ୍ତି । ସୋମବାର ପୁଲିସ ସେମାନଙ୍କୁ ରୋକିବା ପାଇଁ ରବର ବୁଲେଟ୍ ମାଡ଼ କରିଥିଲା । ଏଥିରୁ ରକ୍ଷା ପାଇବା ପାଇଁ ବିକ୍ଷୋଭକାରୀ ରାସ୍ତା ଉପରେ ଶୋଇପଡ଼ିଥିଲେ । ଆନ୍ଦୋଳନକାରୀଙ୍କ ହାତରେ ମେକ୍ସିକୋର ପତାକା ଥିବା ଦେଖିବାକୁ ମିଳିଛି ।
